قىتاي عالىمدارى ايدا سۋدىڭ جاڭا كوزىن تاپتى

استانا. قازاقپارات - عالىمدار ايدا سۋ بار ەكەنىن بۇرىننان بىلەدى. ءبىراق ولاردا ونىڭ قالاي كەلگەنى جانە قايدا ەكەندىگى تۋرالى زەرتتەۋ جۇرگىزىپ جاتىر.

قىتاي عىلىم اكادەمياسىنىڭ زەرتتەۋشىلەرى جاڭا ماقالاسىندا اي توپىراعىندا جاسىرىناتىن شىنى مونشاقتار تۋرالى جازدى.

زەرتتەۋشىلەر 2020-جىلى چانە 5 ميسسياسى كەزىندە قىتايلىق روۆەرى ايدان جيناعان تاۋ جىنىستارىنىڭ ۇلگىلەرىن زەرتتەگەننەن كەيىن وسىنداي قورىتىندىعا كەلدى. ولاردىڭ ىشىندە ءارقايسىسىندا 0,002 گرامعا دەيىن سۇيىقتىق بار 32 ۇساق تۇيىرشىكتەر تابىلدى. جەر سەرىگىندە مۇنداي بولشەكتەردىڭ ميللياردتاعان، ءتىپتى تريلليونداعان داناسى بولۋى مۇمكىن، ولار ەڭ كونسەرۆاتيۆتى باعالاۋلار بويىنشا 297,6 ميلليارد تونناعا دەيىن سۋدى ساقتايدى.

بۇل بۇرىن انىقتالماعان سۋدىڭ جاڭا كوزى. عالىمدار كىشكەنتاي تۇيىرشىكتەر مەتەوريتتەرمەن سوقتىعىسۋدىڭ ناتيجەسىندە پايدا بولادى دەپ ەسەپتەيدى. ال جەر سەرىگىنە مەتەوريتتەر ءجيى قۇلايدى. ولار كۇن جەلىندە سۋتەگى مولەكۋلالارىمەن ارەكەتتەسكەندە، ۇنەمى سۋ بولەدى، دەيدى زەرتتەۋ اۆتورلارى. جانە بۇل وتە جىلدام پروتسەسس - مۇنداي شىنى مونشاقتار بىرنەشە جىل ىشىندە سۇيىقتىقتى جينايدى.

«وسىنداي قىسقا ديففۋزيا ۋاقىتى كۇن جەلىسىنىڭ اسەرىنەن پايدا بولاتىن سۋدىڭ تەز جينالۋىن تۋدىرادى. اي بەتىنە مۇنداي سۋلار شىنى مونشاقتاردا ساقتالۋى مۇمكىن ەكەنىن كورسەتەدى»، - دەيدى زەرتتەۋدىڭ بىرلەسكەن اۆتورى، نانكين ۋنيۆەرسيتەتىنىڭ عالىمى حەتسزيۋ حۋەي.

Chang'e 5 تەن الىنعان ۇلگىلەردى تالداۋ جالعاسۋدا، سوندىقتان عالىمدار جاقىن ارادا جاڭا نارسەلەردىڭ انىقتالۋىن جوققا شىعارمايدى. ءبىراق ەڭ باستىسى، ولاردا بار دەرەكتەر باسقا جارتاستى پلانەتالاردا سۋدىڭ بولۋى تۋرالى ۇمىتتەنۋگە نەگىز بولادى.

ايتا كەتەيىك، بۇعان دەيىن NASA زەرتتەۋشىلەرى SOFIA تەلەسكوبىن پايدالانىپ ايدى باقىلاۋ كەزىندە ونىڭ كۇنگەي بەتىنەن سۋ ىزدەرىن انىقتاعان بولاتىن.

massaget.kz