وقۋشى قىز قارا جورعا بيلەيتىن روبوت قۇراستىردى

كەنتاۋ. قازاقپارات - تۇركىستان وبلىسىندا وقۋشى قىز قارا جورعا بيلەيتىن روبوت قۇراستىردى، دەپ حابارلايدى قازاقپارات وقۋ- اعارتۋ مينيسترلىگىنە سىلتەمە جاساپ.

كەنتاۋ قالاسىنداعى №23 ورتا مەكتەپتىڭ 5-سىنىپ وقۋشىسى ارۋجان سمايل وقۋشىلار سارايىنداعى روبوتوتەحنيكا ۇيىرمەسىنە قاتىسادى. جاس ونەرتاپقىش تالىمگەرى اقنيەت ەلەمەسوۆانىڭ جەتەكشىلىگىمەن ءبيشى قۇلتەمىر قۇراستىردى.

«باستى ماقساتىمىز - «ارقان تارتۋ»، «كوكپار»، «تەڭگە الۋ» سەكىلدى قازاقتىڭ ۇلتتىق ويىندارىن تەحنيكالىق سالامەن ۇشتاستىرۋ جانە وسكەلەڭ ۇرپاقتىڭ قىزىعۋشىلىعىن ارتتىرۋ، ولارعا جول اشۋ»، - دەيدى اقنيەت ەلەمەسوۆا.

ارۋجاننىڭ ايتۋىنشا، ۇيىرمەگە العاش قاتىسقاننان روبوتوتەحنيكاعا قىزىعۋشىلىعى ارتقان. ول ۇلتتىق داستۇرلەردى ناسيحاتتاۋعا باعىتتالعان جوبا جاساعىسى كەلدى جانە ويىن جۇزەگە اسىردى.

«قارا جورعا» بيلەيتىن ەرەكشە روبوتتى ول ناۋرىز مەرەكەسىندە كوپشىلىككە تانىستىردى. ارۋجان روبوتوتەحنيكادا عانا ەمەس، جاراتىلىستانۋ- ماتەماتيكا باعىتىنداعى پاندەردەن دە وزات وقۋشى.