جەر قويناۋىن ءتيىمدى پايدالانباعان كاسىپورىنداردىڭ زالال كولەمى جاڭا ادىسپەن ەسەپتەلەدى

استانا. قازاقپارات - جەر قويناۋىن ۇتىمدى پايدالانباۋ سالدارىنان بولعان زالال مولشەرىن ايقىنداۋ ءتارتىبى وزگەرۋى مۇمكىن.

بۇل تۋرالى «اشىق» ن ق ا پورتالىندا جاريالانعان ەنەرگەتيكا ءمينيسترىنىڭ بۇيىرىعىندا جازىلعان، دەپ حابارلايدى قازاقپارات ءتىلشىسى.

«كومىرسۋتەكتەردى بارلاۋ مەن ءوندىرۋ، ۋران ءوندىرۋ كەزىندە جەر قويناۋىن ۇتىمدى جانە كەشەندى پايدالانۋ جونىندەگى تالاپتاردى بۇزۋ سالدارىنان كەلتىرىلگەن زالالدىڭ مولشەرى كومىرسۋتەكتەردىڭ نەمەسە ۋراننىڭ نورمالانعان ىسىراپتارىنان اساتىن ناقتى ىسىرابىنىڭ كولەمىن نەگىزگە الا وتىرىپ ايقىندالادى. بۇعان قوسا، رەسمي نورماعا سايكەس، ەسەپتى كەزەڭدەگى باعا بەلگىلەۋدىڭ ورتاشا قۇنىنا سۇيەنە وتىرىپ قۇندىق ماندە ايقىندالادى»، - دەلىنگەن قۇجاتتا.

بۇعان دەيىن زالال مولشەرى ەسەپتى كەزەڭدەگى ءونىمدى وتكىزۋدىڭ ورتاشا باعاسى بويىنشا بەكىتىلەتىن ەدى.

«مىسالى، جەر قويناۋىن پايدالانۋشى ەسەپتى كەزەڭدە 2658000 توننا مۇناي ءوندىردى. وسى كەزەڭدە مۇنايدىڭ ناقتى ىسىرابى 4442 توننا بولدى. ونىڭ ىشىندە بەكىتىلگەن نورماتيۆتىك ىسىراپ - 1081 توننا. ەسەپتى كەزەڭدە جەر قويناۋىن پايدالانۋشىنىڭ مۇنايدى ساتۋ كەزىندەگى ورتاشا باعا 50,49 دوللار بولدى. وندا كورسەتىلگەن فورمۋلا ارقىلى (4442 - 1081) * 50,49 = 169696,89 دوللارعا تەڭ بولادى»، - دەپ مىسال كەلتىرىلگەن قۇجاتقا قوسىمشا بەرىلگەن تۇسىندىرمەدە.

بۇيرىق جوباسى 7-ساۋىرگە دەيىن كوپشىلىك تالقىلاۋدا بولادى.