شىمبۇلاق تاۋ شاڭعى كۋرورتى گيننەستىڭ رەكوردتار كىتابىنا كىردى

الماتى. قازاقپارات - «شىمبۇلاق» تاۋ شاڭعىسى كۋرورتى رەسمي تۇردە «الەمدەگى ەڭ بيىك تۇنگى تاۋ شاڭعى تراسساسى» نوميناتسياسى بويىنشا گيننەستىڭ رەكوردتار كىتابىنا كىردى، دەپ حابارلايدى قازاقپارات ءتىلشىسى.

Guinness World Records وفيسىنىڭ سۋدياسى شەيد سۋباشي- گەميدجي ءوز سوزىندە «شىمبۇلاقتا» بولعانىنا قۋانىشتى ەكەنىن ايتا كەلە، تاۋ شاڭعى كۋرورتىنىڭ باس ديرەكتورى رينات ابدراحمانوۆقا الەمدىك رەكوردتى راستايتىن سەرتيفيكاتتى تابىس ەتتى.

سەرتيفيكاتتى تاپسىرۋ ءراسىمى جانە رەكورد ناتيجەسىن رەسمي تىركەۋ - تەڭىز دەڭگەيىنەن 3200 مەتر بيىكتىكتە «تالعار اسۋى» ستانسياسىندا ءوتتى.

«شىمبۇلاق» تاۋ كۋرورتى الەمدەگى ەڭ بيىك تۇنگى شاڭعى تراسساسى رەتىندە رەسمي تۇردە گيننەس رەكوردىن العانى تۋرالى سىزدەرگە حابارلاۋعا قۋانىشتىمىن. بۇل الەمدەگى جاڭا رەكورد»، - دەدى شەيدا سۋباشي- گەميدجي.

ءوز كەزەگىندە رينات ابدراحمانوۆ بۇل ەل ءۇشىن ماڭىزدى وقيعا ەكەنىن اتاپ ءوتتى. ونىڭ ايتۋىنشا، 5 جىل بۇرىن شاڭعىمەن تۇنگى سىرعاناۋ جولىن اشۋ ونىڭ ارمانى بولعان، ال بۇگىندە ارمانى شىندىققا اينالدى. ول جيىنعا قاتىسۋشىلاردى ءوز ارمانىنا سەنۋگە جانە العا ۇمتىلۋعا شاقىردى.

سالتاناتتى شاراعا ق ر مادەنيەت جانە سپورت ءمينيسترى اسحات ورالوۆ، الماتى قالاسى اكىمىنىڭ ورىنباسارى ارمان قىرىقبايەۆ قاتىستى.

«بۇگىن تاريحي كۇن. ءبىزدىڭ «شىمبۇلاق» تاۋ شاڭعى كۋرورتىمىز گيننەستىڭ رەكوردتار كىتابىنا ەندى. بۇل بۇكىل ەل ءۇشىن ۇلكەن جەتىستىك. ارينە، ءبىزدىڭ الەۋەتىمىز زور، «شىمبۇلاق» ەلىمىزدەگى تۋريزمدى دامىتۋدىڭ نەگىزگى ورىنداردىڭ ءبىرى بولىپ تابىلادى. جالپى، قازىرگى تاڭدا مادەنيەت جانە سپورت مينيسترلىگىنىڭ ارالاسۋىمەن ناقتى قادامدار قابىلدانۋدا. اتاپ ايتقاندا، ەلىمىزدە الداعى جەتى جىلعا ارنالعان تۋريزم سالاسىن دامىتۋ تۇجىرىمداماسى ازىرلەندى. ءبىز جەرگىلىكتى اتقارۋشى ورگاندارمەن، سەرىكتەستەرمەن، بيزنەس قوعامداستىقپەن بىرلەسىپ ينفراقۇرىلىمدى جانە تۋريزمىمىزدى دامىتاتىن بولامىز»، - دەدى اسحات ورالوۆ.

شارا سوڭىندا قىزىل لەنتا سالتاناتتى تۇردە كەسىلىپ، ەڭ بيىك تۇنگى تاۋ شاڭعىسى تراسساسىمەن تومەن قاراي جاپپاي سىرعاناۋ ءوتتى.

ايتا كەتەيىك، تەڭىز دەڭگەيىنەن 3200 مەتر بيىكتىكتە تۇنگى شاڭعىمەن سىرعاناۋ 2021 -جىلدىڭ قاراشاسىندا باستالعان ەدى. وسى ۋاقىت ىشىندە جۇزدەگەن مىڭ ادام تۇنگى ۋاقىتتا ەڭ جوعارى نۇكتەدەن ءتۇسىپ ۇلگەردى.

تاۋ شاڭعى كۋرورتىنىڭ باسپا ءسوز قىزمەتىنىڭ حابارلاۋىنشا، 2021-2022 -جىلعى ماۋسىمدا تۇنگى شاڭعىمەن سىرعاناۋعا 50346 تۋريست كەلگەن، بيىلعى ماۋسىمدا % 10 ەسە كوپ كەلدى، ياعني، 55486 كەلۋشىلەر بولدى.

سونىمەن قاتار، 2021-2022 -جىلعى ماۋسىمدا كۇنىنە 12520 ادام كەلسە، بيىلعى ماۋسىمدا كۋرورتقا 1 ميلليوننان استام ادام كەلىپ ۇلگەردى.

اۆتور

دۋمان ارعىنگەلدى