گوندۋراس قىتاي حالىق رەسپۋبليكاسىن عانا زاڭدى بيلىك دەپ مويىندادى
بۇعان دەيىن گوندۋراس پرەزيدەنتى سيومارا كاسترو بەيجىڭمەن بايلانىس ورناتۋعا دايىن ەكەنىن ايتقان بولاتىن. ىزىنشە تاراپتار ديپلوماتيالىق قاتىناس ورناتتى. ەكىجاقتى بايلانىس تۋرالى كەلىسىم بەكىتىلدى. ال مۇنان كەيىن تايۆاننىڭ سىرتقى ساياسات باسقارماسى گوندۋراسپەن ديپلوماتيالىق قاتىناسىن ءۇزىپ، بۇل ەلدە ەلشىلىگىنىڭ جابىلاتىنىن ءمالىم ەتتى.
گوندۋراس رەسپۋبليكاسى - ورتالىق امەريكاداعى مەملەكەت. 2010 -جىلعى حالىق ساناعى بويىنشا بۇل ەلدىڭ تۇرعىندارى 8 ميلليون ادامدى قۇرادى. حالىقتىڭ ەتنوستىق قۇرامى نەگىزىنەن مەتيستەر - 90 پايىز، ۇندىستەر 7 پايىز، نەگرلەر مەن مۋلاتتار 1,2 پايىز، اق ناسىلدىلەر 1 پايىزدى قۇرايدى. مەملەكەتتەگى نەگىزگى ءتىل - يسپان ءتىلى، سونىمەن بىرگە، جەر- جەرلەردە جەرگىلىكتى ۇندىستەردىڭ تىلدەرى قولدانىلادى. ءدىن ۇستانىمىنا كەلەتىن بولساق، حالىقتىڭ 56 پايىزى اتەيستەر، 42 پايىزى كاتوليكتەر، 2 پايىزى پروتەستانتتار بولىپ تابىلادى. مەملەكەتتىڭ استاناسى - تەگۋسيگالپا قالاسىندا 1 ميلليون 600 مىڭنان استام ادام تۇرادى.
1821 -جىلى 11- قىركۇيەكتە گوندۋراس ءوزىنىڭ ازاتتىعىن جاريالادى. 1823 -جىلى گوندۋراس ورتالىق امەريكانىڭ بىرىككەن پروۆينتسيالارىنىڭ قۇرامىنا كىردى. وسىدان باستاپ بۇل ەلدە ۇزاققا سوزىلعان ازامات سوعىسى باستالدى. ماسەلەن، تەك 1845 -جىلمەن 1876 -جىلدىڭ ارالىعىندا عانا گوندۋراستا 12 ازامات سوعىسى بولعان ەكەن. تەك 1981 -جىلعى قاراشا ايىنان باستاپ گوندۋراستا ازاماتتىق بيلىك جۇرگىزىلۋدە. الايدا، ەلدىڭ ساياساتىنداعى اسكەريلەردىڭ ىقپالى ءالى دە بولسا اسا زور.
1982 -جىلى قابىلدانعان كونستيتۋتسيا بويىنشا گوندۋراس - ۋنيتارلىق پرەزيدەنتتىك رەسپۋبليكا بولىپ تابىلادى. اتقارۋشى بيلىك 4 جىل مەرزىمگە جالپى حالىق سايلايتىن پرەزيدەنتتىڭ يەلىگىندە. جالپى، لاتىن امەريكاسى بويىنشا گوندۋراس رەسپۋبليكاسىنىڭ ەكونوميكاسى ناشار دامىعان. 2009 -جىلعى دەرەك بويىنشا گوندۋراس ەلىنىڭ ءى ج ءو- ءسى 33,1 ميلليارد دوللاردى قۇرادى. اۋىل شارۋاشىلىعى نەگىزىنەن كۇرىش، جۇگەرى داقىلدارىن ءوسىرىپ، مال شارۋاشىلىعىمەن اينالىسادى. ونەركاسىبىنە كەلەتىن بولساق، مۇندا نەگىزىنەن كەن بايىتۋ ونەركاسىبى دامىعان. مۇندا قورعاسىن جانە مىرىش كونتسەنتراتتارىن شىعاراتىن بىرنەشە كاسىپورىن جۇمىس ىستەيدى. كاريب تەڭىزىنىڭ جاعالاۋىندا مۇناي كەنىشىن اشۋ ماقساتىنداعى زەرتتەۋ جۇمىستارى كوپ جىلداردان بەرى جۇرگىزىلىپ كەلەدى.