كەلەسى پرەمەر-مينيستر كىم بولۋى مۇمكىن؟ ساياسات تانۋشىلار بولجامىن ۇسىندى
قازاقستان رەسپۋبليكاسى كونستيتۋتسياسىنىڭ 70-بابىنا سايكەس، دەپۋتاتتار تىركەلىپ، قورىتىندى شىققاننان كەيىن ۇكىمەت وتستاۆكاعا كەتەدى. 20- ناۋرىزدا پرەمەر-مينيستر ءاليحان سمايىلوۆ قىزمەتىنەن كەتۋگە دايىن ەكەنىن ءمالىم ەتتى.
Massaget.kz ءتىلشىسى بۇل تۋرالى ساياساتتانۋشى، «قاۋىپ-قاتەردى باعالاۋ توبىنىڭ» ديرەكتورى دوسىم ساتپايەۆپەن جانە ساياساتتانۋشى، قوعام قايراتكەرى ءادىل سايلاۋبەكپەن سۇحباتتاسىپ، بولجام جاساپ كوردى.
ساياساتتانۋشى دوسىم ساتپايەۆ قازىرگى پرەمەر-مينيستر ءاليحان سمايىلوۆ وستاۆكاعا كەتىپ، ورنىن ساقتاي المايدى دەپ بولجادى. بۇعان سەبەپ - پرەزيدەنتتىڭ بىلتىر جەلتوقساندا ۇكىمەت باسشىسىن سىناۋى.
«قازىر ءتۇرلى كانديداتۋرا قاراستىرىلىپ جاتىر. ءاليحان سمايىلوۆ مىرزاعا كەلەر بولساق، بىلتىر جەلتوقساندا پرەزيدەنت ۇكىمەت پەن پرەمەر-ءمينيستردىڭ قىزمەتىن سىنعا الىپ، «ونىڭ جۇمىسى ءتيىمسىز» دەپ ايتقانىن ەستە ۇستاعان ءجون. وسىدان كەيىن بيىل قاڭتاردا ۇكىمەتتە 5 جاڭا مينيستر تاعايىندالدى. سوندىقتان ونىڭ ورنىن ساقتاپ قالۋى ەكىتالاي. ءبىراق بۇل جەردە باسقا ماڭىزدى ماسەلە بار. نازاربايەۆ تۇسىندا پرەمەر-ءمينيستردىڭ كانديداتۋراسى دا، ونىڭ لاۋازىمى دا ەشقاشان شەشۋشى رول اتقارمايتىن، سانالمايتىن جانە قاراستىرىلمايتىن جۇيە قۇرىلدى. بۇل - نەگىزگى ماسەلە. مۇندا سمايىلوۆتىڭ ورنىنا كەلەتىن ناقتى تۇلعالاردى ەمەس، تەحنوكراتيالىق كوشباسشىلىق ۇعىمىنا تەڭ كەلمەيتىن جۇيەنى تالقىلاۋ قاجەت. بىزدە پرەمەر- مينيستر - پرەزيدەنت اكىمشىلىگىندە ۇنەمى باقىلاۋدا بولاتىن، سوعان باعىناتىن ادام. ال شىن مانىندە ول بەلگىلى ءبىر باعدارلاماسى، قۇندىلىقتارى بار ادام بولۋى كەرەك. ول ۇكىمەتتى باعدارلاماسىنا لايىقتاۋ كەرەك»، - دەيدى ول.
ساياسات تانۋشىنىڭ ايتۋىنشا، ءبىزدىڭ ۇكىمەت ەشقاشان تەحنوكراتيالىق بولماعان، ءتىپتى ونداعى تاعايىنداۋلار - ەليتا ىشىندەگى كەلىسىمنىڭ ناتيجەسى. سوندىقتان كىم پرەمەر-مينيستر بولسا، ول سمايىلوۆتان نەمەسە وعان دەيىنگىلەردەن ەرەكشەلەنبەيدى، سەبەبى مەملەكەتتىك باسقارۋ جۇيەسى وزگەرگەن جوق.
سونداي-اق، دوسىم ساتپايەۆ ۆيتسە پرەمەر-مينيسترلەر مەن قوعامدا اكىمدەر اراسىندا بۇل ورىنعا كىم ۇسىنىلىپ جاتقانىن ايتتى.
«پرەمەردەن كەيىن ونىڭ ورىنباسارلارى بۇل ورىنعا ۇمىتكەر بولۋى لوگيكاعا ساي. ءبىر جاعىنان بۇل مينۋس، سەبەبى بۇعان دەيىن پەرمەر-ءمينيستردىڭ جۇمىسىنا سىن ايتىلسا، جاۋاپكەرشىلىك ونىڭ ورىنباسارلارىنا دا ارتىلادى. ال اكىمدەر اراسىنان باسقارا الاتىن تۇلعا كورمەيمىن. سەبەبى قازاقستاننىڭ ءبىر دە ءبىر ءوڭىرى ەكونوميكالىق دامۋ جاعىنان ايتارلىقتاي كورسەتكىش كورسەتپەدى. كەيبىرى ەربولات دوسايەۆتى ايتىپ جاتىر. ءبىراق الماتىدا دا ونداي وزگەرىستەر بولمادى. ول قالانى دامىتۋ باعدارلاماسىن جۇزەگە اسىرا الدى دەپ ايتا المايمىن»، - دەدى ول.
ال ساياساتتانۋشى، قوعام قايراتكەرى ءادىل سايلاۋبەكتىڭ پىكىرىنشە، ءاليحان سمايىلوۆ ورنىن ساقتاپ قالۋى مۇمكىن. ولاي بولماعان جاعدايدا، ونىڭ ورنىنا «امانات» پارتياسىنىڭ باسشىسى نەمەسە استانا اكىمى كەلۋ مۇمكىن.
«مەنىڭ ويىمشا، ۇكىمەتتىڭ وتساۆكاعا كەتۋى دۇيسەنبىدە بەلگىلى بولادى. جاڭادان سايلانعان دەپۋتاتتار مانداتتارىن العاننان كەيىن بارلىعى بەلگىلى بولادى. ءبىراق ءاليحان سمايىلوۆ قازىرگى گەوساياسي جاعدايعا بايلانىستى ورنىن ساقتاپ قالۋى مۇمكىن. وعان التەرناتيۆا رەتىندە «امانات» پارتياسىنىڭ باسشىسى ەرلان قوشانوۆ نەمەسە استانا اكىمى جەڭىس قاسىمبەك بولۋى مۇمكىن. مەنىڭشە، اكىمدەر مەن مينيسترلەر اراسىنان بۇل ورىنعا كەلەتىن كانديدات جوق. جاڭا ۇكىمەتتىڭ جاساقتالۋىندا دا قاتتى وزگەرىس بولا قويمايدى. ءبىراق پرەزيدەنت بۇعان دەيىن ۇكىمەتتى وزگەرتەمىز دەگەن»، - دەيدى ءادىل سايلاۋبەك.
ساياساتتانۋشىنىڭ ايتۋىنشا، جاقىندا تاعايىندالعان پرەمەر-ءمينيستردىڭ ورىنباسارى التاي كولگىنوۆ ءوز ورنىن ساقتاپ قالادى.
«ارينە، جۇمىس بولعان سوڭ، سىن بولماي تۇرمايدى. ءاليحان سمايىلوۆ جۇمىسىن ءوز باعىتىنشا ىستەپ كەلەدى. ءبىراق التاي كولگىنوۆ ورنىن ساقتاپ قالادى. بۇدان باسقا اسا وزگەرىس بايقالمايدى»، - دەپ قورىتىندىلادى ول.