رۋحاني كەمەلدەنۋ ايى - بۇگىن ورازانىڭ ءبىرىنشى كۇنى
ءساۋىر ايىنىڭ 17-نەن 18-ىنە قاراعان ءتۇن - قاسيەتتى قادىر ءتۇنى، 21- ءساۋىر - ورازا ايت مەرەكەسى.
ورازا - ءبىر نارسەدەن الىستاۋ، بەلگىلى ءبىر ۋاقىت ارالىعىندا ءىشىپ- جەۋدەن، ءناپسى قالاۋلارىنان تىيىلۋ دەگەندى بىلدىرەدى.
سارەسىن ءىشۋ تاڭ نامازىنىڭ ۋاقىتى كىرۋىنە 10 مينۋت قالعاندا توقتاتىلادى. ورازا تۇتۋ - مۇسىلمان قاۋىمىنىڭ بەس پارىزىنىڭ ءبىرى.
قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى وتانداستاردى رامازان ايىنىڭ كەلۋىمەن قۇتتىقتادى.
«شاريعات بويىنشا باليعاتقا تولعان، اقىل- ەسى دۇرىس ءاربىر مۇسىلمانعا رامازان ايىندا ورازا ۇستاۋ - پارىز. الايدا جولاۋشىلار، ناۋقاس جاندار مەن سىرقاتى اسقىنىپ كەتۋىنەن قاۋىپتەنگەن ادامدار، جۇكتى نەمەسە ەمىزۋلى بالاسى بار ايەلدەر ورازا ۇستاۋدى كەيىنگە قالدىرۋىنا بولادى. بۇعان شاريعاتىمىز رۇقسات بەرەدى. رامازان ايىنىڭ قادىر- قاسيەتىن تەرەڭ تۇسىنگەن ىزگىلەر «راببىمىز، ءبىزدى رامازان ايىنا امان- ەسەن جەتكىزە گور!» دەپ دۇعا جاساعان. سان عاسىردان بەرى يسلام ءدىنىن رۋحاني تىرەگى ەتكەن حالقىمىز بەرەكەلى رامازان ايىن ەرەكشە دايىندىقپەن كۇتەدى. ساۋاپتار ەسەلەنىپ جازىلاتىن ايدا اۋىزاشار بەرىپ، كومەككە مۇقتاج جاندارعا ءپىتىر ساداقاسىن ۇلەستىرىپ، ۇلكەندەردىڭ العىسى مەن باتاسىن الۋعا تىرىسادى. ورازادا يگى نيەتپەن ورىندالاتىن ىزگى امالدار بۇگىندە سالت- داستۇرىمىزگە اينالىپ، ۇرپاقتان- ۇرپاققا جالعاسىپ كەلەدى»، - دەدى ناۋرىزباي قاجى تاعان ۇلى.
سونداي- اق، باس ءمۇفتي رامازاندا اۋىز بەكىتكەن ءيسى مۇسىلمان بالاسى ءوزىن ءىشىپ- جەۋدەن عانا شەكتەمەي، جانى مەن ءتانىن جاماندىقتان ساقتاپ، ىزگىلىككە ۇمتىلاتىنىن جەتكىزدى.
ويتكەنى رامازان - كەز كەلگەن ىزگى امالدى رياسىز نيەتپەن جاساۋعا تاربيەلەيتىن، ادامدى تاقۋالىققا ۇيرەتەتىن اي.
بيىلعى ءپىتىر ساداقاسى جان باسىنا 535 تەڭگە بولىپ بەكىتىلدى. ءپىتىر ساداقاسى مولشەرى ەلىمىز بويىنشا ەكى كەلى ۇننىڭ ورتاق باعاسى نەگىزىندە بەلگىلەندى. ءپىتىر ساداقاسىن قۇرما، مەيىز باعاسىمەن بەرۋگە بولادى.
اۆتور
ايجان سەرىكجان قىزى