ينچحون اۋەجايىندا قاشىپ كەتكەن ەكىنشى قازاقستاندىق پوليتسياعا ءوز ەركىمەن باردى
29 ناۋرىز, 13:50

ينچحون اۋەجايىندا قاشىپ كەتكەن ەكىنشى قازاقستاندىق پوليتسياعا ءوز ەركىمەن باردى

استانا. قازاقپارات - كورەيانىڭ ينچحون اۋەجايىندا قاشىپ كەتكەن ەكىنشى قازاقستاندىق پوليتسياعا ءوز ەركىمەن باردى.

بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.

«شەكارانى زاڭسىز كەسىپ وتكەنى ءۇشىن ىزدەۋدە بولعان قازاقستاننىڭ ەكىنشى ازاماتى كورەي پوليتسياسىنا ءوز ەركىمەن بەرىلدى. قازاقستان ەلشىلىگى بۇل ماسەلەنى ەرەكشە باقىلاۋدا ۇستاپ وتىر جانە وتانداستارىمىزعا قاجەتتى بارلىق كونسۋلدىق-قۇقىقتىق كومەك كورسەتەتىن بولادى، - دەپ اتاپ ءوتتى ايبەك سمادياروۆ.

بۇعان دەيىن كورەيا رەسپۋبليكاسىنا كىرۋگە رۇقسات بەرىلمەگەن قازاقستاننىڭ ەكى ازاماتى ينچحون حالىقارالىق اۋەجايىنان زاڭسىز قاشىپ كەتكەنىن جازعان ەدىك. كەيىنىرەك ولاردىڭ ءبىرىن جەرگىلىكتى پوليتسيا ۇستادى، ال ەكىنشى وتانداسىمىز ىزدەۋدە بولعان.

«بولعان وقيعا وڭتۇستىك كورەيادا قوعامدىق رەزونانس تۋدىردى جانە جەرگىلىكتى ب ا ق-تا كەڭىنەن جاريالاندى. ءوز كەزەگىندە بۇل جاعداي بولاشاقتا كورەيا رەسپۋبليكاسىنىڭ قۇقىق قورعاۋ جانە يمميگراتسيالىق ورگاندارىن اسىرەسە قازاقستان ازاماتتارىنىڭ ەلدە زاڭسىز ءجۇرىپ-تۇرۋىنا قارسى بەلسەندى كۇرەسۋىنە، سونداي-اق ءبىزدىڭ وتانداستارىمىز ءۇشىن ەلگە كىرۋ ءتارتىبىن قاتاڭداتۋعا يتەرمەلەۋى مۇمكىن»، - دەپ مالىمدەگەن ەدى سىرتقى ىستەر مينيسترلىگىنەن.

اۆتور

مارلان جيەمباي


جاڭالىقتار