اقىلى جولداردا اۆتوكولىك جىلدامدىعىن ولشەيتىن قۇرىلعىلار ورناتىلىپ جاتىر

None
استانا. قازاقپارات - ەلىمىزدەگى اقىلى جولداردا اۆتوكولىك جىلدامدىعىن ولشەيتىن قۇرىلعىلار ورناتىلىپ جاتىر.

بۇل تۋرالى يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى امانگەلدى بەكوۆ ايتتى، دەپ حابارلايدى قازاقپارات ءتىلشىسى.

«رەسپۋبليكالىق ماڭىزى بار جولداردىڭ بويىندا 94 ارنايى كامەرا ورناتتىق. قازىر سونىڭ 33 ءى ىسكە قوسىلدى. جول-كولىك وقيعالارىنىڭ كوبى جىلدامدىق تالاپتارىن ساقتاماۋ سالدارىنان بولادى. سوندىقتان ىشكى ىستەر مينيسترلىگىمەن بىرلەسە جولداردىڭ بويىندا ءتيىستى قۇرىلعىلاردى ورناتۋ جۇمىستارىن قولعا الدىق. استانا مەن بۋراباي ارالىعىندا وسىنداي كامەرالار ىسكە قوسىلعان. وسى ورايدا اۆتوكولىكپەن تىم قاتتى جۇرگەندەرگە ايىپپۇل سالىنىپ جاتىر»، - دەدى ا. بەكوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، اۆتوباندا ساعاتىنا 140 شاقىرىم جىلدامدىقپەن جۇرۋگە رۇقسات ەتىلگەن. الايدا كەيبىر جۇرگىزۋشىلەر ساعاتىنا 180-200 شاقىرىم جىلدامدىقپەن جۇرەدى.

«قالا ىشىندە «سەرگەك» كامەرالارى جىلدامدىقتى ولشەيتىنىن بىلەسىزدەر. وسى ورايدا ەندى رەسپۋبليكالىق جولداردا دا وسىنداي جۇيە ىسكە قوسىلىپ جاتىر»، - دەدى كوميتەت وكىلى.

ونىڭ سوزىنە قاراعاندا، الداعى ۋاقىتتا وسىنداي كامەرالاردىڭ سانى ارتادى.

«رەسپۋبليكالىق ماڭىزى بار 25 مىڭ شاقىرىم جولدىڭ 11 مىڭ شاقىرىمى اقىلى بولادى. وسى جولداردا اتالعان كامەرالاردى ىسكە قوسامىز. بۇل قۇرىلعىلار 2030-جىلعا دەيىن ورناتىلادى»، - دەدى امانگەلدى بەكوۆ.

سوڭعى جاڭالىقتار