قازاقستاننىڭ حالىق ءارتىسى اتاعى قالپىنا كەلتىرىلدى - ماراپات رەسپۋبليكا كۇنى بەرىلەدى

استانا. قازاقپارات - بيىل رەسپۋبليكا كۇنىندە مادەنيەت قايراتكەرلەرى «قازاقستاننىڭ حالىق ءارتىسى» اتاعىمەن ماراپاتتالادى.

بۇل تۋرالى مەملەكەت باسشىسى قاسىم-جومارت توقايەۆ VIII سايلانعان ق ر پارلامەنتىنىڭ ءبىرىنشى سەسسياسىندا ايتتى، دەپ حابارلايدى قازاقپارات ءتىلشىسى.

«تاعى ءبىر ماڭىزدى ماسەلە بار. مادەنيەت سالاسىنداعى ساياساتتى جان-جاقتى ويلاستىرىپ جۇرگىزۋ كەرەك. ءقازىر بۇل سالانى وركەندەتۋ ءۇشىن جاڭا تۇجىرىمداما جاسالىپ جاتىر. بۇل قۇجات ەلىمىزدىڭ مادەني مۇراسىن ساقتاۋ، ناسيحاتتاۋ جانە ۇلتتىق بىرەگەيلىكتى نىعايتۋ ىسىندە شەشۋشى ءرول اتقارادى دەپ سەنەمىن. شىعارماشىل زيالى قاۋىم كوپشىلىكتىڭ كوڭىلىنەن شىعاتىن، مەملەكەتتىڭ مۇددەسىنە ساي كەلەتىن تۋىندىلار ۇسىنادى دەپ ۇمىتتەنەمىن»، - دەدى قاسىم- جومارت توقايەۆ.

وسى رەتتە، پرەزيدەنت كرەاتيۆتى يندۋسترياعا جۇيەلى قولداۋ كورسەتۋ وتە ماڭىزدى ەكەنىن ايتتى.

«ادام كاپيتالىن تۇراقتى دامىتۋ جىلدام وزگەرىپ جاتقان قازىرگى الەمدە تابىستى ەل بولۋدىڭ باستى كەپىلى بولادى دەپ سانايمىن. ءبىز ۇلتتىڭ جاڭا ساپاسىن قالىپتاستىرۋ ارقىلى ادىلەتتى مەملەكەتتىڭ جانە ۇيلەسىمدى قوعامنىڭ نەگىزىن قالايمىز. مەن «قازاقستاننىڭ حالىق ءارتىسى» اتاعىن قايتا قالپىنا كەلتىرۋ تۋرالى شەشىم قابىلدادىم. بيىل قازان ايىندا - رەسپۋبليكا كۇنىندە وسى اتاققا لايىقتى مادەنيەت قايراتكەرلەرىنىڭ العاشقى توبى ماراپاتتالادى»، - دەدى مەملەكەت باسشىسى.