جانسايا ابدىمالىك تۋرنيردەن كەتۋىن ءتۇسىندىردى، ال ف ي د ە باسشىسى شاحماتشىلاردان كەشىرىم سۇرادى

استانا. قازاقپارات - حالىقارالىق شاحمات فەدەراتسياسىنىڭ پرەزيدەنتى اركادي دۆوركوۆيچ ءۇندىستانداعى گران- پري تۋرنيرىنىڭ قاتىسۋشىلارىنان كەشىرىم سۇرادى، دەپ حابارلايدى قازاقپارات ءتىلشىسى.

ف ي د ە سايتىنداعى مالىمەتكە قاراعاندا، ءۇندىستانعا كەلگەن شاحماتشىلار ۇيىمداستىرۋشىلاردىڭ ورەسكەل قاتەلىگىنەن ءبىرقاتار قولايسىزدىققا تاپ بولعان.

سونىڭ سالدارىنان قازاقستان وكىلى جانسايا ابدىمالىك جارىسقا قاتىسۋدان باس تارتقان. 11 شاحماتشى قالعاندىقتان، تۋرنير كەستەسىن قايتا جاساۋعا تۋرا كەلدى، دەگەنمەن گران- پري كەزەڭى وتەدى.

دۆوركوۆيچ قالعان 11 قاتىسۋشىدان كەشىرىم سۇراپ، بارلىعىنا حات جولداعان.

«ف ي د ە سونداي- اق قوسىمشا كوورديناتور بەلگىلەيدى. ول تولىعىمەن قاتىسۋشىلاردىڭ قاراماعىندا بولادى جانە كەز كەلگەن بارلىق قوسىمشا شىعىنعا وتەماقى ۇسىنادى»، - دەلىنگەن ف ي د ە سايتىندا.

بۇدان بولەك ايەلدەر تۋرنيرلەرىن ۇيىمداستىرۋدىڭ قاعيداسى مەن ستاندارتى قايتا ءجىتى قارالىپ، الداعى ءىس- شارالاردى ۇيىمداستىرۋشىلاردىڭ بىلىكتىلىگى ارتتىرىلاتىنى جازىلعان.

ايتا كەتەيىك، كەشە شاحماتشى ءبيبىسارا اساۋبايەۆا الەۋمەتتىك جەلىدە پوست جاريالاپ، وندا دەليدە باستالعان ماڭىزدى گران- پري تۋرنيرىنەن جانسايا ابدىمالىك اياقاستى كەتىپ قالعانىن جازدى. ايتۋىنشا، جانساياعا ۇيىمداستىرۋشىلاردىڭ دۇرىس قارسى الماۋى ۇناماعان.

ءوز كەزەگىندە جانسايا ابدىمالىك بۇل قادامعا بارۋ سەبەبىن ءتۇسىندىردى.

ونىڭ سوزىنە قاراعاندا، ءۇندىستانداعى تۋرنيردە ۇيىمداستىرۋشىلار جاساعان جاعدايعا ءوزى عانا ەمەس، اساۋبايەۆانى قوسا العاندا، ارىپتەستەرى دە ريزا بولماعان. ولار اقىلداسا كەلە، ف ي د ە پرەزيدەنتى مەن اپپارات باسشىلىعىنا بۇعان قاناعاتتانبايتىنىن ءبىلدىرىپ، ۇجىمدىق حات جازعان. جارىستى كەيىنگە قالدىرۋ نەمەسە ونى وتكىزبەۋ جونىندە ۇسىنىس جاساعان. ايتۋىنشا، حاتقا اساۋبايەۆانى قوسا العاندا، تۋرنيرگە قاتىسۋشىلاردىڭ بارلىعى دەرلىك قول قويعان.

«مۇنداي جاعدايدا ويناي المايتىنىم جونىندە ف ي د ە پرەزيدەنتى اركادي دۆوركوۆيچ پەن اتقارۋشى ديرەكتور ەميل سۋتوۆسكيدى جەكە ءوزىم حاباردار ەتتىم»، - دەگەن ج. ابدىمالىك ۇيىم باسشىسىنىڭ جاۋاپ حاتىن قوسا ۇسىنىپ، شاحماتشىلار قاۋىپسىز جانە دۇرىس جاعدايدا ويناۋعا لايىقتى ەكەنىن جازدى.

«مەن ءوز ەلىم اتىنان قاشان دا ماقتانىشپەن جانە ابىرويمەن وينايمىن. ءۇندىستانداعى وليمپيادانى ءالى كۇنگە دەيىن جىلى ەسكە الامىن. ءبىراق دەليدە جاسالعان جاعداي شىنىمەن اقىلعا قونىمسىز بولدى»، - دەيدى ول.

اۆتور

عايساعالي سەيتاق