ارىستاردىڭ ايەل-بالاسىن تۇتقىنداعان قاي قۇجات؟

استانا. قازاقپارات - «حالىق جاۋى» اتانعانداردىڭ وتباسى مۇشەلەرىنە قولدانىلعان جازا تۇرلەرى «ايىپتىلاردىڭ» وزىنە قاراعاندا جەڭىلدەۋ بولدى ما؟ جازالاۋ تاسىلدەرى ن ك ۆ د-نىڭ قانداي قۇجاتى نەگىزىندە ىسكە اسىرىلدى؟

«وتانىن ساتقانداردىڭ وتباسى مۇشەلەرىنە» قاتىستى تۇتقىنداۋ شارالارى ب ك پ (ب) ورتالىق كوميتەتى ساياسي بيۋروسىنىڭ 1937- جىلدىڭ 5- شىلدەسىندەگى شەشىمىنە سايكەس بەلگىلەندى. وندا ۇكىمەتكە قارسى ارەكەت ەتكەن حالىق جاۋلارىنىڭ بارلىق ايەلدەرى مەن وتباسى مۇشەلەرىن بەس-سەگىز جىلعا لاگەرگە قاماۋ؛ قازاقستاننىڭ نارىن جانە تورعاي ولكەلەرىندە ارنايى تۇتقىنداۋ لاگەرلەرىن ۇيىمداستىرۋ؛ لاگەردە بولاتىن وڭشىل-تروسكيستىك شپيوندار ايەلدەرىنىڭ جازا وتەۋ ءتارتىبىن بەلگىلەۋ؛

حالىق جاۋلارىنىڭ 15 جاسقا دەيىنگى جەتىم بالالارىن سوتتاعاننان كەيىن مەملەكەتتىڭ قامقورلىعىنا الۋ جانە 15 تەن اسقان بالالاردىڭ ماسەلەسىن جەكە قاراۋ؛ حالىق جاۋلارىنىڭ بالالارىن ماسكەۋ، لەنينگراد، كيەۆ، تيفليس، مينسك، تەڭىز جاعالاۋى قالالارى جانە شەكاراداعى قالالاردان اۋلاقتاعى ارنايى ينتەرناتتاردا تاربيەلەۋ قاراستىرىلدى. كەيىن بۇل قۇجات وزگەرتىلىپ، سوتتالعانداردىڭ بارلىق وتباسى مۇشەسى ەمەس، ايەلدەرى مەن بالالارى عانا تۇتقىندالاتىن بولدى. «جاۋلاردىڭ» بۇرىنعى ايەلدەرى كونتررەۆوليۋسيالىق ارەكەتتەرگە قاتىسسا عانا، ال 15 تەن اسقان بالالارى قاۋىپتى دەپ تانىلسا عانا تۇتقىندالدى.