الماتىدا دوسىن ءولتىردى دەپ ايىپتالعان جاس ءوسپىرىم سوتتا اقتالىپ شىقتى

الماتى. قازاقپارات - الماتى قالاسىنىڭ مامانداندىرىلعان اۋدانارالىق سوتىندا دوسىن ءولتىرىپ، اقشاسىن ۇرلادى دەپ ايىپتالعان جاس وسپىرىمگە قاتىستى قىلمىستىق ءىس قارالدى، دەپ حابارلايدى قازاقپارات ءتىلشىسى.

الماتى قالالىق سوتى تاراتقان مالىمەتكە سايكەس، كامەلەتكە تولماعان سوتتالۋشى ر. دوسى س- مەن كەزدەسىپ، ارالارىندا قارىزعا بايلانىستى جانجال تۋىنداپ، سوڭى توبەلەسكە ۇلاسقان.

سوتتالۋشى ر. دوسى س- نى اياق كيىمىنىڭ باۋىمەن تۇنشىقتىرىپ ءولتىرىپ، ونىڭ بانك كارتاسىن ۇرلاپ، دۇكەندە 28 مىڭ تەڭگەسىن جۇمسادى دەپ ايىپتالدى.

سوتتا پروكۋرور مەن جابىرلەنۋشىلەر ايىپتاۋدى تولىق قولداپ، ر- نى 12 جىلعا باس بوستاندىعىنان ايىرۋدى سۇرادى.

ايىپتاۋشى تاراپ ايعاق رەتىندە قاماۋعا الىنعاننان كەيىن سوتتالۋشىنىڭ كىناسىن مويىنداعانىن، قىلمىس قۇرالى - سوتتالۋشىنىڭ د ن ق ءىزى تابىلعان جابىرلەنۋشىنىڭ كروسسوۆكاسىنان شىلتەر، جابىرلەنۋشىنىڭ تولەم كارتاسىنداعى سوتتالۋشىنىڭ ساتىپ العان زاتتارى تۋرالى مالىمەتتەر جانە باسقا دا قۇجاتتاردى ۇسىندى.

سوتتالۋشى ءوز كىناسىن تولىق مويىنداماي، كىسى ءولتىرۋ كەزىندە جابىرلەنۋشىنىڭ قوعامدىق ورىندا بولعانىن، ونى ءارتۇرلى ادامدار كورگەن دەگەن نۇسقانى العا تارتتى.

سوتتا كۋاگەرلەر سوتتالۋشىنىڭ ولارمەن بىرگە ويىن الاڭىندا بولعانىن راستادى.

جابىرلەنۋشىنىڭ سوتتالۋشىعا بانك كارتاسىن ودان بۇرىن تاپسىرعانىن دا انىقتادى.

سوتقا دەيىنگى تەرگەۋ بارىسىندا سوتتالۋشى ر. ءوز كىناسىن مويىنداۋدان باس تارتىپ، تەكسەرۋدە بۇل فاكتى راستامالعانىمەن، وعان فيزيكالىق قىسىم جاسالعانىن ءتۇسىندىردى.

«القابيلەر جاسىرىن داۋىس بەرۋ قورىتىندىسى بويىنشا ر- نى كىسى ءولتىرۋ جانە ۇرلىق جاساعانى ءۇشىن كىنالى ەمەس دەپ تانىپ، قىلمىس جاساۋعا قاتىسقانى تۋرالى ايعاقتاردىڭ جوقتىعى ءۇشىن اقتادى. ۇكىم زاڭدى كۇشىنە ەنگەن جوق»، - دەپ حابارلادى قالالىق سوت.