نۇرلان يمام ورازانىڭ ءبىرىنشى كۇنىندە «جىبەك جولى» ەفيرىنە شىقتى - ۆيدەو
جارتى ساعاتتىق ەفير بارىسىندا كورەرمەننەن قالالىق، ۇيالى تەلەفون جانە الەۋمەتتىك جەلىلەر ارقىلى 1 مىڭنان اسا سۇراق كەلىپ ءتۇستى.
ولارعا نۇرلان يمام تولىققاندى جاۋاپ بەرۋگە تىرىستى.
ماسەلەن، كورەرمەننىڭ ءبىرى الەۋمەتتىك جەلى ارقىلى يمامنان ناماز وقىمايتىن ادامداردىڭ ورازا ۇستاۋىنا قاتىستى سۇراق قويدى.
«جالپى، حالقىمىز «مۇسىلماندىق استە-استە، دىننەن شىعۋ ءبىر پاستە» دەگەن. ادام بىرتە-بىرتە ۇيرەنەدى. ءبىرىنشى رەت ورازا ۇستاپ، العا قادام باسقان ادامعا «نيەتىڭ قابىل بولسىن!» دەگەن ءسوزدى ايتىپ، قولداپ-قۋاتتاي ءبىلۋىمىز كەرەك. «سەنىكى قابىل ەمەس» دەپ ارتىق-كەم سوزبەن پەندەشىلىككە سالىناتىن كەزىمىز بار. ورازا ۇستاعان ادامنىڭ نيەتىن قولداساق، وندا ول بۇگىن ورازا ۇستاپ، ەرتەڭ قۇلشىلىققا كەلە جاتار»، - دەپ جاۋاپ بەردى نۇرلان يمام.
ونىڭ اتاپ وتۋىنشە، حالقىمىزدا كەشكى اۋىزاشار كەزىندە دارەت الۋ ارقىلى اۋىز اشۋ ءداستۇرى قالىپتاسقان. ءبىراق، بۇل مىندەتتى ەمەس.
دارەت الماي-اق اۋىز اشا بەرۋگە بولادى. دارەت الۋ ناماز بەن قۇران ۇستاعان كەزدە عانا مىندەتتى.
«ورازانىڭ ءبىرىنشى شارتى - نيەت. سوندىقتان نيەتى دۇرىس بولعاندا عانا ورازا دۇرىس دەپ سانالادى. ال ارىقتاۋ، دەنساۋلىقتى كۇتۋ ءۇشىن ورازا ۇستاسا، وندا ول كەيىنگى ورىنعا سىرعيدى. ءبىرىنشى ورىندا قۇلشىلىق نيەتى تۇرۋى ءتيىس»، - دەدى ءدىن مامانى.
سونداي-اق ول «ورازا ۋاقىتىندا بىلمەستىكپەن ءدام تاتىپ قويسا، بايقاۋسىزدا بالاعات ءسوز ايتسا، ورازا بۇزىلا ما؟» دەگەن ساۋالعا جاۋاپ بەردى.
«بالاعات سوزدەردەن ورازا بۇزىلمايدى. ءبىراق، مۇسىلمان ادام بۇزىلمايدى ەكەن دەپ بوعاۋىز، بەيپىل سوزدەردى سويلەمەۋى كەرەك. قانشالىقتى بوعاۋىز نە بەيپىل سوزدەردى كوپ ايتساڭىز، بىرەۋ كورمەي تۇر دەپ بەيادەپ وعاش قىلىقتار جاسايتىن بولساڭىز، ورازانىڭ ساۋابى كەمي بەرەدى. ەڭ سوڭىندا ورازاڭىزدان تەك اشتىق قالادى. اللانىڭ الدىنا بارىپ، «مىناۋ مەنىڭ ورازام» دەگەندە ەشقانداي ساۋابى بولمايدى. تەك اشتىقپەن وتكەن ۋاقىت بولىپ سانالادى»، - دەدى نۇرلان يمام.
ايتا كەتەيىك، ەفير اياقتالعاننان كەيىن دە كورەرمەن تاراپىنان ءدىنتانۋشىعا 800 گە جۋىق سۇراق جولداندى.
اۆتور
مارلان جيەمباي