جامبىلدا اسا ءىرى مولشەردە ەسىرتكى ازىرلەگەن قىلمىستىق توپ ۇستالدى

تاراز. قازاقپارات – ۇ ق ك جامبىل وبلىسى بويىنشا دەپارتامەنتى مەن ءوڭىر پروكۋراتۋراسىنىڭ بىرلەسكەن جۇمىسىنىڭ ناتيجەسىندە اسا ءىرى مولشەردە ەسىرتكى زاتى تاركىلەندى، دەپ حابارلايدى قازاقپارات.

باس پروكۋراتۋرانىڭ مالىمەتىنشە، ۇستالعان بەس ادامنان تۇراتىن قىلمىستىق توپ 34 كەلى 123 گرام «مەفەدرون» سينتەتيكالىق ەسىرتكىسىن ساتۋ ماقساتىندا زاڭسىز دايىنداپ، ساقتاعان. «قىلمىستىق توپ 2-3 ايدىڭ كولەمىندە بايزاق اۋدانىنىڭ اۋماعىندا جاساندى لابوراتوريالىق سەحتا سينتەتيكالىق ەسىرتكى زاتىن دايىنداپ، كەيىننەن تاسىمالداۋ جولىمەن رەسپۋبليكانىڭ وزگە قالالارىنا وتكىزۋ ماقساتىندا جۇمىس ىستەگەن. ولار قىلمىستىق ارەكەتتەرىن جۇزەگە اسىرۋدا جوعارى دەڭگەيدەگى ساقتىق شارالارىن قولدانىپ، تاراز قالاسىنداعى جالدامالى پاتەردە ءىس-قيمىلدارىن الدىن الا جوسپارلاپ، ەسىرتكىنى دايىنداۋعا ارنالعان مەكەن-جايدى بەينەباقىلاۋ ارقىلى قاشىقتان باقىلاپ وتىرعان»، - دەپ جازدى ۆەدومستۆودان.

دەپارتامەنتتىڭ قىزمەتكەرلەرى قىلمىستىق توپتى ەسىرتكىنى دايىنداۋ ساتىندە ۇستاپ، پروكۋراتۋرانىڭ قولداۋىمەن كۇدىكتىلەردىڭ بارلىعى سوتپەن قاماۋعا الىندى. قۇقىق بۇزۋشىلاردىڭ ارەكەتتەرى ق ك- ءتىڭ 297-بابى 3-بولىگى 1، 3-تارماقتارىمەن سارالانىپ، سوتقا دەيىنگى تەرگەپ-تەكسەرۋ جۇرگىزىلۋدە. اتالعان سينتەتيكالىق ەسىرتكى زاتى تاۋەلدىلىك تۋدىراتىن ءارتۇرلى حيميالىق قوسپالاردان دايىندالادى، ادام ومىرىنە اسا قاۋىپتى.