قاسىم- جومارت توقايەۆ پەن دينارا ءسادۋاقاسوۆا شاحماتتى دامىتۋ جونىندە پىكىر الماستى

استانا. قازاقپارات - مەملەكەت باسشىسى قاسىم- جومارت توقايەۆ استانا قالاسى شاحمات فەدەراتسياسىنىڭ قۇرمەتتى پرەزيدەنتى دينارا ءسادۋاقاسوۆانى قابىلدادى. قازاقپارات بۇل تۋرالى اقورداعا سىلتەمە جاساپ حابارلايدى.

پرەزيدەنت قاسىم- جومارت توقايەۆ پەن شاحماتتان ايەلدەر اراسىندا حالىقارالىق گروسسمەيستەر دينارا ءسادۋاقاسوۆا ەلىمىزدە شاحماتتى دامىتۋ جونىندە پىكىر الماستى.

مەملەكەت باسشىسىنا دينارا ءسادۋاقاسوۆا ەلىمىزدە شاحماتتىڭ تانىمالدىلىعىن ارتتىرۋ ءۇشىن اتقارىلىپ جاتقان جۇمىستار جانە كەلەشەكتەگى جوسپارى جونىندە باياندادى. ونىڭ ايتۋىنشا، بالالار اراسىندا شەبەرلىك ساعاتتارى مەن كۆاليفيكاتسيالىق تۋرنيرلەر ۇدايى ۇيىمداستىرىلىپ تۇرادى.

پرەزيدەنت دينارا ءسادۋاقاسوۆانى بىلتىر جىل سوڭىندا الماتىدا وتكەن الەم چەمپيوناتىندا شاحماتتىڭ راپيد تۇرىنەن كۇمىس مەدالعا قول جەتكىزۋىمەن تاعى دا قۇتتىقتاپ، شاحماتشىلارعا مەملەكەت تاراپىنان جان- جاقتى قولداۋ كورسەتىلەتىنىن اتاپ ءوتتى.

سونداي- اق قاسىم- جومارت توقايەۆ بەلگىلى شاحماتشىعا الداعى جارىستاردا ساتتىلىك تىلەدى.