جول ساپاسىن جاقسارتۋ باعىتىندا جاڭا ءتاسىل پىسىقتالدى - كوميتەت
بۇل تۋرالى يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى امانگەلدى بەكوۆ ايتتى، دەپ حابارلايدى قازاقپارات ءتىلشىسى.
«جول جوندەۋ جۇمىستارىنىڭ ساپاسىنا جانە اۆتوجولداردىڭ بۇگىنگى جاي-كۇيىن دياگنوستيكالاۋعا باسا ءمان بەرىلىپ وتىر. رەسپۋبليكالىق جولدار بويىنشا اتقارىلعان جۇمىستار مەن ماتەريالداردىڭ ساپاسىنا جاسالعان ساراپتاما رەسپۋبليكالىق بيۋدجەت ەسەبىنەن قارجىلاندىرىلادى جانە بۇكىل جەلىنى تولىقتاي قامتيدى. بۇدان بولەك، اكىمدىكتەرمەن بىرلەسە جەرگىلىكتى ماڭىزى بار جولدار، سونداي-اق ەلدى مەكەن كوشەلەرىنە قاتىستى ساراپتاما جاساۋ ءىس-شارالارى قامتىلعان. اۆتوموبيل جولدارىنىڭ ساپاسىن جاقسارتۋ ماقساتىندا سالانى رەفورمالاۋ جولىمەن جاڭا ءتاسىل پىسىقتالدى»، - دەدى ا. بەكوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
وسى ورايدا ول زاڭناماعا ءبىرقاتار تۇزەتۋ ەنگىزىلگەنىن ەسكە سالدى. ماسەلەن، ۇلتتىق ساپا ورتالىعىنا ەلدى مەكەن كوشەلەرىن جوندەۋگە قاتىستى ۆەدومستۆولىق ساراپتاما جۇرگىزۋ وكىلەتتىگى بەرىلدى. ويتكەنى تۇرعىندار شاعىمدارىنىڭ باسىم بولىگى ەلدى مەكەن كوشەلەرىندەگى جولدارىندا جۇرگىزىلگەن جوندەۋ ساپاسىنا قاتىستى بولىپ وتىر.
بۇدان بۇرىن حابارلانعانداي، 2023-جىلدىڭ قورىتىندىسى بويىنشا نورماتيۆتىك جاعدايداعى جولداردىڭ ۇلەسى رەسپۋبليكالىق جەلى بويىنشا 92 پايىزعا جانە جەرگىلىكتى جەلى بويىنشا 87 پايىزعا دەيىن جەتكىزىلمەك.
جىل اياعىنا دەيىن «ورتالىق - وڭتۇستىك» ءدالىزى بويىنشا جول ۋچاسكەلەرى اشىلادى.
جول بويىنداعى قىزمەت كورسەتۋ نىساندارىن سالۋعا جەر بەرۋ ءراسىمى جەڭىلدەتىلەدى.