قازاقستاندىقتاردىڭ بانك الدىنداعى پروبلەمالىق قارىزى قانشا

None
استانا. قازاقپارات - وتكەن جىلى بانك سەكتورىنىڭ اكتيۆتەرى 18,4 پايىز، ال كليەنت سالىمدارى 21,5 پايىز ۇلعايدى.

تولىعىراق قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ ايتىپ بەردى، دەپ حابارلايدى قازاقپارات ءتىلشىسى.

«وتكەن جىلى بانك سەكتورى كۇردەلى ماكروەكونوميكالىق جاعدايدا دامىدى. وسىعان وراي اگەنتتىكتىڭ الدىندا بانك سەكتورىنىڭ تۇراقتىلىعىن قامتاماسىز ەتۋ، سالىمشىلاردىڭ مۇددەلەرىن قورعاۋ جانە بانكتەردى قايتالاما سانكتسيا تاۋەكەلىن بارىنشا ازايتۋ مىندەتى تۇردى. ەلىمىزدەگى رەسەيدىڭ ەنشىلەس بانكتەرىنىڭ جۇمىسى تۇراقتاندىرىلدى. دەسەك تە سىن- قاتەرگە قاراماستان، بانك سەكتورى تابىستى جۇمىس ىستەپ، جاڭا جاعدايعا بەيىمدەلە ءبىلدى. وتكەن جىلى بانك سەكتورىنىڭ اكتيۆتەرى - 18,4 پايىز، ال كليەنت سالىمدارى - 21,5 پايىز ۇلعايدى»، - دەدى ولجاس قيزاتوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

سپيكەردىڭ دەرەگىنشە، بانكتەردىڭ كرەديت پورتفەلى ءبىر جىلدا 20 پايىزعا ءوستى.

«نەسيە پورتفەلىندەگى پروبلەمالىق قارىزداردىڭ ۇلەسى - 3,4 پايىز. بانكتەردىڭ رەتتەۋشى مەنشىكتى كاپيتالى 11,8 پايىز ارتتى. جالپى جۇيە بويىنشا نەگىزگى كاپيتالدىڭ جەتكىلىكتىلىك كوەففيتسيەنتى - 18,5 پايىز. S&P ماماندارى وڭىردەگى ماكروەكونوميكالىق جانە گەوساياسي تاۋەكەلدەردىڭ شيەلەنىسۋىنە قاراماستان، ەلىمىزدىڭ بانك سەكتورى وتكەن جىلى تۇراقتى بولعانىن ايتىپ وتىر»، - دەيدى ول.

سونداي-اق، قارجى نارىعىن رەتتەۋ جانە دامىتۋ اگەنتتىگى باسشىسىنىڭ ورىنباسارى وتاندىق بانك سەكتورىنىڭ سالالىق تاۋەكەلدەرى (Banking Industry Country Risk Assessment، BICRA) «9» - دان «8» - گە كەمىگەنىن ايتتى.

ودان بولەك، قىزمەتىن نەگىزىنەن قازاقستاندا جۇزەگە اسىراتىن بانكتەر رەيتينگىنىڭ بازالىق دەڭگەيى «b+» - تەن «bb-» - كە دەيىن كوتەرىلگەن.

بۇعان دەيىن بانكتەر مەن ميكروقارجى ۇيىمدارى سترەستىك اكتيۆتەردى ساتا باستايتىنى ايتىلدى.

سوڭعى جاڭالىقتار