تىرناق ءوسىرىپ، گەلمەن بوياۋ زيان با - سانيتار دارىگەر جاۋابى

None
پەتروپاۆل. قازاقپارات - مانيكيۋر جاساعاندا قىز-كەلىنشەكتەر تىرناقتى گەل ارقىلى وسىرۋگە باسىمدىق بەرەدى.

ول تۇسىنىكتى دە، ادەمى بويالعان تىرناق ۇزاققا ساقتالادى، ونى كەز-كەلگەن سۇلۋلىق سالونىندا ىستەتۋگە بولادى. الايدا مامانداردىڭ پىكىرىنشە، گەل جابىنىن ءجيى قولدانۋ زيان، دەپ حابارلايدى قازاقپارات ءتىلشىسى.

گەل جابىنى نەيل ترەندكە اينالىپ، بىرنەشە جىلدان بەرى قىز-كەلىنشەكتەر اراسىندا ۇلكەن سۇرانىسقا يە. مانيكيۋردىڭ بۇل ءتۇرى قالتا كوتەرەرلىك، ەڭ باستىسى - ادەمىلىگىن ۇزاققا دەيىن ساقتايدى. ءبىراق، كوپشىلىك ونىڭ وڭ تۇستارىنان باسقا زياندى جاقتارى بارىن بىلە بەرمەيدى.

«گەل لاكتار ادەتتەگىدەن گورى ءتوزىمدى كەلەدى جانە تىرناق پلاستيناسىندا بىرنەشە اپتا بويى سىنبايتىنداي تىعىز ورنالاسادى. گەل جابىنى كادىمگى لاك سياقتى اۋادا وزدىگىنەن كەپپەيدى، ونى مىندەتتى تۇردە LED شامىنىڭ استىندا ۇستاپ، كەپتىرۋ قاجەت. گەلدى كەتىرۋگە 10-15 مينۋتقا دەيىن ۋاقىت جۇمسالادى.

ال گەل جاعىپ، كەپتىرگەننەن كەيىن تۇزەتۋلەر ەنگىزۋ مۇمكىن ەمەس، نە سول كۇيىندە ءجۇرۋ كەرەك، نە ءبارىن بىردەن الىپ تاستاۋ قاجەت.

ارتىقشىلىعى - جاعىمسىز ءيىسى جوق، مانيكيۋردىڭ ءۇش اپتاعا دەيىن ساقتالۋى، ادەمى جىلتىر ءتۇسىنىڭ بولۋى. جالپى، گەل جابىنى اكريلگە قاراعاندا ءتوزىمدى جانە يكەمدى دەپ سانالادى»، - دەيدى سولتۇستىك قازاقستان وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ كوممۋنالدىق وبەكتىلەردى باقىلاۋ جانە قاداعالاۋ ءبولىمىنىڭ جەتەكشى مامانى ايگۇل مۇرتاليموۆا.

ماماننىڭ ايتۋىنشا، گەل تىرناق پلاستيناسىن السىرەتۋى مۇمكىن. ۇزاق ۋاقىت مانيكيۋردىڭ وسى ءتۇرىن پايدالانعاندىقتان تىرناق جۇقارىپ، سەزىمتالدىعى ارتادى.

«تىرناق ورنى مەن كۋتيكۋلا - تىرناقتىڭ ەڭ ماڭىزدى ايماقتارى. ءبىرىنشىسى تىرناق پلاستيناسىنىڭ قورەكتەنۋىنە جاۋاپ بەرەدى، ال ەكىنشىسى قورعانىس فۋنكتسياسىن ورىندايدى. سوندىقتان گەل جابىنىن شەشىپ الاردا مۇمكىندىگىنشە مۇقيات بولۋ كەرەك. گەلدى كەتىرۋ ءۇشىن سالونعا بارىپ، ماماننىڭ كومەگىنە جۇگىنگەن ءجون. وزدىگىنەن جۇلىپ الۋ تىرناق پلاستيناسىن زاقىمدايدى، ال ول تەز قالپىنا كەلمەيدى، وعان ورتا ەسەپپەن جارتى جىل ۋاقىت كەرەك»، - دەيدى ايگۇل مۇرتاليموۆا.

گەل جابىنىن ءجيى پايدالانۋ تىرناقتىڭ قۇرىلىمىن بۇزادى، ىلعالدى جويىپ، كەپتىرىپ جىبەرۋى مۇمكىن. سوندىقتان گەل لاكتى ەكى-ءۇش ايدا ءبىر رەت، تىرناقتى «دەمالدىرىپ» قانا پايدالانعان ءجون.

«گەلدىك مانيكيۋر كەزىندە تىرناققا مۇقيات كۇتىم قاجەت. تىرناق ورنى مەن كۋتيكۋلاعا ارنايى ماي مەن ىلعالداندىرعىشتى جاعىڭىز. سونداي-اق، تىرناقتاردىڭ H2O تەپە-تەڭدىگىن قالىپقا كەلتىرەتىن جانە ولاردى پايدالى قورەكتىك زاتتارمەن بايىتاتىن لاكتاردى قولدانۋ پايدالى.

ال گەلدى كەپتىرۋگە ارنالعان شام قاۋىپتى مە، جوق پا؟ بۇل جايىندا پىكىر بۇرىننان ەكىگە ايىرىلعان. ويتكەنى، ۋلتراكۇلگىن ساۋلەنى قولدانسا، بۇل قولدىڭ تەرىسىنە عانا ەمەس، جالپى دەنساۋلىققا دا كەرى اسەر ەتەدى. الايدا، كوپتەگەن برەندتەر مەن كەي سۇلۋلىق سالوندارى بۇگىندە ولاردان باس تارتىپ، جارىقديودتى LED شامدارىن قولداناتىن بولعان. سوندىقتان قاۋىپسىزدىك ءۇشىن سالونعا بارعان كەزدە شەبەر ىسكە كىرىسپەي تۇرىپ، كورسەتىلەتىن قىزمەت جانە قولدانىلاتىن جابدىق جايىندا ەگجەي-تەگجەي سۇراپ، باسىن اشىپ العان دۇرىس»، - دەيدى سانيتار دارىگەر.

گەل جابىنى ۇزاققا دەيىن ساقتالۋى ءۇشىن بىرنەشە كەڭەستى ەستەن شىعارماعان ءجون.

«گەل جابىنى ىستىق سۋعا ءتوزىمسىز. مانيكيۋردى ۇزاق ۋاقىت ىستىق سۋدا ۇستاۋ - ودان قۇتىلۋدىڭ ەڭ جاقسى جولى. ىستىق ۆاننادا ۇزاق شومىلۋ نەمەسە مانيكيۋر جاساتقاننان كەيىن العاشقى كۇندەرى ساۋناعا بارۋ - جابىننىڭ بوساۋىنا اكەلۋى مۇمكىن، سوندىقتان ىدىس جۋعان كەزدە دە قولعاپ كيۋدى ۇمىتپاڭىز.

گەلدىك لاك تىرناق پلاستيناسىن بۇزباۋى ءۇشىن شەبەر ونى مانيكيۋرگە دۇرىس دايىنداپ، گەلدىك لاكتى قولدانۋ مەن الىپ تاستاۋ تەحنولوگياسىن ساقتاۋى قاجەت.

ءۇيدى حيميالىق زاتتارمەن تازارتىپ جۋعان كەزدە رەزەڭكە قولعاپ كيىڭىز، ويتكەنى بۇل ونىمدەردىڭ قۇرامىنداعى اگرەسسيۆتى كومپونەنتتەر تىرناق جابىندىسىنا اسەر ەتۋى مۇمكىن. بۇل ەرەجە مانيكيۋردى ۇزاق ساقتاۋعا عانا ەمەس، سونىمەن قاتار قول تەرىسىنىڭ تەز قارتايۋىنا جول بەرمەيدى.

گەلدىك لاك قولدانعاننان كەيىنگى العاشقى كۇنى ۇزاق سۋ پروتسەدۋرالارىنان، پارافين تەراپياسىنان اۋلاق بولىڭىز»، - دەيدى سانيتاريالىق- ەپيدەميولوگيالىق باقىلاۋ دەپارتامەنتىنىڭ جەتەكشى مامانى ايگۇل مۇرتاليموۆا.

اۆتور

اقەركە داۋرەنبەك قىزى

سوڭعى جاڭالىقتار