سۋ دوبى: قازاقستان ايەلدەر قۇراماسى ازيا چەمپيونى اتاندى

استانا. قازاقپارات - سينگاپۋردە ءوتىپ جاتقان سۋ دوبىنان ازيا بىرىنشىلىگىندە قازاقستان ايەلدەر قۇراماسى ءبىر تۋر بۇرىن چەمپيون اتاندى، دەپ حابارلايدى قازاقپارات ءتىلشىسى.

قازاقستاندىق سپورتشىلار قاتارىنان بەس كەزدەسۋدە جەڭىسكە جەتتى. توپتىق كەزەڭدە قۇرامالار ءاربىر قارسىلاسىمەن ەكى ويىن وتكىزدى. ناتيجەسىندە ولار سينگاپۋردى 12:7، 13:2، تايلاندتى 16:10، 13:8 ەسەبىمەن جەڭدى. سونداي- اق ولار وزبەكستاندى 11:9 ەسەبىمەن جەڭسە، تاعى ءبىر كەزدەسۋى ەرتەڭ، 27- ناۋرىزدا وتكىزۋى كەرەك ەدى. الايدا قازاقستاندىق سپورتشىلار 15 ۇپاي جيناپ، باس جۇلدە تاعدىرىن بۇرىن شەشىپ قويدى.

ەكىنشى جانە ءۇشىنشى ورىندا تۇرعان وزبەكستان مەن تايلاندتىڭ ەنشىسىندە التى ۇپايدان بار. ولار التىنشى تۋردا جەڭىسكە جەتكەنىمەن قازاقستاندىق قۇرامانى قۋىپ جەتە المايدى.

ال ەلىمىزدىڭ ەرلەر قۇراماسى بۇگىن جارتىلاي فينالدا قىتايعا 1:10 ەسەبىمەن جول بەردى.

ەندى ولار 27 -ناۋرىزدا قولا جۇلدەگە تايلاندپەن كۇش سىناسادى.

قازاقستاندىق سپورتشىلار توپتىق كەزەڭدە فيليپپيندى 19:6، گونكونگتى 22:7 ەسەبىمەن جەڭسە، يرانعا 14:15 ەسەبىمەن ەسە جىبەردى. ال شيرەك فينالدا سينگاپۋردى 10:7 ەسەبىمەن تىزە بۇكتىرگەن ەدى.

اۆتور

ءادىلجان ۇمبەت