تۇركىستان وبلىسىندا ۇشەم دۇنيەگە كەلدى

تۇركىستان. قازاقپارات - سارىاعاش اۋدانىنىڭ 35 جاستاعى تۇرعىنى ءۇش ءسابيدى دۇنيەگە الىپ كەلدى، دەپ حابارلايدى قازاقپارات ءتىلشىسى.

تۇركىستان وبلىسىنىڭ 1№ وبلىستىق پەريناتالدى ورتالىعىندا ۇشەم دۇنيەگە كەلدى. 1988-جىلعى گۇلناز ەسىمدى كەلىنشەك ءبىر ۇل، ەكى قىز بوساندى.

جاڭا تۋعان نارەستەلەرگە مارعۇلان، سافيا، سامين ەسىمدەرى بەرىلدى.

ولاردىڭ سالماعى 2260 گرام، 1570 گرام جانە 995 گرام بولدى. مەرزىمىنەن ەرتە دۇنيەگە كەلگەن ۇشەم پەريناتالدى ورتالىق دارىگەرلەرىنىڭ باقىلاۋىنا الىنعان.

قازىر بالالاردىڭ جاعدايى ءبىرقالىپتى.

ۇشەم دۇنيەگە كەلگەن وتباسىنىڭ ەكى ۇلى بار. كوپبالالى انا سۇلۋلىق سالونىندا جۇمىس ىستەيدى. ال، اكەسى - ەلەكتريك-مونتاجشى.

بۇعان دەيىن 2 بالاسى بار وتباسىنىڭ پەرزەنتتەرى وسىلايشا بىردەن بەسەۋ بولدى.