بيىل «تالدىقورعان-وسكەمەن» جولىنىڭ جوندەۋدەن وتكەن بولىكتەرى تولىق اشىلادى

استانا. قازاقپارات - «اقتوبە - اتىراۋ - استراحان» ءدالىزىن دامىتۋ ءىس-شارالارى جالعاسادى.

بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتى ءتوراعاسىنىڭ ورىنباسارى امانگەلدى بەكوۆ ءمالىم ەتتى، دەپ حابارلايدى قازاقپارات ءتىلشىسى.

«ەلىمىزدىڭ وڭتۇستىك-شىعىس وڭىرىندە «تالدىقورعان-وسكەمەن» (768 ك م) اۆتوموبيل جولىن رەكونسترۋكتسيالاۋ قارقىندى ءجۇرىپ جاتىر. بۇگىنگى تاڭدا جولدىڭ 649 شاقىرىمىندا كولىك قوزعالىسى اشىلعان»، - دەدى ا. بەكوۆ ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، 2023-جىلى اتالعان جولدىڭ ۋچاسكەلەرىن تولىق اشۋ جوسپارلانىپ وتىر. جوبانى تولىق اياقتاۋ 2024-جىلعا بەلگىلەنگەن.

سونىمەن قاتار كوميتەت باسشىسى ەلىمىزدىڭ باتىسىندا «اقتوبە - اتىراۋ - استراحان» ءدالىزىن (819 ك م) دامىتۋ ءىس-شارالارى جالعاسىپ جاتقانىن ايتتى.

«بيىل «قاندىاعاش- ماقات-اتىراۋ» (440 ك م) ۋچاسكەسىن اياقتايمىز، ول بويىنشا كولىك قوزعالىسى تولىعىمەن اشىق. سونداي-اق، «اقتوبە-قاندىاعاش» ۋچاسكەلەرى بويىنشا قايتا جاڭارتۋدى جالعاستىرامىز»، - دەدى ول.

بۇدان بۇرىن حابارلانعانداي، 2023-جىلدىڭ قورىتىندىسى بويىنشا نورماتيۆتىك جاعدايداعى جولداردىڭ ۇلەسى رەسپۋبليكالىق جەلى بويىنشا 92 پايىزعا جانە جەرگىلىكتى جەلى بويىنشا 87 پايىزعا دەيىن جەتكىزىلمەك.

جىل اياعىنا دەيىن «ورتالىق - وڭتۇستىك» ءدالىزى بويىنشا جول ۋچاسكەلەرى اشىلادى.