ساياسي ناۋقان ءادىل ءوتتى: ءماجىلىس سپيكەرى سايلاۋ قورىتىندىسى تۋرالى پىكىر ءبىلدىردى

استانا. قازاقپارات - ءماجىلىس ءتوراعاسى ەرلان قوشانوۆ ءماجىلىس سايلاۋىنىڭ قورىتىندىسى تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«حالىق داۋىس بەردى. بۇل ءادىل، اشىق سايلاۋ بولدى دەپ ەسەپتەيمىن. Amanat-تىڭ %53,9 داۋىس العانى لايىقتى جەڭىس دەپ ەسەپتەيمىن. ءبىز پارتيالاستارىمىزبەن بىرگە وڭىرلەردى ارالاپ، تۇكپىر-تۇكپىردەگى ەلدى مەكەندەرگە دە باردىق. ءىس جۇزىندە ءاربىر ەڭبەك ۇجىمىمەن كەزدەستىك. جەكە ءوزىم قولداۋدى سەزىندىم. ءبىز %53,9 داۋىس الدىق، بۇل - لايىقتى جەڭىس»، - دەدى ءماجىلىس ءتوراعاسى كۋلۋاردا.

سونداي-اق، سايلاۋ سايلاۋ قورىتىندىسىنا كوڭىلى تولمايتىندار تۋرالى پايىمىن ايتتى.

«قازىر ەشتەڭە ايتا المايمىن. مەن بار بولعانى Amanat پارتياسىنىڭ ءتوراعاسى عانامىن. جەڭىلگەندەردىڭ ءاردايىم كوڭىلى تولمايدى. مەن بۇكىل جەردە سونشالىق ءبىر اجيوتاج بولدى دەپ ويلامايمىن. جەڭىلىپ قالعاندار ءبىر جەردە اشۋ ءبىلدىرىپ جاتقان شىعار. بۇل ەندى تۇسىنىكتى. ەگەر جەكەلەگەن سايلاۋ ۋچاسكەلەرىندە زاڭبۇزۋشىلىق بولسا، ونىمەن پروكۋراتۋرا، باسقا ورگاندار اينالىسىپ جاتىر. ال نەگىزىنەن جالپى بۇكىل مەملەكەتىمىز بويىنشا زاڭبۇزۋشىلىق بولدى دەگەنگە كەلىسە المايمىن. جالپى سايلاۋ ءادىل، تازا ءوتتى»، - دەدى ەرلان قوشانوۆ.