قانىڭىز قانداي؟ - ءسىز دە سوندايسىز

None
استانا. قازاقپارات - ادامزاتتىڭ قانى ءتورت ءتۇرلى توپقا بولىنەتىنى بەلگىلى. قان توبىن انىقتاۋدىڭ اشىلعانىنا سالىستىرمالى تۇردە العاندا كوپ بولا قويعان جوق. ناقتى ايتقاندا، ونىڭ سىرىن 19 -عاسىردىڭ سوڭى مەن 20 -عاسىردىڭ باسىندا كارل لاندشتەينەر مەن يان يانسكي اشقان.

ودان بەرى عىلىمي زەرتتەۋلەر قان توبىنا بايلانىستى نەشە ءتۇرلى بولجامدار جاساپ كەلەدى.

سونىڭ بىرىندە ايتىلعانداي، ادامنىڭ مىنەزى، تاماقتانۋى، دەنساۋلىعى، تەمپەرامەنتى، تاعدىرى قان توبىنا بايلانىستى ما؟

قان توبى مەن ديەتا

عىلىمي زەرتتەۋلەر بويىنشا، ادامنىڭ قان توبى تورتكە: «0»، «А» ،«В» ،«АВ» بولىپ بولىنەتىنى بەلگىلى. بۇل قان توپتارى بىردەن پايدا بولماعان. ەۆوليۋسيالىق دامۋ ناتيجەسىندە ادامزاتتىڭ ءومىر ءسۇرۋ داستۇرىمەن بىرگە قورەكتەنۋى دە بىرتىندەپ وزگەرىپ وتىرعان. اقپاراتتى بىردەن-ءبىر ساقتاۋشى - سۋ ەكەنى دالەلدەنگەن. قان دا سۋ تەكتەس. ءبىزدىڭ قان توبىمىز سول اقپاراتتىڭ ءبارىن ساقتاپ قالعان، ياعني اتا-بابالارىمىز قانداي جاعدايدا ءومىر ءسۇردى، نەمەن قورەكتەندى، نەمەن اۋىردى دەگەندەي.

ماسەلەن، ەڭ العاش، شامامەن بۇدان 1-3 ميلليون جىل بۇرىن «0» قان توبى پايدا بولىپتى. ول كەزدە ادامزات تەك جابايى اڭ اۋلاپ، ىلعي ەت جەپ كۇن كورگەن، ەگىن شارۋاشىلىعىن مۇلدەم بىلمەگەن. سوندىقتان «0» (1-توپ) قان توبىنا جاتاتىندارعا ەتتى ۇزبەي جەۋ ءارى اڭشى بابالارى سياقتى سپورتپەن اينالىسۋ كەڭەس ەتىلەدى.

بۇدان شامامەن 100 مىڭداي جىل بۇرىن «А» (2-توپ) قان توبى پايدا بولعان. «А» توبىنا جاتاتىنداردىڭ اتا-بابالارى جەر يەلەنۋشىلەر مەن فەرمەرلەر بولعان. ياعني، ادامزات كوشپەندى ومىردەن وتىرىقشىلىققا كوشكەن كەزدە پايدا بولعان. بۇل كەزدە ادامزات ەگىن شارۋاشىلىعىن يگەرىپ، نەگىزگى تاماعىنا ارپا-بيداي، جارما، جەمىس-جيدەك سىندى وسىمدىكتەكتەستەردى تۇتىنعان. سوندىقتان، «А» قان توبىنا جاتاتىندار ەتتى شەكتەپ جەپ، نەگىزىنەن ۆەگاتارياندىققا كوشكەنى ءجون دەلىنەدى. ولارعا كۇش تۇسىرەتىن سپورتپەن شۇعىلدانۋعا بولمايدى، تەك تازا اۋادا جاياۋ ءجۇرۋ مەن بالىق اۋلاسا جەتىپ جاتىر.

«В» (3-توپ) قان توبى كەيىنىرەك، بۇدان ون مىڭ جىل بۇرىن پايدا بولعان، نەگىزىنەن ورتا ازيانىڭ مونگولويد كوشپەندىلەرىنە ءتان، بىرتىندەپ ەۋروپاعا تارالعان. ولار ەتپەن دە، وسىمدىكپەن دە قورەكتەنگەن، ءبىراق نەگىزگى تاماعى ءسۇت پەن سۇتتەن جاسالعان ونىمدەر بولعان. سوندىقتان، «В» قان توبىنا جاتاتىنداردىڭ ايران مەن ءسۇتتى، اعارعاننان جاسالعان ونىمدەردى ءجيى تۇتىنعانى ابزال. وي مەن دەنە ەڭبەگىن ۇنەمى ۇشتاستىرىپ وتىرۋ كەرەك. جاياۋ ءجۇرۋ مەن سۋدا ءجۇزۋ ولارعا وتە پايدالى.

ەڭ جاس قان توبى - «АВ» (4-توپ) بۇدان مىڭ جىل بۇرىن، باتىستىڭ جەر يەلەنۋشىلەرى مەن شىعىستىڭ كوشپەندىلەرىنىڭ تىعىز ارالاۋى ناتيجەسىندە پايدا بولعان. سوندىقتان «АВ» قان توبىنا جاتاتىنداردىڭ تاماق تالعاماۋىنا بولادى.

دارىگەرلەر مەن ديەتولوگتار اراسىندا اتالمىش تاماقتانۋ جۇيەسىنە بايلانىستى تالاس-تارتىس بولعانىمەن، نەگىزىنەن، مۇنىڭ كوپ جاعدايدا دۇرىستىعىن ەكى جاق تا مويىندايدى، ءبىراق ايتىلعانداي تاماقتانۋعا جۇيەلى تۇردە سالىنىپ كەتۋگە قارسى.

عىلىمي زەرتتەۋلەر بويىنشا، ادامزاتتىڭ 45 پايىزىنىڭ قانى «0» قان توبىنا جاتادى. جەر تۇرعىندارىنڭ 40 پايىزىنىڭ قانى «А» توبىن قۇرايدى. «В» توبى ادامزاتتىڭ 10 پايىزىندا بولسا، «АВ» توبى 5 پايىزدان اسپايدى. ال نەگە قان توبى بەسكە، ونعا ەمەس، تەك تورتكە بولىنەدى دەسەك، بۇعان جاۋاپ بەرۋگە قازىرگى مەديسينا عىلىمى دارمەنسىز. بۇل تۇرعىدا، ەندى ءبىر مىڭ جىلدان كەيىن ادامزات عارىشتى تولىق يگەرىپ، باسقا پلانەتاعا قونىس اۋدارسا، قارا، قوڭىر، اق، سارى ادامداردىڭ جاهاندانۋ ناتيجەسىندە ميداي ارالاسىپ، ءوزارا نەكەلەسۋىنەن پايدا بولعان پالەنبايىنشى ۇرپاعىندا بەسىنشى قان توبى پايدا بولۋى مۇمكىن دەگەن لوگيكالىق بولجام عانا ايتا الامىز.

قان توبى مەن سىرقات

قازىرگى دارىگەرلىك زەرتتەۋلەر بويىنشا، كەيبىر اۋرۋ-سىرقاۋ تۇرلەرى قان توبىنا دا بايلانىستى. ارينە، اۋرۋ تىكەلەي قان توبىنا ەمەس، اعزانىڭ گەنەتيكالىق جۇيەسىنە بايلانىستى ەكەنى انىق، تەك بۇل ورايدا سىرقاتتىڭ قانىنىڭ قاي توپقا جاتاتىنىن ءبىلىپ الىپ، سوعان وراي ەمدەۋ قاراستىرىلىپ وتىر.

سونىمەن:

«0» توبى - اسقازان، گيپەرتونيا، وتكە تاس بايلانۋ، قۇرت اۋرۋى مەن دەمىكپە سىرقاتتارىنا بەيىم نەمەسە شالدىعۋ قاۋپى جوعارى. سوندىقتان وتكىر جانە قىشقىل تاعامداردان اۋلاق بولعانى ابزال.

«А» توبى - گاستريت، جۇرەك، رەۆماتيزم، اسقازان جاراسى اۋرۋلارىنا بەيىم. اسىرەسە، جۇرەككە سالماق تۇسىرۋدەن قاشقانى ءجون.

«В» توبى - توق ىشەك جاراسى، ءزار جولدارى اۋرۋلارىنا بەيىم.

«АВ» توبى - نەۆروز، جۇقپالى اۋرۋلاردىڭ بارلىق تۇرىنە بەيىم.

قان توبى جانە مىنەز

قان توبىنىڭ مىنەزگە قاتىستىلىعىن جاپون عالىمدارى جاقسىلاپ زەرتتەگەن. ول جاقتا، ماسەلەن، مىناداي مازمۇنداعى حابارلاندىرۋدى ءجيى كورەسىز: «ءىرى كومپانياعا «В» (بۇل باسقا دا قان توبى بولۋى مۇمكىن) قان توبىنا جاتاتىن وفيس-مەنەدجەر قاجەت». كوردىڭىز بە، قىزمەتكەردى ىرىكتەۋدە ءبىلىمى مەن تاربيەسىنە، جاسى مەن قابىلەتىنە قوسا، قانىنىڭ قاي توپقا جاتاتىنى دا جاپوندار ءۇشىن ماڭىزدى.

1971- جىلى جاپوندىق دوكتور ماساحيكو نومي ادامنىڭ مىنەز-قۇلقىن قانىنا قاراپ انىقتاۋعا بولاتىنى تۋرالى كىتابىن جارىققا شىعاردى. بۇل كىتاپ ميلليونداعان دانامەن تاراعان.

جاپوندىق عالىمداردىڭ تەورياسىنا سايكەس، «0» قان توبىنا جاتاتىن ادامدار - ليدەرلەر، «А»- ماكسيماليستەر، «В»- ينديۆيدۋاليستەر، «АВ»- ويشىلدار. ياعني، «0» توبىنداعىلار، مىعىم، بەلسەندى، جىلدام قيمىلدايتىن، ەنەرگياعا باي، كوزدەگەنىنە جەتپەي تىنبايتىن وپتيميستەر. وتباسىندا، جۇمىستا بولسىن، ءبىرىنشى بولعىسى كەلەدى. دەگەنمەن، وزىمشىلدىگى، سىندى قابىلداي المايتىندىعى مەن تاكاپپارلىعى، ءمانساپقورلىعى كوپ نارسەدە كەدەرگى جاسايدى.

قانى ەكىنشى توپقا جاتاتىندار، كەرىسىنشە، بىرەۋدىڭ قول استىندا باعىنىشتى بولىپ جۇرگەندە عانا ءوزىن سەنىمدى سەزىنەدى. ولار سەرىكتەستىككە بەيىم، داۋ-جانجالدان اۋلاق جۇرەدى، تىنىشتىق پەن ءتارتىپتى سۇيەدى، وزىنەن گورى، ۇجىمنىڭ قامىن ويلايدى، جەتى رەت ولشەپ، ءبىر رەت كەسەدى. كەيدە اشۋشاڭدىعى دا بار. جان سارايىن جۇرتقا اشىپ، قۇپياسىن بولىسە بەرمەيدى. تۋمىسىنان رومانتيكتەر.

قانى ءۇشىنشى توپقا جاتاتىندار - ءوزى ءۇشىن ءومىر سۇرەتىندەر. ولاردىڭ كرەدوسى - بوستاندىق پەن ەشكىمگە باعىنىشتى بولماۋ. شىعارماشىلىق قابىلەتى جاقسى دامىعان، سابىرلى، ءتوزىمدى، قاي نارسەگە بولسىن وزىندىك كوزقاراسى بار، يدەياشىل، تاپقىر، تۇلعالىق قاسيەتكە يە بولىپ كەلەدى. دەگەنمەن، بەلسەندىلىگى تومەن. ا ق ش حالقىنىڭ 9 پايىزىنىڭ قانى وسى ءۇشىنشى توپقا جاتادى ەكەن. سونىڭ 40 پايىزى ميلليونەرلەر كورىنەدى.

قانى ءتورتىنشى توپقا جاتاتىندار مەيىرىمدى، سەزىمتال، رۋحاني باي، اينالاسىنا قامقور، جۇمساق مىنەزدى، شىنشىل بولىپ كەلەدى. ولاردىڭ السىزدىگى - ىشكى قايشىلىعى. سونىڭ كەسىرىنەن دەر كەزىندە شەشىم قابىلداي المايدى، جاڭالىق اتاۋلىعا ۇركە قارايدى. ميستيكاعا بەيىم، قيالي، جۇمباق بولىپ كەلەدى.

قان توبى جانە تاعدىر

جاستار ۇيلەنەردە بۇرىن گوروسكوپقا ۇڭىلسە، ەندى جۇبىنىڭ قانىنىڭ قاي توپقا جاتاتىنىن بىلۋگە ىنتىق. كەيبىرەۋلەر وزىنە ۇناپ تۇرعان ادامنىڭ قانى ءوزىنىڭ بولمىسىنا ساي كەلمەگەندىكتەن، بىرگە شاڭىراق كوتەرۋدەن باس تارتىپ تا جاتادى.

باقسى-بالگەرلەردىڭ ادامنىڭ قانىنىڭ قاي توپقا جاتاتىنىن ءبىلىپ الىپ، تاعدىرىنا بولجام جاساۋى سوڭعى كەزدە كوبەيە تۇسكەن. وسىلايشا، دارىگەرلىك فاكتى جالعان ەمشىلەردىڭ ادامداردىڭ سەنىمىنە كىرىپ، الداپ-اربايتىن قارۋىنا دا اينالا باستاعان.

سونىمەن، ءسىزدىڭ قانىڭىز قاي توپقا جاتادى؟ جوعارىداعى بولجامدار بولمىسىڭىزعا تۋرا كەلە مە؟ «قانىنا تارتپاعاننىڭ قارى سىنسىن» دەگەندە، بابالارىمىز نەنى مەڭزەدى ەكەن؟..

تورەعالي تاشەنوۆ

دەرەككوز: «ايقىن» گازەتى


سوڭعى جاڭالىقتار