وڭتۇستىك كورەياعا زاڭسىز كىرىپ كەتكەن ەكى قازاقستاندىق ازاماتتىڭ بىرەۋى تابىلماي جاتىر
بۇگىندە بىرەۋى ۇستالىپ، ەكىنشىسى ىزدەستىرىلىپ جاتىر.
بۇل تۋرالى سىرتقى ىستەر مينيسترلىگىنىڭ رەسمي وكىلى ايبەك سمادياروۆ ءمالىم ەتتى، دەپ حابارلايدى قازاقپارات ءتىلشىسى.
«كورەيا رەسپۋبليكاسىنا كىرۋگە رۇقسات بەرىلمەگەن قازاقستاننىڭ ەكى ازاماتى ينچحون حالىقارالىق اۋەجايىنان زاڭسىز قاشىپ كەتتى. كەيىنىرەك ولاردىڭ ءبىرىن جەرگىلىكتى پوليتسيا ۇستادى، ال ەكىنشى وتانداسىمىز ىزدەۋدە. اتالعان ازاماتتار وڭتۇستىك كورەياعا 24- ناۋرىزدا تاشكەنت قالاسىنان «Koreana» اۋەكومپانياسىنىڭ رەيسىمەن كەلىپ، دەپورتاتسيالىق رەيستى كۇتىپ وتىرعان. سودان كەيىن اۋەجايدان رۇقساتسىز شىعىپ كەتىپ قالعان»، - دەدى ايبەك سمادياروۆ.
رەسمي اقپاراتتا ايتىلعانداي، قازاقستاننىڭ سەۋل قالاسىنداعى ەلشىلىگى وسى ماسەلە بويىنشا كورەيا رەسپۋبليكاسىنىڭ ۋاكىلەتتى ورگاندارىمەن تۇراقتى بايلانىستا.
«بولعان وقيعا وڭتۇستىك كورەيادا قوعامدىق رەزونانس تۋدىردى جانە جەرگىلىكتى ب ا ق- تا كەڭىنەن جاريالاندى. ءوز كەزەگىندە بۇل جاعداي بولاشاقتا كورەيا رەسپۋبليكاسىنىڭ قۇقىق قورعاۋ جانە يمميگراتسيالىق ورگاندارىن اسىرەسە قازاقستان ازاماتتارىنىڭ ەلدە زاڭسىز ءجۇرىپ-تۇرۋىنا قارسى بەلسەندى كۇرەسۋىنە، سونداي-اق ءبىزدىڭ وتانداستارىمىز ءۇشىن ەلگە كىرۋ ءتارتىبىن قاتاڭداتۋعا يتەرمەلەۋى مۇمكىن»، - دەيدى ۆەدومستۆودان.