فۋتبولدان قازاقستان مەن دانيانىڭ باس باپكەرلەرى كەشەگى ويىنعا باعا بەردى
ايتا كەتسەك، قازاقستاندىق فۋتبولشىلار ەلوردادا دانيادان 3:2 ەسەبىمەن باسىم ءتۇستى.
كەزدەسۋدە ەل قۇراماسىنان باقتيار زاينۋتدينوۆ 73-مينۋتتا پەنالتيدەن گول سوقسا، اسحات تاعىبەرگەن 86، ابات ايىمبەتوۆ 89-مينۋتتا مەرگەندىك تانىتتى. دانيا قۇراماسىنان راسمۋس حيەيلۋنن 21, 36-مينۋتتا ەكى گول سوققان ەدى.
«ارينە، جەڭىسكە وتە قۋانىشتىمىز. قولايسىز جەڭىلىستەن كەيىن ءوز الاڭىمىزدا جانكۇيەرلەر الدىندا وڭ ناتيجەگە قول جەتكىزۋگە تىرىستىق. قارسىلاس وڭاي ەمەس ەكەنىن تۇسىندىك. سوعان قاراماستان قالپىمىزعا كەلۋگە كوڭىل بولدىك. دەسە دە ءوز الاڭىمىزداعى جەڭىلىس قۇراماعا ءبىرشاما اسەر ەتتى. شەگىنەرگە جەر جوق. بۇل جايىندا ويىنشىلارمەن اڭگىمەلەستىك. دانيامەن كەزدەسۋدە ءبىرىنشى كەزەڭ ءبىز ويلاعانداي بولعان جوق. ەكى گولدىڭ سوعىلۋى قاتەلىكتەر سالدارىنان سوعىلدى. ەكىنشى كەزەڭدە ويىنشىلاردىڭ ءبىر- ءبىرىن ءتۇسىنۋى وڭايعا سوقتى. ونى وڭتايلى پايدالانا الدىق»، - دەدى قازاقستان قۇراماسىنىڭ باس باپكەرى ماگومەد اديەۆ.
دانيالىق باس باپكەرى كاسپەر يۋلمانن ويىننىڭ سوڭعى مينۋتتارىندا ءوز قۇراماسىنىڭ ناشار ويىن كورسەتكەنىن اتاپ ءوتتى.
«قازاقستان قۇراماسىن جەڭىسىمەن قۇتتىقتايمىن! ناتيجەگە كوڭىلىمىز تولمايدى. ويىننىڭ باسىم بولىگىندە جاقسى ويىن كورسەتتىك. ال سوڭعى 15 مينۋت ءبىز ءۇشىن وتە قولايسىز بولدى. بۇل تاكتيكاعا قاتىستى ەمەس. كوڭىل- كۇيگە بايلانىستى. بۇل كورسەتكىش سوڭعى رەت قايتالانىپ وتىر دەپ ويلايمىن»، - دەدى ول.
ەندى قازاقستان الداعى ويىنىن 16- ماۋسىمدا سىرت الاڭدا سان- مارينوعا قارسى وتكىزەدى.
فوتو: sports.kz
اۆتور
ءادىلجان ۇمبەت