استاناداعى كۇيشى- كومپوزيتورلار اللەياسىندا دومبىرا ءمۇسىنى ورناتىلدى

استانا. قازاقپارات - ەلوردادا داۋىلپاز كۇيشى دينا نۇرپەيىسوۆانىڭ ەسكەرتكىشى جانىندا ۇلىستىڭ ۇلى كۇنى - ناۋرىز مەيرامى تويلاندى، دەپ حابارلايدى قازاقپارات ءتىلشىسى.

ناۋرىز مەيرامى باتا بەرۋ راسىمىمەن باستالدى. يگى شاراعا جينالعان جۇرتشىلىققا قالا تۇرعىنى، ەڭبەك ارداگەرى وتەگەن ءناسىپ ۇلى اق باتاسىن بەردى.

بۇگىن كۇيشى- كومپوزيتورلار اللەياسىندا قازاقتىڭ ۇلتتىق اسپابى - دومبىرانىڭ ءمۇسىنى ورناتىلدى. قادىرمەندى مەيمان رەتىندە دومبىرا ءمۇسىنىنىڭ اشىلۋ سالتاناتىنا قاتىسقان حالىق قاھارمانى، عارىشكەر توقتار اۋباكىروۆ قۇتتىقتاۋ ءسوز سويلەدى. ول ۇلتتىق قۇندىلىقتارىمىزدى جانە قازاقتىڭ كيەلى دومبىراسىن قادىرلەۋ مەن ناسيحاتتاۋ باعىتىنداعى جۇمىستارعا ءبارىمىز دە اتسالىسۋىمىز قاجەت ەكەنىن ايتتى. وسكەلەڭ ۇرپاق حالقىمىزدىڭ تاريحى مەن رۋحاني- مادەني بايلىعىن ساناسىنا سىڭىرە ءبىلۋى ءۇشىن وسىنداي باستامالار جالعاسىن تابا بەرەتىنى جونىندە پىكىر ءبىلدىردى.

جينالعان قاۋىم اتىنان ت. اۋباكىروۆتىڭ يىعىنا وقالى شاپان جابىلدى. ءوز كەزەگىندە توقتار وڭعارباي ۇلى كورسەتىلگەن قۇرمەتكە ريزاشىلىعىن ءبىلدىرىپ، «ەلىمىزدى كوركەيتۋ جولىندا قىزمەت ەتىپ جۇرگەن جاستار حالىقتىڭ العىسىنا بولەنەتىن بولسىن» دەگەن نيەتپەن وزىنە بەرىلگەن شاپاندى استانا قالاسى الماتى اۋدانىنىڭ اكىمى ماقسات سامات ۇلىنا تارتۋ ەتتى.

«استانا قالاسى اكىمدىگىنىڭ قولداۋىمەن دينا ەسكەرتكىشى ماڭىندا مۋزىكالىق سۋبۇرقاق ورناتۋ جوسپارىمىز بار. بۇل جەر دەمالىس ايماعىنا اينالماق. 24 ساعات بويى قازاق كومپوزيتورلارىنىڭ كۇيلەرى مەن اندەرى ورىندالاتىن بولادى. ءار ازامات ءوزىن قازاق ەلىنىڭ ازاماتى ەكەنىن سەزىنۋى ءۇشىن وسىنداي ىستەر قولعا الىنىپ جاتىر. ونەر ۇجىمدارىنىڭ كۇي تارتۋىنا ارنالعان اشىق ساحنا الاڭىن سالۋ كوزدەلىپ وتىر. يگى باستامانى قولداعان سىزدەرگە كوپ راقمەت»، - دەدى «كۇي اناسى» رەسپۋبليكالىق قورىنىڭ جەتەكشىسى تولەگەن قۋانىشيەۆ.

قوعام قايراتكەرى، جۋرناليست سەرىك ەرعالي حالقىمىز ءۇشىن ناۋرىز مەيرامىنىڭ ماڭىزى ەرەكشە ەكەنىن ايتا كەلىپ، ءتول ونەرىمىز بەن ۇلتتىق اسپاپتارىمىزدى دارىپتەپ، جاس ۇرپاققا جەتكىزۋگە ءبارىمىز دە ۇلەس قوسۋىمىز قاجەتتىگىن اتاپ ءوتتى.

ەل ازاماتتارى كۇيشى، كومپوزيتور دينا نۇرپەيىسوۆانىڭ ەسكەرتكىشىنە گۇل شوقتارىن قويىپ، رۋحىنا تاعزىم ەتتى.

قازاقستاننىڭ ەڭبەك سىڭىرگەن قايراتكەرى، پروفەسسور، كۇيشى- ۇستاز ورىنباي دۇيسەن قولىنا دومبىرا الىپ، دينانىڭ «تويباستار» كۇيىن تارتىپ، كورەرمەننىڭ ىستىق ىقىلاسىنا بولەندى.

ۇلتتىق مەرەكەگە وراي، مادەني ءىس- شارانى استانا قالاسى الماتى اۋدانىنىڭ اكىمدىگى، «ۇلتتىق مۇددە كەڭەسى» قوعامدىق بىرلەستىگى جانە «كۇي اناسى» رەسپۋبليكالىق قورى ۇيىمداستىردى.

اۆتور

عايساعالي سەيتاق