قازاقستاندا بالا كۇتىمى بويىنشا جاردەماقى الاتىنداردىڭ زەينەتاقى جارنالارى سۋبسيديالانادى

استانا. قازاقپارات - «اشىق ۇكىمەت» پورتالى ءبىر جارىم جاسقا تولعانشا بالا كۇتىمىنە بايلانىستى تابىسىنان ايرىلعان جاعدايدا تولەنەتىن الەۋمەتتىك تولەم الۋشىلارعا مىندەتتى زەينەتاقى جارنالارىن سۋبسيديالاۋ قاعيدالارىن بەكىتۋ تۋرالى بۇيرىق جوباسىن جاريالادى، دەپ حابارلايدى قازاقپارات ءتىلشىسى.

بۇل جوبا بويىنشا قوعامدىق تالقىلاۋ 7- ساۋىرگە دەيىن جۇرگىزىلەدى.

ءبىرىڭعاي جيناقتاۋشى زەينەتاقى قورىنا مىندەتتى زەينەتاقى جارنالارىن سۋبسيديالاۋ بيۋجەت قاراجاتى ەسەبىنەن جۇزەگە اسىرىلادى.

«اي سايىنعى بيۋجەت سۋبسيدياسىنىڭ مولشەرى الەۋمەتتىك اۋدارىمداردى ەسەپتەۋ وبەكتىسى رەتىندە ەسكەرىلگەن ورتاشا ايلىق تابىس مولشەرىنەن ەسەپتەلگەن مىندەتتى زەينەتاقى جارنالارى مەن قوردان ءبىر جاسقا تولعانشا بالا كۇتىمىنە بايلانىستى تابىسىنان ايىرىلعاندا تولەنەتىن الەۋمەتتىك تولەمنەن ۇستالاتىن مىندەتتى زەينەتاقى جارنالارى اراسىنداعى ايىرما رەتىندە ايقىندالادى.

ەگەر بالا كۇتىمىنە تولەنەتىن الەۋمەتتىك تولەمدەردەن ۇستالاتىن مىندەتتى زەينەتاقى جارنالارى الەۋمەتتىك اۋدارىمداردى ەسەپتەۋ وبەكتىسى رەتىندە ەسكەرىلگەن ورتاشا ايلىق تابىستىڭ 10 پايىزىنان اساتىن بولسا، مىندەتتى زەينەتاقى جارنالارىن بيۋجەت قاراجاتى ەسەبىنەن سۋبسيديالاۋ جۇرگىزىلمەيدى»، - دەپ جازىلعان قۇجاتتا.

مىندەتتى زەينەتاقى جارنالارىن سۋبسيديالاۋ بالانىڭ تۋۋ تۋرالى كۋالىگىندە كورسەتىلگەن تۋعان كۇنىنەن باستاپ، ال بالانى (بالالاردى) اسىراپ العان جانە اتا-اناسىنىڭ قامقورلىعىنسىز قالعان ءبىر جارىم جاسقا دەيىنگى بالاعا قامقورشىلىق تاعايىندالعان جاعدايلاردا - اسىراپ الۋ تۋرالى سوت شەشىمى زاڭدى كۇشىنە ەنگەن كۇنىنەن باستاپ نەمەسە قورعانشى تاعايىندالعان كۇنىنەن باستاپ بالا ءبىر جاسقا تولعان كۇندى قوسا العان كۇنگە دەيىن نە قامقورشى الەۋمەتتىك كودەكستىڭ 207-بابىنىڭ 1-تارماعىندا كوزدەلگەن زەينەتكەرلىك جاسقا جەتكەنشە جۇرگىزىلەدى.

مىندەتتى زەينەتاقى جارنالارىنىڭ اي سايىنعى بيۋجەتتىك سۋبسيدياسىن بەلگىلەۋ كەزەڭىندە كەلەسى جاڭا تۋعان بالانى (بالالاردى) اسىراپ العان جاعدايدا، بيۋجەت قاراجاتىنان مىندەتتى زەينەتاقى جارنالارىن سۋبسيديالاۋ الدىڭعى بالا ءبىر جارىم جاسقا تولعان كۇننەن كەيىن جۇرگىزىلەدى.

مەملەكەتتىك كورپوراتسيانىڭ فيليالى مىندەتتى زەينەتاقى جارنالارىنىڭ بيۋجەتتىك سۋبسيدياسىنىڭ مولشەرىن بەلگىلەۋ تۋرالى شەشىم ەلەكتروندىق جوباسىن ەكى جۇمىس كۇنى ىشىندە قارايدى، راسىمدەلۋ دۇرىستىعىن تەكسەرەدى، سودان كەيىن ولاردى ۋاكىلەتتى ورگانعا جىبەرەدى.

مىندەتتى زەينەتاقى جارنالارىنىڭ بيۋجەتتىك سۋبسيدياسىنىڭ مولشەرىن بەلگىلەۋ (بەلگىلەۋدەن باس تارتۋ) تۋرالى شەشىم باسقارما مامانىنىڭ، باسشىسىنىڭ جانە ۋاكىلەتتى ورگان باسشىسىنىڭ ە ت س ق- سى ارقىلى كۋالاندىرىلعان ەلەكتروندىق-سيفرلىق نىسانداعى قۇجاتتى بىلدىرەدى. مىندەتتى زەينەتاقى جارنالارىنىڭ بيۋدجەتتىك سۋبسيدياسىنىڭ مولشەرىن بەلگىلەۋ (بەلگىلەۋدەن باس تارتۋ) تۋرالى شەشىمنىڭ ءنومىرى مەن كۇنى اۆتوماتتى رەجيمدە بەرىلەدى.

سونىمەن بىرگە، قۇجاتتا سۋبسيديالاۋعا جاتاتىن مىندەتتى زەينەتاقى جارنالارىن اۋدارۋ قانداي جاعدايدا توقتاتىلاتىنى جازىلعان:

1) بالا ءبىر جارىم جاسقا تولعانشا تابىسىنان ايىرىلعان جاعدايدا تولەنەتىن الەۋمەتتىك تولەم كودەكستىڭ 86-بابىنىڭ

4-تارماعىنا سايكەس توقتاتىلعاندا؛

2) بالا ءبىر جارىم جاسقا تولعان سوڭ تابىسىنان ايىرىلۋ بويىنشا الەۋمەتتىك تولەمدەردەن ۇستالاتىن مىندەتتى زەينەتاقى جارنالارىنىڭ مولشەرى الەۋمەتتىك اۋدارىمداردى ەسەپتەۋ وبەكتىسى رەتىندە ەسكەرىلگەن ورتاشا ايلىق تابىستىڭ ون پايىزىنان اساتىن بولسا؛

3) كودەكستىڭ 72-بابىنىڭ 2-تارماعىنا سايكەس، ۋاكىلەتتى مەملەكەتتىك ورگان بەكىتەتىن الەۋمەتتىك تولەمدەر مولشەرىن ەسەپتەۋ، مەملەكەتتىك الەۋمەتتىك ساقتاندىرۋ قورىنان تولەنەتىن الەۋمەتتىك تولەمدەردى تاعايىنداۋ، قايتا ەسەپتەۋ، توقتاتا تۇرۋ، قايتا باستاۋ، توقتاتۋ جانە جۇزەگە اسىرۋ قاعيدالارىنا سايكەس مەملەكەتتىك الەۋمەتتىك ساقتاندىرۋ قورىنان بالا ءبىر جارىم جاسقا تولعانشا تابىسىنان ايىرىلعان جاعدايدا تولەنەتىن الەۋمەتتىك تولەمدى توقتاتۋ تۋرالى مالىمەتتەر كەلىپ تۇسكەن جاعدايلاردا توقتاتىلادى.

4) بالا (بالالار) قايتىس بولعان جاعدايدا ءبىر اي وتكەن سوڭ؛

5) ق ر نەكە-وتباسى زاڭناماسىندا بەلگىلەنگەن جاعدايلاردا بالا اسىراپ الۋ تۋرالى شەشىمدەر جارامسىز دەپ تانىلعان نەمەسە كۇشى جويىلعانىنا ءبىر اي وتكەن سوڭ؛

6) الۋشىنىڭ بالا كۇتىمىنە بايلانىستى الەۋمەتتىك تولەمدى توقتاتۋعا ءوتىنىش بەرۋىنە بايلانىستى توقتاتىلادى. بۇل رەتتە بالا كۇتىمىنە بايلانىستى الەۋمەتتىك تولەم ءوتىنىش بەرىلگەن ايدان كەيىنگى ايدىڭ ءبىرىنشى كۇنىندە توقتاتىلادى؛

7) الۋشىنىڭ بالا كۇتىمىنە بايلانىستى الەۋمەتتىك تولەم تاعايىنداۋ تۋرالى شەشىم قابىلداۋعا نەگىز بولعان انىق ەمەس قۇجاتتاردى (مالىمەتتەردى) ۇسىنۋىنا بايلانىستى توقتاتىلادى. بۇل رەتتە بالا كۇتىمىنە بايلانىستى الەۋمەتتىك تولەم تاعايىندالعان كۇننەن باستاپ توقتاتىلادى.

وسى بۇيرىق 2023-جىلعى 1- شىلدەدەن باستاپ قولدانىسقا ەنگىزىلەدى جانە رەسمي جاريالانۋعا ءتيىس.