پرەزيدەنت ق ح ر شينجاڭ ولكەسىنىڭ باسشىسى ما شيڭرۋيدى قابىلدادى

استانا. قازاقپارات - پرەزيدەنت ق ح ر شينجاڭ- ۇيعىر اۆتونوميالىق اۋدانى ق ك پ پارتيا كوميتەتىنىڭ حاتشىسى ما شيڭرۋيدى قابىلدادى، دەپ حابارلايدى قازاقپارات.

مەملەكەت باسشىسى قاسىم-جومارت توقايەۆ ق ك پ وك ساياسي بيۋروسىنىڭ مۇشەسى، ق ح ر شينجاڭ- ۇيعىر اۆتونوميالىق اۋدانى ق ك پ پارتيا كوميتەتىنىڭ حاتشىسى ما شيڭرۋيدى قابىلدادى.

اڭگىمەلەسۋ بارىسىندا ءوڭىرارالىق ىنتىماقتاستىقتى دامىتۋ ماسەلەسىنە نازار اۋدارىلدى. قازاقستان شينجاڭ ولكەسىمەن ونەركاسىپ، كولىك، لوگيستيكا، اۋىل شارۋاشىلىعى جانە تۋريزم سەكىلدى كوپتەگەن باعىت بويىنشا تابىستى قارىم- قاتىناس جاساپ وتىر.

قاسىم-جومارت توقايەۆ قازاقستان قىتايمەن ستراتەگيالىق سەرىكتەستىك پەن ماڭگىلىك دوستىق رۋحىندا جان- جاقتى ىنتىماقتاستىقتى تەرەڭدەتۋگە باسا ءمان بەرەتىنىن ايتتى. مەملەكەت باسشىسى ەكى ەل اراسىندا بارلىق دەڭگەيدە بەلسەندى ءارى سەنىمدى ساياسي ديالوگ قالىپتاسقانىنا توقتالىپ، ق ح ر- دى قازاقستاننىڭ باستى ساۋدا سەرىكتەستەرىنىڭ ءبىرى رەتىندە اتاپ ءوتتى.

«قىتاي حالىق رەسپۋبليكاسىنىڭ ءتوراعاسى شي جينپيڭ مىرزانىڭ بىلتىر قازان ايىندا قازاقستانعا جاساعان ساپارى وتە ءساتتى بولعانىن ايتقىم كەلەدى. بۇل covid پاندەمياسى سالدارىنان بولعان ۇزاق ۇزىلىستەن كەيىنگى ءبىرىنشى ساپار ەكەنىن اتاپ وتتىك. ءبىز وتە ماڭىزدى كەلىسىمدەرگە قول جەتكىزدىك. ەكى ەلدىڭ ۇكىمەتتەرى مەن ءتيىستى ايماق باسشىلارىنا ەڭ جوعارى دەڭگەيدە قول جەتكىزگەن ۋاعدالاستىقتاردى تابىستى جۇزەگە اسىرۋ مىندەتى جۇكتەلدى»، - دەدى پرەزيدەنت.

ما شيڭرۋي قوناقجايلىق كورسەتكەنى ءۇشىن قاسىم-جومارت توقايەۆقا العىس ايتىپ، ق ح ر ءتوراعاسى شي جينپيڭنىڭ سالەمىن جەتكىزدى.

«مەنىڭ ساپارىمنىڭ نەگىزگى ماقساتى – ق ح ر ءتوراعاسى شي جينپيڭ مەن ءسىزدىڭ اراڭىزداعى ماڭىزدى ستراتەگيالىق كەلىسىمدەردى جۇزەگە اسىرۋ. ءبىز قىتايدىڭ ءبىر ولكەسى رەتىندە ەلىمىزدىڭ باتىسىنداعى مەملەكەتتەرمەن قارىم- قاتىناستاردى نىعايتۋعا جاۋاپتىمىز. قازاقستان - ءبىز ءۇشىن ءوزارا ىنتىماقتاستىقتىڭ باسىم باعىتى. جالپى، قىتاي مەن قازاقستاننىڭ ىنتىماقتاستىعى شينجاڭ ارقىلى جۇزەگە اسىرىلادى، - دەدى ما شيڭرۋي.

كەزدەسۋ سوڭىندا پرەزيدەنت شينجاڭ باسشىسىنىڭ قازاقستانعا ساپارى ءوڭىرارالىق بايلانىستى تەرەڭدەتىپ، ونىڭ باعىت- باعدارىن ناقتىلاي تۇسۋگە تىڭ سەرپىن بەرەتىنىنە نازار اۋداردى.

قاسىم-جومارت توقايەۆ شي جينپيڭنىڭ ق ح ر ءتوراعاسى بولىپ قايتا سايلانۋىنا بايلانىستى وعان ىزگى تىلەگىن جولداپ، ساتتىلىك تىلەدى.