ۇستازدارعا قويىلاتىن تالاپ جوعارى بولۋى ءتيىس - مەملەكەت باسشىسى
بۇل تۋرالى VIII سايلانعان ق ر پارلامەنتىنىڭ ءبىرىنشى سەسسياسىنىڭ وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.
«ادام كاپيتالىنىڭ ساپاسىن بارىنشا ارتتىرۋ كەرەك. بۇل ماسەلە مەنىڭ ايرىقشا نازارىمدا ەكەنىن بىلەسىزدەر. سەبەبى، قازاقستاننىڭ باستى بايلىعى - ادام. قارىم-قابىلەتى زور، ءبىلىمدى ازاماتتار ەلىمىزدى العا باستايدى. سول ءۇشىن ءبىلىم بەرۋ جۇيەسىن جان-جاقتى دامىتۋ قاجەت. سوڭعى جىلدارى مەملەكەت بۇل سالاعا ينۆەستيسيانى ەداۋىر كوبەيتتى. بالاباقشا تاپشىلىعى بىرتىندەپ ازايىپ كەلەدى. بارلىق وبلىستا مەكتەپ سالۋ، ونى جوندەۋ جۇمىستارى قارقىندى جۇرگىزىلىپ جاتىر»، - دەدى قاسىم-جومارت توقايەۆ.
سونىمەن قاتار پرەزيدەنت وقۋ ورىندارىن ماتەريالدىق-تەحنيكالىق جابدىقتاۋ ءىسى جاندانعانىن ايتتى.
«ءبىراق، مۇنىڭ ءوزى جەتكىلىكسىز. ءبىلىم ساپاسىن، اسىرەسە، ورتا ءبىلىمنىڭ دەڭگەيىن ارتتىرۋ ءۇشىن باتىل شەشىم قابىلداۋ قاجەت. ءبىلىم بەرۋ سالاسىندا ۇستاز - ەڭ باستى تۇلعا. ونىڭ قوعامداعى ابىروي- بەدەلىن ارتتىرا بەرۋىمىز كەرەك. الايدا، مۇعالىمدەردىڭ، ديرەكتورلاردىڭ جانە پەداگوگيكالىق وقۋ ورىندارى تۇلەكتەرىنىڭ كوپشىلىگى ۇلتتىق بىلىكتىلىك ەمتيحانىنان وتە المادى. ماعان كەيبىر تاجىريبەلى ۇستازدار ءتيىستى مينيسترلىك دايىنداعان تاپسىرمالار تىم كۇردەلى دەپ شاعىمداندى. بالكىم، ونى جەڭىلدەتۋ، جەتىلدىرۋ كەرەك شىعار. بۇل سالادا قاتىپ قالعان قاتاڭ ەرەجە بولماۋى كەرەك. ءبىراق، نەگىزى، ۇستازدارعا قويىلاتىن تالاپ جوعارى بولۋعا ءتيىس»، - دەدى مەملەكەت باسشىسى.
قاسىم-جومارت توقايەۆتىڭ پايىمىنشا، مۇعالىم تاپشىلىعىن جەلەۋ ەتىپ، مەكتەپكە كەز كەلگەن ادامدى جۇمىسقا الا بەرۋگە بولمايدى.
«مۇنداي ارەكەت ۇستازداردىڭ بىلىكتىلىك دەڭگەيىن كۇرت تومەندەتەدى. سول سەبەپتى، مۇعالىم دايارلاۋ ءىسىن جەتىلدىرۋ ءۇشىن ناقتى شارالار قابىلداۋ قاجەت. بۇل - وسكەلەڭ ۇرپاقتىڭ بولاشاعىنا بايلانىستى وتە ماڭىزدى مىندەت. ءبىلىم بەرۋ جۇيەسىندەگى مەنەدجمەنتتى جاقسارتۋعا باسا ءمان بەرىلۋگە ءتيىس. وسى سالاعا ناعىز كاسىبي مامانداردى تارتۋ قاجەت. بىزدە پرەزيدەنتتىك جاستار كادر رەزەرۆى بار. ءدال سول سياقتى ءبىلىم سالاسىنا وزگەرىس اكەلەتىن 1 مىڭ مامان ارنايى دايىندىقتان وتەتىن بولادى. وسىعان وراي، ءتيىستى باعدارلاما قابىلدانادى. كادر ماسەلەسى جوعارى ءبىلىم بەرۋ جۇيەسى ءۇشىن دە وتە وزەكتى»، - دەدى مەملەكەت باسشىسى.
سونداي-اق، «مەملەكەتتىك قولداۋعا يە بولاتىن جوبالاردى ىرىكتەۋ اشىق ءوتۋى ءتيىس»، - دەدى پرەزيدەنت.
ۇكىمەت ورتا بيزنەستى دامىتۋدىڭ تىڭ تاسىلدەرىن ازىرلەۋى كەرەك. بۇل تۋرالى VIII سايلانعان ق ر پارلامەنتىنىڭ ءبىرىنشى سەسسياسىنىڭ وتىرىسىندا مەملەكەت باسشىسى قاسىم-جومارت توقايەۆ ءمالىم ەتتى، دەپ حابارلايدى قازاقپارات ءتىلشىسى.
«ەڭ باستىسى، مەملەكەتتىك قولداۋعا يە بولاتىن جوبالاردى ىرىكتەۋ اشىق وتۋگە ءتيىس. جوبانىڭ ناقتى الەۋمەتتىك- ەكونوميكالىق تيىمدىلىگىن ەسكەرۋ قاجەت»، - دەدى قاسىم-جومارت توقايەۆ.
وسى ورايدا پرەزيدەنت ۇكىمەتكە دەپۋتاتتارمەن بىرلەسىپ، ورتا بيزنەستى دامىتۋدىڭ تىڭ تاسىلدەرىن ازىرلەۋدى تاپسىردى.
«ويتكەنى، ورتا بيزنەس ەل ەكونوميكاسىن دامىتۋ ىسىندە باستى ءرول اتقارادى. بۇل ماسەلە مەنىڭ جەكە باقىلاۋىمدا بولادى»، - دەدى مەملەكەت باسشىسى.
بۇدان بۇرىن حابارلانعانداي، قاسىم-جومارت توقايەۆ پرەزيدەنت رەتىندە كاسىپكەرلەرگە مەملەكەت تاراپىنان قولداۋ كورسەتىلەتىنىنە كەپىلدىك بەرەتىنىن ايتتى.