قازاقستاندىق تەننيسشى جەكە رەكوردىنا قول جەتكىزدى

None
استانا. قازاقپارات - قازاقستاننىڭ ءبىرىنشى، الەمنىڭ 7-راكەتكاسى ەلەنا رىباكينا ءوزىنىڭ رەكوردتىق كورسەتكىشىن جاڭارتتى، دەپ حابارلايدى قازاقپارات ءتىلشىسى.

بۇگىن قازاقستاندىق تەننيسشى مايامي ماستەرس تۋرنيرىنىڭ ەكىنشى اينالىمىندا رەسەيلىك اننا كالينسكايانى 7:5، 4:6، 6:3 ەسەبىمەن ۇتتى.

بۇل - ونىڭ قاتارىنان توعىزىنشى جەڭىسى. وسىعان دەيىن ول ەكى رەت قاتارىنان جەتى ويىندا قارسىلاستارىن تىزە بۇكتىرگەن ەدى.

سونىمەن قاتار ەلەنا رىباكينا WTA تۋرنيرلەرىندە ۆيننەر سانى جونىنەن ءبىرىنشى ورىنعا شىقتى. ونىڭ ەسەبىندە 253 ۆيننەر بار.

ەيس سانى (155) بويىنشا ەلەنا الەم تەننيسشىلەرى اراسىندا ەكىنشى ورىندا كەلەدى.

بۇگىنگى كەزدەسۋدەن كەيىن قازاقستاندىق سپورتشى ءوز پىكىرىن ءبىلدىردى.

«جەڭگەنىمە قۋانىشتىمىن. ماتچتى ەكىنشى سەتتە بىتىرۋىمە بولاتىن ەدى، الايدا ازداپ كۇش-قۋات جەتىسپەي قالدى. مەنىڭ قارسىلاسىم قابىلداۋ كەزىندە ەكى رەت ءساتتى وينادى ءارى ءوزىم قوسارلى قاتە جىبەردىم. سوندىقتان ەكىنشى سەتتە ساتتىلىك جولداس بولمادى، دەگەنمەن ءۇشىنشى پارتيادا ءوز جولىمدى تاۋىپ، جەڭىسكە جەتتىم. مەندە ەكى-اق كۇن دەمالىس بولدى. بۇگىنگى كۇن دە ۇزارىپ كەتتى. ماتچتى جاي اياقتاۋعا تۋرا كەلدى. وعان قوسا مۇندا كورت، دوپتار - ءبارى باسقاشا، سوندىقتان وڭاي تيمەي تۇر. دەگەنمەن وسى ءۇش سەت ماعان ءۇشىنشى راۋندتا كومەكتەسەدى دەپ ۇمىتتەنەمىن»، - دەدى ە. رىباكينا.

ەسكە سالا كەتەيىك، بۇدان بۇرىن قازاقستاندىق تەننيسشىلەر جۇپتىق سىندا مايامي ماستەرس تۋرنيرىن جەڭىسپەن باستاعانىن جازعان بولاتىنبىز.

سوڭعى جاڭالىقتار