ماجىلىسكە كوزقاراسى ءارتۇرلى ساياسي ۇستانىمداعى كۇشتەر كەلدى - پرەزيدەنت

استانا. قازاقپارات - ماجىلىسكە كوزقاراسى ءارتۇرلى ساياسي ۇستانىمداعى كۇشتەر كەلدى. بۇل تۋرالى پارلامەنت پالاتالارىنىڭ بىرلەسكەن وتىرىسىندا مەملەكەت باسشىسى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.

«سايلاۋ ناۋقانى كەزىندە كوپتەگەن ورىندى سىن، بايىپتى ۇسىنىس ايتىلدى. ءبىز ايتىلعان سالماقتى ۇسىنىستاردى مىندەتتى تۇردە زەردەلەيمىز. باسەكە جوعارى بولعاندىقتان، سايلاۋ ناتيجەسىن الدىن- الا بولجاۋ مۇمكىن ەمەس بولدى. ونىڭ قورىتىندىسى ەلىمىزدىڭ ناعىز كوپپارتيالى مەملەكەتكە اينالۋ جولىندا ماڭىزدى قادام جاساعانىن كورسەتتى. مەملەكەت باسشىسى رەتىندە ايتارىم، ماجىلىسكە كوزقاراسى ءارتۇرلى ساياسي ۇستانىمداعى كۇشتەر كەلدى دەپ ەسەپتەيمىن»، - دەدى پپەزيدەنت.

مەملەكەت باسشىسى العاش رەت ۇزاق جىل بويى وپپوزيتسيادا بولعان پارتيا پارلامەنتكە وتكەنىن دە اتاپ ءوتتى.

«ءبىز وسىنىڭ بارىنە اۋقىمدى ساياسي رەفورمانىڭ ارقاسىندا قول جەتكىزدىك. پارتيالاردى تىركەۋ ماسەلەسىن رەتتەيتىن زاڭنامانىڭ وزگەرۋى دە بۇعان سەپتىگىن تيگىزدى. ەندى پارتيالار ەلىمىزدىڭ بولاشاعىنا زور ىقپال ەتەتىن ساياسي ۇدەرىستىڭ باسى- قاسىندا جۇرەتىن بولادى. ماجىلىسكە ءبىر مانداتتى وكرۋگتەن دە دەپۋتاتتار سايلاندى. ياعني، پارلامەنتكە ءتۇرلى الەۋمەتتىك توپتان شىققان وكىلدەردىڭ كەلۋىنە جول اشىلدى. سونداي- اق، ۇزاق جىلدان بەرى العاش رەت ءوزىن- ءوزى ۇسىنعان ۇمىتكەرلەر دەپۋتات اتاندى. ءبىرقاتار ازامات پارتيا اتىنان شىققان ۇمىتكەرلەردى تارتىستى باسەكەدە جەڭىپ شىقتى. وسىلايشا، ەلىمىزدە دەموكراتيا ءداستۇرى جاڭا دەڭگەيگە كوتەرىلىپ، نىعايا ءتۇستى. ساياسي كۇشتەردىڭ بارىنە بىردەي مۇمكىندىك بەرىلەتىنىنە ازاماتتاردىڭ سەنىمى ارتتى»، - دەدى قاسىم-جومارت توقايەۆ.

سونداي-اق پرەزيدەنت، جۇرتتىڭ بارىنە جاعا بەرمەيتىن، ءبىراق ءتيىمدى شەشىمدەر قابىلداۋ كەرەك بولادى، دەدى.

ەكونوميكادا جانە الەۋمەتتىك سالادا جىلدار بويى جينالىپ قالعان تۇيتكىلدەر بار. بۇل تۋرالى VIII سايلانعان ق ر پارلامەنتىنىڭ ءبىرىنشى سەسسياسى وتىرىسىندا مەملەكەت باسشىسى قاسىم-جومارت توقايەۆ ايتتى.

«الدىمىزدا ايرىقشا ماڭىزدى مىندەتتەر تۇر. ءبىز جان-جاقتى جاڭعىرتۋ جۇمىسىن كۇشەيتۋىمىز قاجەت. سونداي- اق، الەۋمەتتىك- ەكونوميكالىق دامۋ بارىسىنا تىڭ سەرپىن بەرۋىمىز كەرەك. ەلىمىز ۇزاق ۋاقىت بويى قولايلى سىرتقى احۋالعا ارقا سۇيەپ كەلدى. نەشە ءتۇرلى تۇجىرىمدامالارعا، باعدارلامالارعا سەندى. اتقارىلعان جۇمىس تۋرالى جالعان ەسەپكە سەنۋگە ءماجبۇر بولدى. الايدا، اسا ماڭىزدى، وزەكتى ماسەلەلەر نازاردان تىس قالدى. حالىقتىڭ تۇرمىس ساپاسى ءالى كۇنگە دەيىن جاقسى ەمەس. قۇقىقتىق ادىلەتسىزدىك بەلەڭ الدى. باي مەن كەدەيدىڭ اراسى الشاقتاي ءتۇستى. الداعى بەس جىلدا ۇكىمەت جانە پارلامەنت وسى نەگىزگى ماسەلەلەردىڭ شەشىمىن تابۋى قاجەت»، - دەدى قاسىم-جومارت توقايەۆ.

«ءبىز ەلىمىزدىڭ بەلبەۋىن بەكەمدەپ تارتۋىمىز كەرەك. ەكونوميكادا جانە الەۋمەتتىك سالادا جىلدار بويى جينالىپ قالعان تۇيتكىلدەر بار. ونىڭ بارلىعىن رەتكە كەلتىرۋىمىز قاجەت. سول ءۇشىن جۇرتتىڭ بارىنە بىردەي جاعا بەرمەيتىن، ءبىراق ءتيىمدى ءارى قاجەتتى شەشىمدەر قابىلداۋ كەرەك بولادى»، - دەدى مەملەكەت باسشىسى.