تىلەۋقابىل تولەگەن ۇلى شينجاڭ رەكوردىن جاڭارتتى - شەتەلدەگى قازاق باسپا ءسوزى

None
استانا. قازاقپارات - «قازاقپارات» ح ا ا شەت مەملەكەتتەردە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تىلەۋقابىل تولەگەن ۇلى شينجاڭ مارافونى رەكوردىن جاڭارتتى - «جەنمين جيباو»

19-ناۋرىزدا 2 ساعات 12 مينۋت 46 سەكۋندتتىق ناتيجەمەن 26 جاستاعى ىلەلىك سپورتشى تىلەۋقابىل تولەگەن ۇلى 2023 -جىلعى ۆۋسي مارافونىندا شينجاڭ بويىنشا ەڭ جاقسى ۇپاي جينادى. بۇل شينجاڭ جەڭىل اتلەتيكاسى ءۇشىن تاريحي جەڭىس، دەپ حابارلادى «People Daily».

ول سونداي-اق حالىقارالىق مارافونشى دارەجەسىنە جەتكەن شينجاڭنىڭ ەكىنشى جەڭىل اتلەتشىسى بولدى. الدىڭعىسى شينجاڭ ايەلدەر مارافونىنىڭ رەكوردشىسى شياو يۋەگۋي ەدى.

قىتايلىق باسىلىمنىڭ دەرەگىنشە، بۇل جولعى ۋشي مارافونى - ۇلتتىق مارافون چەمپيوناتى عانا ەمەس، سونىمەن قاتار بۋداپەشتەگى جەڭىل اتلەتيكادان الەم چەمپيوناتى مەن حاڭجوۋداعى ازيا ويىندارى ءۇشىن ەلدىڭ ۇزدىك سپورتشىلارىن ىرىكتەۋگە ارنالعان ىشكى مارافوندىق سىناق.

ايتا كەتەيىك، 2007 -جىلى 21-قازاندا رەن يۋنلۋن 27-بەيجىڭ مارافونىندا 2 ساعات 8 مينۋت 15 سەكۋندتا ۇلتتىق رەكورد ورناتقاننان كەيىن قىتايلىق مارافونشىلاردىڭ ەشقايسىسى بۇل ناتيجەدەن اسىپ تۇسپەدى. ال تىلەۋقابىل وسى جولعى سپورتتىق باسەكەدە شينجاڭنىڭ مارافون رەكوردىن 1 مينۋتتان استامعا جاڭارتقان.

تىلەۋقابىل تولەگەن ۇلى شينجاڭ جەڭىل اتلەتيكا كومانداسىنىڭ مۇشەسى. ونىڭ بۇرىنعى ەرەكشە جارىسى 5000 مەترگە جانە 10000 مەترگە ورتا جانە ۇزاق قاشىقتىققا جۇگىرۋ بولدى. ول جىل سايىن مارافوندارعا دا قاتىسىپ كەلەدى.

اتاپ ايتار بولساق، 2022 -جىلدىڭ شىلدە ايىندا ت. تولەگەن ۇلى دجيمۋسار تيانشان مارافونىندا 1 ساعات 7 مينۋت جانە 23 سەكۋند ۋاقىتپەن ەرلەر اراسىنداعى جارتىلاي مارافون چەمپيوناتىندا باس جۇلدەنى ەنشىلەگەن. سودان كەيىن ارنايى مارافون جاتتىعۋلارى ءۇشىن ۇلتتىق جەڭىل اتلەتيكا كومانداسىنىڭ مارافون جوباسىنىڭ كومانداسىنا قابىلدانعان بولاتىن.

شىناي راحمەت ۇلىنا «حالىق جازۋشىسى» اتاعى بەرىلدى - «Kaznews»


موڭعوليا پرەزيدەنتى ۋحنااگيين ءحۇرەلسۇح بايان-ولگي ايماعىنا جۇمىس ساپارىمەن كەلدى. ونىڭ بارىسىندا ۇلىستىڭ ۇلى كۇنى ناۋرىز مەيرامىنا وراي ءبىرقاتار ازاماتقا مەملەكەتتىك جوعارى اتاق، وردەن، مەدال تابىستادى. موڭعوليا پرەزيدەنتى ۋحنااگين ءحۇرەلسۇحتىڭ جارلىعى بويىنشا موڭعوليا مادەنيەتىنە ەڭبەك سىڭىرگەن قايراتكەر شىناي راحمەت ۇلىنا بۇقارالىق اقپارات قۇرالدارىن دامىتۋعا جانە ادەبيەت سالاسىنا قوسقان قۇندى ۇلەسى ءۇشىن «حالىق جازۋشىسى» اتاعى بەرىلدى، دەپ حابارلايدى موڭعوليانىڭ «Kaznews» اقپارات پورتالى.

سونداي-اق «ەڭبەك سىڭىرگەن ۇستاز» اتاعىمەن اقكول قالاشىعىنىڭ ارداگەر ۇستازى قۇرمەتباي بازار ۇلى مەن ولگي قالالىق 1-مەكتەبىنىڭ اعا ۇستازى قازيزا ساعدولدا قىزى؛ «ەڭبەك سىڭىرگەن ەكونوميست» اتاعىمەن رىسجان كومپانياسىنىڭ قارجى ءبولىمىنىڭ باسشىسى قىزمەتىن اتقارعان قاجەكبەر نۋري ۇلى مەن اقكول قالاشىعى ساگااننۋۋر كومپانياسىنىڭ باسقارما كەڭەسىنىڭ باسشىسى قىزمەتىن اتقارعان جانپەيىس مونگول ۇلى؛ «ەڭبەك سىڭىرگەن مالشى» اتاعىمەن التانسوگس سۇمىندىق سىدىق سىراقباي ۇلى؛ «ەڭبەك سىڭىرگەن دارىگەر» اتاعىمەن استما كلينيكالىق اۋرۋحاناسىنىڭ كەڭەسشى دارىگەرى قۋاتحان ءشارىپ ۇلى قاتارلى ازاماتتار ماراپاتتالدى.

ايتا كەتۋ كەرەك، شىناي راحمەت ۇلى موڭعوليا جانە حالىقارالىق جازۋشىلار ووداعىنىڭ مۇشەسى اقىن، جازۋشى، اۋدارماشى، ەتنوگراف جۇرناليست.

شىناي راحمەت ۇلى ايماقتىق گازەت، راديو، جۋرنالدا 25 جىل، موڭعوليانىڭ ورتالىق گازەت، راديو، حابار اگەنتتىگىندە 25 جىل قىزمەت اتقارعان.

ونىڭ پوەزيالىق، پروزالىق ونشاقتى كىتابى قازاق، موڭعول تىلىندە باسىلىپ شىققان. ون پوۆەست، ءجۇز اڭگىمەسى جانە درامالىق، تاريحي، شەجىرە، تەكتانىم كىتاپتارى جارىق كورگەن. سونداي-اق موڭعول تىلىنەن قازاق تىلىنە كوپتەگەن ولەڭ، داستان، پەسالارمەن قاتار، بىرنەشە روماندى ءتارجىمالاعان.

«م. اۋەزوۆتىڭ «كوكسەرەك»، «قارالى سۇلۋ»، ءى. ەسەنبەرليننىڭ «قاھار»، و. بوكەيەۆتىڭ «كوك تايىنشا»، ك. سەگىزبايەۆتىڭ «اقشا»، اقىتتىڭ «دالايلۋ عاحىليا» تۋىندىلارىن، ءا. مارعۇلاننىڭ 1-تومىن، يسلامدىق التى كىتاپتى موڭعولشاعا اۋدارعان. موڭعولياعا ەڭبەگى سىڭگەن مادەنيەت قايراتكەرى، موڭعوليا جانە قازاقستان رەسپۋبليكاسىنىڭ مادەنيەت ۇزدىگى اتانعان»، - دەپ جازادى موڭعوليالىق باسىلىم.

سونداي-اق وسى اپتادا «Kaznews» اقپارات پورتالىندا «بەكنۇر قالي ۇلى قىرعىزستانداعى حالىقارالىق تۋرنيردە چەمپيون اتاندى» دەگەن تاقىرىپتا اقپارات جاريالانعان بولاتىن.

موڭعوليالىق ب ا ق-تىڭ دەرەگىنشە، بايان-ولگي ايماعىنىڭ بىلعارى قولعاپ شەبەرى بەكنۇر قالي ۇلى قىرعىزستانداعى حالىقارالىق تۋرنيردە قىرعىز بوكسشىسى ەلشوروۋلى وماتبەكتى ۇتىپ چەمپيون اتاندى.

ناۋرىزدا تۇرىك الەمىنىڭ ءتۇرلى تاعامدارى ۇسىنىلىپ، قازاق اندەرى شىرقالدى - «TRT»


ناۋرىز تويىندا تۇرىك الەمىنىڭ اسحاناسىنان ءتۇرلى تاعامدار ۇسىنىلىپ، قازاق اندەرى شىرقالدى. كوكتەمنىڭ حابارشىسى، جاڭا جىلدىڭ باستاۋى ناۋرىز مەرەكەسى قازاقستاندا شاتتىقپەن تويلانىپ جاتىر، دەپ جازدى تۇركيا راديو تەلەۆيزيا پورتالى.

ايتا كەتەيىك، حالىقارالىق تۇركى اكادەمياسىندا ناۋرىز مەرەكەسىنە وراي شارا ۇيىمداستىرىلدى. استاناداعى شاراعا ەلدەگى تۇرىك الەمى ەلدەرىنىڭ ديپلوماتيالىق ميسسيا باسشىلارى، قازاقستان سىرتقى ىستەر ءمينيسترىنىڭ ورىنباسارى، حالىقارالىق ۇيىمدامداردىڭ وكىلدەرى مەن قوناقتار قاتىسقان.

شينجاڭدا ناۋرىز مەيرامى تويلاندى - People.cn

شينجاڭداعى ءار ۇلت حالقى ءداستۇرلى ناۋرىز مەيرامىن قارسى الۋعا دايىندالدى. جەرگىلىكتى داستۇرلەر مەن ادەت-عۇرىپقا سايكەس، ناۋرىز قارساڭىندا اعاش وتىرعىزىلىپ، ارىقتار تازارتىلادى، اۋلالار جينالىپ، قوناقتارعا ءدامدى داستارقان دايىندالادى، دەپ جازادى «حالىق» گازەتى.

قىتايلىق باسىلىمنىڭ دەرەگىنشە، تەكەس اۋدانىنىڭ اقتاس اۋىلىنداعى ەلزاتتىڭ وتباسى ەرتە تۇرىپ، جاڭا كيىمىن كيىپ، ناۋرىز كوجە دايىنداۋعا كىرىسكەن. كوجە دايىن بولعاننان كەيىن كورشىلەردى، تۋىستار مەن دوستاردى داستارحانعا شاقىرعان. «ەسكى اي ەسىركەسىن، جاڭا اي جارىلقاسىن» دەپ جاڭا جىلدا اق تىلەكتەرىن ايتىپ، قۇت-بەرەكە تىلەگەن.

وسى اقپاراتتا تەكەس اۋدانىنىڭ مەديا ورتالىعى ناۋرىز مەيرامى تۋرالى ۆيدەونى ۇسىنعان.

«ناۋرىز مەيرامى ― ەۋرازياداعى كوپتەگەن ەتنيكالىق توپتىڭ ءداستۇرلى مەرەكەسى. ول كوكتەمنىڭ كەلۋىن قارسى الۋ ءۇشىن جىل سايىن شامامەن 21-ناۋرىزدا كوكتەمگى كۇن مەن ءتۇننىڭ تەڭەلۋىنە قاراي وتكىزىلەدى. قىتايدىڭ شينجاڭىندا ۇيعىر، قازاق، قىرعىز، وزبەك جانە تاجىك سياقتى ەتنيكالىق ازشىلىقتار ءۇشىن ناۋرىز جىل سايىن اتاپ وتىلەتىن ءداستۇرلى مەرەكە سانالادى»، دەپ تۇيىندەيدى قىتايلىق ب ا ق.

يراننان اقتاۋعا العاشقى چارتەرلىك رەيس اتتاندى - «Parstoday»

تەھراننان العاشقى چارتەرلىك رەيس قازاقستاننىڭ اقتاۋ قالاسىنا كەلدى.

قازاقستاننىڭ مادەنيەت جانە سپورت مينيسترلىگى يران Airtour ۇشاعىمەن اقتاۋ قالاسىنا 137 تۋريست كەلگەنىن حابارلادى. قازاقستاننىڭ مادەنيەت جانە سپورت مينيسترلىگى وتكەن جىلى قازاقستان يران، قىتاي جانە ءۇندىستان ازاماتتارى ءۇشىن 14 كۇندىك ۆيزانى الىپ تاستاۋ رەجيمىن ەنگىزگەنىنە توقتالدى.

بۇل تۋرالى وسى اپتادا «Parstoday» اقپارات اگەنتتىگى حابارلادى.

يراندىق باسىلىمنىڭ كەلتىرگەن مالىمەتىنە سۇيەنسەك، ق ر مادەنيەت مينيسترلىگى تۋريزم يندۋسترياسى كوميتەتىنىڭ باسشىسى داستان رىسپەكوۆتىڭ ايتۋىنشا، اقتاۋ باعىتى يراندىقتار اراسىندا ۇلكەن سۇرانىسقا يە. سول ءۇشىن كەلەشەكتە رەيستەردى كوبەيتىپ، تۋريستەر سانىن ارتتىرۋ ماڭىزدى.

وزبەكستان قازاقستاننان 541,4 ميلليون دوللاردىڭ ءونىمىن ساتىپ الدى - «ءوز ا»

وزبەكستان تاۋارلاردى ەڭ كوپ يمپورتتايتىن 10 ەل بەلگىلى بولدى. 2023 -جىلدىڭ قاڭتار- اقپان ايلارىندا وزبەكستان يمپورتىندا قىتاي ءبىرىنشى ورىندا تۇر. بۇل ەلدەن 1,1 ميلليارد دوللاردىڭ ءونىمى ساتىپ الىنعان. بۇل تۋرالى وسى اپتادا «ءوز ا» اقپارات اگەنتتىگى حابارلادى.

وزبەكستاندىق باسىلىمنىڭ مالىمەتىنشە، كەلەسى ورىنداردا 996,1 ميلليون دوللارعا تاۋار اكەلگەن رەسەي جانە 562 ميلليون دوللارعا تاۋار ساتقان گەرمانيا ورنالاسقان.

بۇل كورسەتكىشتى ارى قاراي قازاقستان (541,4 ميلليون)، تۇركيا (325 ميلليون)، كورەيا (302 ميلليون) قاتارلى ەلدەر جالعاستىرعان.

اۆتور

بەيسەن سۇلتان ۇلى


سوڭعى جاڭالىقتار