استانادا العاش رەت جىرشى-تەرمەشىلەردىڭ حالىقارالىق فەستيۆالى ءوتتى

استانا. قازاقپارات - استانادا جىرشى-تەرمەشىلەردىڭ حالىقارالىق فەستيۆالى ءوتتى. وعان قازاقستان، وزبەكستان جانە قىرعىز ەلىنەن جىرشى-جىراۋلار قاتىستى.

قازاقپارات بۇل تۋرالى قازاقستان رەسپۋبليكاسى مادەنيەت جانە سپورت مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

فەستيۆالگە قاتىسقان قازاقستاننىڭ ەڭبەك سىڭىرگەن قايراتكەرلەرى: الماس الماتوۆ، ايگۇل قوسانوۆا، ەلمۇرا جاڭابەرگەنوۆا، مادەنيەت قايراتكەرى ەربولات شالدىبەكوۆ، مادەنيەت سالاسىنىڭ ۇزدىكتەرى: ەلىكباي يسا، فارحات ورازوۆ، قايرات كاكىموۆ، حالىق جىرشىسى جانىبەك پيازوۆ، توعايەۆ باحشيكۋل (وزبەكستان رەسپۋبليكاسى)، قىرعىزستان رەسپۋبليكاسىنىڭ ەڭبەك سىڭگەن ءارتيسى سىدىكوۆ دوولوتبەك جانە تاعى دا باسقا ونەر مايتالماندارى تانىمال جىر، تەرمە، تولعاۋ، داستانداردى ورىندادى.

«جىراۋلىق، جىرشىلىق ونەر - حالقىمىزدىڭ مىڭجىلدىق مادەني مۇراسى. فەستيۆالدى ۇيىمداستىرۋداعى باستى ماقسات - اتادان بالاعا ميراس بولىپ جەتكەن ۇلتتىق ونەردى دارىپتەۋ، باۋىرلاس تۇركى حالىقتارىمەن مادەني ىنتىماقتاستىقتى نىعايتۋ بولىپ تابىلادى. مادەنيەت جانە سپورت مينيسترلىگى جاستاردى جىراۋلىق ونەرگە باۋلىپ، ونىمەن عىلىمي تۇرعىدا اينالىسۋى ءۇشىن بارلىق مۇمكىندىكتەردى جاسايتىن بولادى»، - دەدى مادەنيەت جانە سپورت ۆيتسە-ءمينيسترى نۇرعيسا داۋەشوۆ.