بەسىك جاساۋىنان ۇلتتىق ناقىشتى كورگىم كەلدى - اتىراۋلىق شەبەر

اتىراۋ. قازاقپارات - اتىراۋلىق شەبەر بەسىك جاساۋىن ۇلتتىق ناقىشپەن تىگەدى. «ءار تىگىستى جۇرگىزگەندە، بوبەككە قۋانىش سىيلاعانىن ىشتەي تىلەپ وتىرامىن» دەگەن قازاقپارات تىلشىسىنە گۇلزيا يسەمبايەۆا تىگىنشىلىككە بەت بۇرۋ سەبەبىمەن ءبولىستى.

گ. يسەمبايەۆانىڭ ايتۋىنشا، بۇرىن ونىڭ اۋلەتىندە تىگىنشىلىكپەن اينالىساتىندار بولماعان. ال ءوزى بىرنەشە جىل بۇرىن قۇرىلىس يندۋسترياسىندا ينجەنەر-ەكولوگ بولىپ جۇمىس ىستەگەن.

«تىگىنشىلىكتى قولعا العانىمدا، بۇل قادامىما تاڭدانىسپەن قاراعاندار كوپ بولدى. سەبەبى، بۇرىن مۇنداي ىسكە بەت بۇرۋ ويىمدا بولعان جوق ەدى. تۇڭعىش قىزىم بويجەتكەن سوڭ ماتەريالدىق، قارجىلىق يگىلىكتەر بالا قۋانىشىن الماستىرا المايتىنىن ۇعىندىق. سول كەزدە بالا سۇيسەك دەگەن ويعا بەكىندىك. وسىنى سەزگەن بولۋى كەرەك، قىزىم بەسىك تەربەتىپ وتىرعان انانىڭ سۋرەتىن سىيلادى. ءتىپتى، اعايىن- تۋىس، دوس- جاران بالالارىنا كىندىك شەشە بولۋىمدى وتىندىك. ەشقايسىسىنا قارسى بولمادىم. قولقا سالعانداردىڭ بوبەگىنە قاجەتتى دۇنيەلەردى ىزدەگەندە، ۇلتتىق ناقىشتاعى تۇرلەرى تابىلماعانىنا قىنجىلدىم. وسى ولقىلىقتىڭ ورنىن تولتىرۋ ءۇشىن قولىما ءىس تىگەتىن ماشينكا الىپ، بەسىك جاساۋىن تىگۋدى باستادىم»، - دەيدى گۇلزيا يسەمبايەۆا.

بۇل ءۇشىن بۇرىنعى جۇمىسىنان باس تارتقان. ءسويتىپ، ءوزى ديزاينەرلىكتى دە، تىگىنشىلىكتى دە مەڭگەرگەن.

ونىڭ شەبەر قولىنان شىققان بەسىك جاساۋىن تاپسىرىسپەن الدىراتىندار كوبەيگەن. تاپسىرىس بەرۋشىلەر بەسىك جاساۋىن اقش- تا ومىرگە كەلگەن نەمەرەسىنە، وڭتۇستىك كورەيادا ءوسىپ جاتقان جيەندەرىنە جىبەرگەن. رەسەي فەدەراتسياسىنىڭ استراحان، ورىنبور وبلىستارىنداعى قانداستاردان دا تاپسىرىس تۇسكەن.

«بەسىكتىڭ ءار جاساۋىن بار ىنتاممەن تىگۋگە تىرىسامىن. ويتكەنى، بەسىك جاساۋى كىشكەنتاي ءسابي ءۇشىن جايلى، اتا- اناسىنا، سول وتباسىنداعى ادامدارعا ۇنايتىنداي ادەمى بولۋى كەرەك. ۇلتتىق ناقىشتاعى ويۋدى سالۋ ءۇشىن ارنايى قۇرىلعىنى پايدالانامىن. وسى ءىستى قولعا العاندا، بەسىك جاساۋىنان ۇلتتىق ناقىشتى كورگىم كەلدى»، - دەيدى جەرگىلىكتى شەبەر.

تىگىنشىنىڭ ايتۋىنا قاراعاندا، ءسابي ءسۇيۋدى اڭساعان جۇپتار بەسىك جاساۋىن ساتىپ الادى ەكەن. كەيىن ءسۇيىنشى سۇراپ، قۋانىشىمەن بولىسكەندەرى بار.

«قازاق - ىرىمشىل حالىق. بەسىك جاساۋىن ىرىمداپ العاندار دا ءسابي سۇيگەنىن قالايمىن. سول سەبەپتەن، بۇل كاسىپتى تابىس كوزى ەمەس، ادامدار قۋانىش، باقىت سىيلاۋدىڭ جولى دەپ ەسەپتەيمىن»، - دەيدى گۇلزيا يسەمبايەۆا.

ەسكە سالايىق، بۇعان دەيىن اساۋ ۇيرەتىپ، ات ۇستىنەن ساداق اتاتىن اتىراۋلىق وقۋشى قىز تۋرالى جازعان ەدىك.

اۆتور

بەك مۇستافا