ميتحۋن چاکرابورتي کىم؟
سول زاماندا «سۋعا سالسا، باتپايتىن»، «وتقا سالسا، جانبايتىن» سۋپەر قاهارمان اکتەر اميتابح باچچان دەگەن بولدى.
ودان کەيىن ءۇندىنىڭ جاڭا «باتىرى» ميتحۋن چاکرابورتي جارق ەتىپ شىقتى.
1982- جىلى جارىق کورگەن «تانسور ديسکو» فيلمىن کورمەگەن ادام کەمدە-کەم شىعار. باستى رولدى ميتحۋن سومداعان بۇل کينو کەڭەس مەملەکەتتەرىندە، اسىرەسە قازاقستاندا کەڭ تارالدى. کەيبىر فاناتتار کينونى ون رەت قايتالاپ کورىپ جاتتى.ءتىپتى، اۋىل کلۋبتارىندا «تانسور ديسکونى» کورۋ ءۇشىن ۇزىن سونار کەزەککە تۇراتىن. فيلم جاستار ساناسىنا قاتتى اسەر ەتتى جانە کوپ شۋ دا شىعاردى. کەرە ك دەسەڭىز، کەڭەس وداعى ورتا ازيالىق رەسپۋبليکالارىنىڭ بىرىندە کينونى کورسەتۋگە تىيىم سالدى. ويتکەنى، کينوتەاتر کاسسالارىنداعى ايقاي-ۇيعاي، دۇرلىگۋ، ساپىرىلىس ادام ولىمىنە الىپ کەلگەن ەکەن.
جاستار تويلاردا، بي الاڭدارىندا «ءاي ەم ە ديسکو دەنس!» دەپ ءان ايتىپ، بي بيلەدى. کورکەم تۋىندىدا چاکرابورتي وسى ءان-ءبيدى شەبەرلىکپەن ورىنداعان ەدى. فيلمنىڭ ەڭ باستى تارتىمدىلىعى وسى بولاتىن. ميتحۋننىڭ ديسکو ستيلىندەگى ءانى مەن ءبيى سول کەزدىڭ جاستارى ءۇشىن جاڭا «حيتکە» اينالدى. سونداي-اق کينودا برەيك، تۆيست سياقتى بي ۇلگىلەرىن دە کورسەتتى. کەڭەس وداعىنىڭ تۇسىندا باتىستىق فيلمدەر مەن مۋزىکالاردىڭ کوبىسى کەڭەستىك ساياسات سۇزگىسىنەن وتپەيتىن. سوندىقتان جاستار کوپ جايتتان حابارسىز بولدى. ال، چاکرابورتي بولسا، سول ۆاکۋۋمنىڭ ورنىن تولتىرعانداي. سونىمەن بىرگە فيلمدەگى وقيعا جەلىسىنەن کورىنىس تاپقان باۋىرماشىلدىق، ماحاببات، کەدەي بالانىڭ جارىق جۇلدىزعا اينالۋى، کەگىن الۋى، مۇراتىنا جەتۋى کورەرمەندەردى قىزىقتىردى. «تانسور ديسکونىڭ» ارقاسىندا ميتحۋن 80-90 - جىلدارى ەڭ تانىمال بولدى.
چاکرابورتي 1950- جىلى 16- ماۋسىمدا دۇنيەگە کەلگەن. 1960- جىلداردىڭ اياعىندا ميتحۋن سولشىل راديکالدى ناکساليتتەر شارۋالار قوزعالىسىنا قاتىسىپ، بيلىکتەگى جەمقورلىققا قارسى شىعىپ، الەۋمەتتىك ماسەلەلەردى کوتەرەدى. الايدا ناکساليتتەردىڭ بۇلىگىن بيلىك اياۋسىز جانىشتادى. ميتحۋننىڭ کوپتەگەن دوستارى اتىلدى، قالعانى تەمىر تورعا توعىتىلدى. بالاسىنىڭ تاعدىرىنا الاڭداعان اکەسى ميتحۋندى 1971- جىلى بومبەيگە اتتاندىرىپ جىبەرەدى.
بومبەيدە جۇرگەندە اکتەر بولىپ، کينوعا ءتۇسۋدى ارماندايدى. ميتحۋن ءسىڭىرى شىققان کەدەي وتباسىدان بولاتىن. سول سەبەپتى وعان شىعارماشىلىق جولدا جەتىستىککە جەتۋ وڭاي سوقپادى. ال، سول کەزدەگى ءۇندى کينوسىنىڭ جارىق جۇلدىزى اميتابح باچچان اۋقاتتى، زيالى وتباسىدان شىققان، بالا کەزىندە ءۇندىستاننىڭ بولاشاق پرەمەرى رادجيۆ گانديمەن بىرگە وقىعان. باچچان ءۇشىن شىعارماشىلىق جولدا ەسىکتىڭ ءبارى اشىق بولدى. ال، چاکرابورتي شىعارماشىلىقتى ارمانداپ، ءناپاقا تابۋ عانا قايعىسىندا ءجۇردى.
ءبىراق سىمباتتى جىگىت ءوزىنىڭ تارتىمدىلىعىنىڭ سالماعىن جاقسى بىلەتىن. بومبەيدىڭ کينو يندۋسترياسىنىڭ ەسىگىن جاعالايدى. کەلە-کەلە بىرنەشە ەپيزود رولدەردە کورىنە باستايدى. کينو سالاسىنا دەگەن قىزىعۋشىلىعى ودان سايىن ارتا تۇسەدى. ءسويتىپ، پۋناداعى کينو ينستيتۋتتىڭ اکتەرلىك فاکۋلتەتىنە وقۋعا تۇسۋگە بەل بۋادى. ءبىراق جوقشىلىق قولىن بايلايدى. ءبىر جىل بويى چاکرابورتي ساۋدا اگەنتى بولىپ جۇمىس ىستەپ، سودان تاپقان اقشاسىمەن ينستيتۋت تابالدىرىعىن اتتايدى.
وقۋدا جۇرگەندە ءۇندى کينەماتوگرافياسىنىڭ ابىرويى سانالاتىن، ۆەنەسيا، کانن فەستيۆالدەرىندە ءوزىنىڭ تۋىندىلارىمەن تانىلىپ جۋرگەن رەجيسسەر مرينال سەننىڭ کوزىنە ءتۇسىپ، چاکرابورتي ونىڭ «کورولەۆسکايا وحوتا» فيلمىنىڭ باستى رولىنە شاقىرىلادى. بۇل ءونىم 1976- جىلى ەڭ ۇزدىك ءۇندى فيلمى دەپ تانىلىپ، «زولوتوي لوتوس» پرەمياسىن جەڭىپ الادى. وسى کەزدە ميتحۋننىڭ الدىندا ەکى تاڭداۋ تۇردى. ءبىرى - کوممەرسيالىق کينو جولىن تاڭداۋ، ەکىنشى - سەننىڭ سەنىمىن اقتاپ، باسقان ىزىمەن ءجۇرۋ. چاکرابورتي ءبىرىنشىسىن تاڭدادى. ول ءوزىن سىناپ کورگىسى کەلدى.
بىرنەشە فيلمگە اقىلى تۇسکەنمەن، تالانتىن تولىق تانىتا المادى. اياعىندا ەشکىمگە کەرەگى جوق بولىپ قالادى. ءوزىن ەپيزودقا بولسا دا تۇسىرۋگە جالىنىپ سۇراپ، رەجيسسەر، پروديۋسەرلەردىڭ تابانىن سۇيۋگە دەيىن بارادى. بولماشى، ەشکىمدى تاڭعالدىرمايتىن رولدەردى ويناپ جۇرەدى. ءبىراز ۋاقىتتان سوڭ تانىمال رەجيسسەر باببار سۋبحاش چاکرابورتيعا ءوزىنىڭ «تانسور ديسکو» فيلمىنىڭ باستى رولىن ۇسىنادى. مىنە، ميتحۋننىڭ جۇلدىزدى شاعى باستالدى. وسى کينو ونىڭ باعىن اشتى. کينو ەکرانعا شىعىسىمەن جۇلدىز اتاندى.
ەندى بۇرىن ميتحۋندى مەنسىنبەي جۇرگەن رەجيسسەرلەر جوبالارىنا جارىسىپ شاقىرىپ، تۇسىرە باستايدى. ءبىر ۋاقىتتا بەس-التى جوبانى قاتار الىپ ءجۇردى. تابىسى کوبەيىپ، ءۇندىستانداعى ساناۋلى ميلليونەرلەردىڭ قاتارىنا قوسىلدى.
1986- جىلى ميتحۋن چاکرابورتي ءۇندىستانداعى جەکە تۇلعالار ىشىنەن ەڭ کوپ سالىق تولەۋشى اتاندى.
ءۇندىنىڭ جاڭا قاهارمانىنا نەبىر حاس سۇلۋلار عاشىق بولدى. تانىمال مانەکەنشى حەلەن لوککە ۇيلەنىپ، کەيىن ءدام-تۇزى جاراسپاي اجىراسىپ کەتتى. ميتحۋن ەکىنشى رەت اکتريسا يوگيتا باليگە ۇيلەندى. ودان کەيىن ءۇندىستانعا بەلگىلى کينوجۇلدىز شري دەۆيمەن کوڭىل جاراستىعى بار ەکەن دەگەن وسەک-اياڭدار دا شىقتى. ويتکەنى ەکەۋى تۇسىرىلىمدەردە بىرگە بولاتىن. الايدا چاکرابورتي بۇنىڭ قاۋەسەت ەکەنىن ايتتى. ال، اکتريسا يوگيتا ميتحۋن مەن بالالارى، ياعني وتباسى باقىتى ءۇشىن ۋىسىندا ۇستاپ تۇرعان کارەرا جولىنان باس تارتتى.
1980- جىلداردىڭ اياعىنا قاراي ميتحۋن جيىرما شاقتى کينوعا ءتۇسىپ ۇلگەرەدى. ءبىراق کوبىسى ءساتسىز شىعادى. رەنجۋلى رەجيسسەرلەردىڭ کوزىنە کۇيىك بولعانشا، ءوز بيزنەسىمدى جانداندىرايىن دەپ بومبەي کينو يندۋسترياسىنان کەتەدى. جەکە کينوستۋدياسىن اشىپ، جاس تالانتتاردى باۋليدى. سونداي-اق ءوزى کوپتەن جوسپارلاپ جۇرگەن «مونارح» قوناق ءۇيىن سالادى.
ءوزىنىڭ کينولارىنا تانىلا قويماعان جاس اکتەرلەردى شاقىرىپ، تەز-تەز ءتۇسىرىپ، کينونارىعىنا جىبەرىپ وتىردى. ەندى ءۇندى کينونارىعىندا ميتحۋن ستۋدياسىنىڭ ونىمدەرى کوبەيىپ کەتتى. فيلمدەر مايعا قۋىرىلعان باۋىرساقتاي بىرىنەن سوڭ ءبىرى شىعىپ جاتتى. وعان ءوزى دە ءتۇستى. شىنى کەرەك ، ونىڭ ساپاسى بۇرىن بومبەيدەگىلەردەن دە تومەن بولدى. البەتتە، ساننان ساپا بولاتىنى بەلگىلى. اتى اڭىزعا اينالعان ميتحۋننىڭ ءبىز بىلمەيتىن ءومىر جولى وسىنداي ەکەن.
ينتەرنەت ماتەريالدارى بويىنشا دايىنداعان: اعەرکە ورازوۆا
