بايتەرەك مونۋمەنتى تۋبەركۋلەزگە قارسى كۇرەس كۇنىنە وراي قىزىل تۇسكە بولەنەدى
«ەلوردادا تۋبەركۋلەزبەن كۇرەس ماسەلەسىنە بەي-جاي قاراماۋدىڭ بەلگىسى رەتىندە قالا سيمۆولى «بايتەرەك» مونۋمەنتى بۇگىن كەشكە قىزىل تۇسپەن جارىقتاندىرىلادى. سونىمەن قاتار بۇگىن الەم قالالارىنىڭ كورنەكتى ورىندارى دا قىزىل تۇسپەن ەرەكشەلەنەدى»، - دەدى استانا قالاسىنىڭ فتيزيوپۋلمونولوگيا ورتالىعىنىڭ ديرەكتورى اننا تسەپكە قالالىق كوممۋنيكاتسيالار قىزمەتى الاڭىندا وتكەن بريفينگىدە.
سونداي-اق، فتيزيوپۋلمونولوگيا ورتالىعىنىڭ باسشىسى 2018-جىلدىڭ 26- قىركۇيەگىندە ب ۇ ۇ تۋبەركۋلەزدىڭ تارالۋ كورسەتكىشىنىڭ جوعارىلاۋى بويىنشا العاشقى كەڭەس وتكىزگەنىنە بيىل 5 جىل بولاتىنىن ەسكە سالدى.
كەڭەس بارىسىندا مەملەكەت باسشىلارى تۋبەركۋلەزدىڭ ەپيدەميا رەتىندەگى مارتەبەسىن تالقىلادى جانە اتالعان ىندەتتىڭ تارالۋىن توقتاتۋ ءۇشىن ءاربىر مەملەكەت قاجەتتى شارالار قابىلداۋ كەرەكتىگى ايقىندالدى.
بۇعان دەيىن ج. پراليەۆا تۋبەركۋلەز جۇقتىرعان استانالىقتاردىڭ %53,9 ەڭبەككە قابىلەتتى جاستا ەكەنىن ايتقان بولاتىن.
سونداي-اق، ەلوردادا 1 مىڭنان استام انا سابيىنە تۋبەركۋلەزگە قارسى ۆاكسينا سالعىزباعانى بەلگىلى بولدى.
ودان بولەك، بريفينگ بارىسىندا تۋبەركۋلەزدەن ەمدەلۋشىلەرگە قانداي الەۋمەتتىك قولداۋدىڭ بارى ايتىلدى.
استانا قالاسى سانيتارلىق-ەپيدەميالوگيالىق باقىلاۋ دەپارتامەنتى باسشىسىنىڭ ورىنباسارى جاننا پراليەۆانىڭ مالىمدەۋىنشە، ەلوردادا ستۋدەنتتەر اراسىندا تۋبەركۋلەز جۇقتىرۋ كورسەتكىشى ارتقان.