ىسكەرلىك بەلسەندىلىكتى ىنتالاندىرۋ قاجەت - ماۋلەن اشىمبايەۆ
جيىن بارىسىندا مەملەكەت باسشىسى قاسىم-جومارت كەمەل ۇلى توقايەۆ پارلامەنت سايلاۋىندا باسەكەلەستىك پەن ازاماتتىق بەلسەندىلىكتىڭ جوعارى بولعانىن اتاپ ءوتتى.
بۇل تۋرالى پارلامەنت سەناتىنىڭ ءتوراعاسى ماۋلەن اشىمبايەۆ پىكىر ءبىلدىردى، دەپ حابارلايدى قازاقپارات.
سەنات سپيكەرىنىڭ مالىمەتىنشە، ماجىلىسكە قازاقستاندىق قوعامنىڭ بۇگىنگى يدەولوگيالىق كوزقاراسىن بىلدىرەتىن التى پارتيا ءوتىپ وتىر. ال، دەپۋتاتتاردىڭ ءبىر مانداتتى وكرۋگتەر بويىنشا جانە ءوزىن-ءوزى ۇسىنۋ ارقىلى سايلانۋى پارلامەنتتە ءارتۇرلى الەۋمەتتىك توپتىڭ مۇددەسىن قورعاۋعا مۇمكىندىك بەرەدى.
«مەملەكەت باسشىسى ءوز سوزىندە ەلىمىزدىڭ جاڭا كەزەڭدەگى دامۋ باسىمدىقتارىن بەلگىلەپ، پارلامەنتتىڭ الدىنا ناقتى مىندەتتەر قويدى. سوعان سايكەس جوعارى وكىلدى ورگان ەلىمىزدىڭ قارقىندى دامۋى ءۇشىن ساپالى زاڭنامالىق بازا قالىپتاستىرۋى كەرەك.
الدا تۇرعان مىندەتتەردىڭ ءبىرى - كاسىپكەرلىكتى ەكونوميكانىڭ قوزعاۋشى كۇشىنە اينالدىرۋ. سوندىقتان ىسكەرلىك بەلسەندىلىكتى ىنتالاندىرۋ قاجەت. ول ءۇشىن شاعىن جانە ورتا بيزنەستى قولداۋ مەن دامىتۋدىڭ ءتيىمدى شارالار كەشەنىن قولعا العان ءجون. وسىعان وراي مەملەكەت باسشىسى ۇكىمەت پەن دەپۋتاتتىق كورپۋسقا ءتيىستى مىندەتتەر جۇكتەدى.
سونىمەن قاتار پرەزيدەنتىمىز جەكە مەنشىكتى قورعاۋ نارىقتىق ەكونوميكانىڭ نەگىزى ەكەنىن ەسكەرىپ، سوت جانە قۇقىق قورعاۋ جۇيەسىن رەفورمالاۋدى جالعاستىرۋ قاجەت ەكەنىن ايتتى. سونداي- اق ەلىمىزدىڭ وندىرىستىك الەۋەتىن بارىنشا ارتتىرۋعا جانە ينفراقۇرىلىمدى دامىتۋعا قاتىستى ۇستانىمداردى قايتا قاراۋ اسا ماڭىزدى. ازىق-تۇلىك قاۋىپسىزدىگىن قامتاماسىز ەتۋ، ادام كاپيتالىنىڭ ساپاسىن ارتتىرۋ، الەۋمەتتىك تۇرعىدان وسال توپتاعى ازاماتتاردى قولداۋ ماسەلەلەرى دە باستى نازاردا»، - دەدى ماۋلەن اشىمبايەۆ.
ول ودان بولەك، ادام قۇقىقتارىن قورعاۋ جۇيەسىن نىعايتۋ ءىسى جالعاسا بەرەتىنىنە ءمان بەردى. مەملەكەتتىك باسقارۋدىڭ تيىمدىلىگىن جانە ستراتەگيالىق جوسپارلاۋدىڭ ساپاسىن كوتەرۋ مىندەتى دە جۇكتەلگەنىن جەتكىزدى.
«مەملەكەت باسشىسى ەلىمىزدى دامىتۋ باعدارىن ىسكە اسىرۋ ءۇشىن ساپالى پارلامەنتتىك باقىلاۋدىڭ ماڭىزدى ەكەنىنە نازار اۋداردى. سوندىقتان دەپۋتاتتار ازاماتتارمەن كەرى بايلانىس ورناتىپ، ولاردىڭ مۇددەسىن دايەكتى تۇردە قورعاۋ ارقىلى بيلىك پەن قوعامنىڭ اراسىنداعى التىن كوپىر بولۋعا ءتيىس.
مۇنىڭ ءبارى VIII سايلانعان پارلامەنتتىڭ الدىندا اۋقىمدى جانە ماڭىزدى مىندەتتەر تۇرعانىن كورسەتەدى. ولاردى ىسكە اسىرۋ جولىندا سەنات دەپۋتاتتارى ازاماتتىق قوعاممەن تۇراقتى ديالوگ قۇرىپ، ورتاق مۇددەگە ساراپشىلار مەن بەلسەندى ازاماتتاردى جۇمىلدىرا وتىرىپ جۇمىس ىستەيدى»، - دەلىنگەن سەنات ءتوراعاسىنىڭ جازباسىندا.