اقتاۋدا ءۇش بالاسىن ولتىرگەن ەر ادام تۋرالى تىڭ دەرەك شىقتى
بۇل تۋرالى جاقىندا سايلانعان ءماسليحات دەپۋتاتى جانە «ماڭعىستاۋ-مەديا» مەدياحولدينگىنىڭ ديرەكتورى گۇلميرا ابىشەۆا Instagram-پاراقشاسىندا جازدى.
«تانيتىندار وزگە اعىمنىڭ جەتەگىندە كەتكەن جىگىت دەپ جازىپتى. يسلام دىنىندە ادام تۇرماق، قۇمىرسقاعا قيانات جاساۋعا بولمايدى. وسى ورايدا ءبىلىم جانە قۇقىق قورعاۋ ورگاندارى باس بولىپ، قوعامدىق ۇيىمدار قوسشى بولىپ بىرلەسىپ، وزگە اعىمداعى ازاماتتاردىڭ ءتىزىمىن جاساقتاپ، بالالارىن قاداعالاعان ءجون-اۋ. بالالاردان ساۋالناما الىپ، باقىلاۋدى قولعا السا دەگەن ۇسىنىسىم بار. قالاي بولعاندا دا، بالالاردىڭ تاعدىرىنا اتا-انا جاۋاپتى. اسىرەسە انا! ايەلدەر مىقتى بولۋىمىز كەرەك. وتباسىنداعى زورلىق-زومبىلىقتىڭ ۇشقىنى پايدا بولعان كەزدە دابىل قاقساق، مۇمكىن قايعىلى جاعدايلاردىڭ الدىن الارمىز»، - دەپ جازدى ابىشەۆا.
ونىڭ سوزىنشە، بەيرەسمي دەرەكتەر بويىنشا، ەرلى-زايىپتىلار اجىراسىپ كەتكەن. اكەسى دەمالىستا بالالارىن ءوز ۇيىنە الىپ كەتكەن ەكەن.
ەسكە سالايىق، 24- ناۋرىزدا اقتاۋدا ءۇش بالاسىن ءولتىردى دەگەن كۇدىكپەن ولاردىڭ اكەسى ۇستالعان بولاتىن. اقتاۋداعى 27-شاعىناۋداندا ورنالاسقان پاتەردەن زورلىقپەن ءولىم بەلگىلەرى بار كۇيىندە جاس وسپىرىمدەر تابىلعان. 2011، 2014 جانە 2016-جىلى تۋعان كامەلەتكە تولماعانداردى ءولتىردى دەگەن كۇدىك بويىنشا پوليتسيا قىزمەتكەرلەرى 36 جاستاعى اكەسىن ۇستادى.
ارتىنشا كۇدىكتىنىڭ سۋرەتى تاراعان ەدى.