استانادا تۇمان: قالا ماڭىنا جۇرەتىن اۆتوبۋستاردىڭ قوزعالىسى توقتادى

استانا. قازاقپارات - استاناداعى قالىڭ تۇمانعا بايلانىستى قالا ماڭىنا قاتىنايتىن ءبىرقاتار قوعامدىق كولىكتىڭ قوزعالىسى توقتاتىلدى، دەپ حابارلايدى قازاقپارات.

City Transportation Systems كومپانياسىنىڭ مالىمەتىنشە، بۇگىن ساعات 05:45-تەن باستاپ كۇن رايىنىڭ قولايسىزدىعىنا (قالىڭ تۇمان) جانە تاسجولداردىڭ جابىلۋىنا بايلانىستى قالا ماڭىنا قاتىنايتىن №№ 305, 312, 315, 316, 327 باعدارلارىنىڭ قوزعالىسى ۋاقىتشا توقتاتىلدى.

قالا ماڭىنا قاتىنايتىن باسقا باعدارلار لينيادا.

ەسكە سالايىق، كەشە تۇمانعا بايلانىستى ءبىرقاتار اۆتوجول ۋچاسكەسى جابىلعان بولاتىن.

اتاپ ايتقاندا، «ەكاتەرينبۋرگ - الماتى» اۆتوجولىنىڭ (1291-1353 شاقىرىم ارالىعى) «استانا قالاسى - انار بەكەتى» ۋچاسكەسى بارلىق اۆتوكولىك تۇرلەرىنە جابىلدى.

بۇدان بولەك، اقمولا وبلىسىندا «ەكاتەرينبۋرگ- الماتى» تاسجولىنىڭ 1291-1353 شاقىرىم ارالىعىندا، جاقسى اۋىلىنان اتباسار قالاسىنا دەيىنگى ارالىقتا كولىكتىڭ بارلىق ءتۇرى ءۇشىن قوزعالىس شەكتەلدى.

سونداي- اق وسى وڭىردە «استانا- قورعالجىن» تاسجولىنىڭ 19-124 شاقىرىمىندا دا كولىك جۇرۋىنە تىيىم سالىندى.

قاراعاندى وبلىسىندا اقمولا وبلىسى شەكاراسىنان تەمىرتاۋ قالاسىندا دەيىنگى جولدا كولىكتىڭ بارلىق تۇرىنە شەكتەۋ ەنگىزىلدى. بۇل - «ەكاتەرينبۋرگ- الماتى» اۆتوجولىنىڭ 1353-1425 شاقىرىم ارالىعىنداعى ۋچاسكە.