بانكتەر مەن ميكروقارجى ۇيىمدارى سترەستىك اكتيۆتەردى ساتا باستايدى
بۇگىندە پلاتفورمانى قۇرۋدىڭ گيبريدتى مودەلى انىقتالدى. بۇل تۋرالى قارجى نارىعىن رەتتەۋ جانە دامىتۋ اگەنتتىگى ءتوراعاسىنىڭ ورىنباسارى ولجاس قيزاتوۆ ءمالىم ەتتى، دەپ حابارلايدى قازاقپارات ءتىلشىسى.
«سترەستىك اكتيۆتەر نارىعىن ودان ءارى دامىتۋ ءۇشىن ءبىزدىڭ اگەنتتىك سيفرلىق پلاتفورما قۇرۋ باستاماسىن قولعا الدى. اككرەديتتەۋ مەن قويىلاتىن تالاپتاردى قاناعاتتاندىرۋ ءۇشىن ءبىرىڭعاي پلاتفورمانىڭ گيبريدتى مودەلى انىقتالدى. بيىل جىل سوڭىنا دەيىن بانكتەر مەن ميكروقارجى ۇيىمدارىنىڭ سيفرلىق پلاتفورمادا سترەستىك اكتيۆتەردى مىندەتتى تۇردە ساتۋى تۋرالى زاڭناماعا تۇزەتۋلەر ەنگىزۋ جوسپارلانىپ وتىر»، - دەدى ولجاس قيزاتوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، زاڭعا وزگەرىستەر ەنگىزۋ ارقىلى اگەنتتىككە سترەسس اكتيۆتەردى سيفرلىق پلاتفورما ارقىلى ساتۋ بويىنشا ءبىرىڭعاي تالاپتاردى بەلگىلەۋ وكىلەتتىگى بەرىلمەك.
«ءبىرىڭعاي تالاپتاردىڭ تىزبەسى «اشىق» نورماتيۆتىك-قۇقىقتىق اكتىلەر دەڭگەيىندە بەكىتىلەدى. بەكىتىلگەننەن كەيىن ونى سيفرلىق پلاتفورمالارعا سايكەستەندىرۋ ءۇشىن بەلگىلى ءبىر ۋاقىت قاجەت»، - دەيدى ول.