ناۋرىزدى جاقسىلىق پەن جاسامپازدىققا ۇمتىلۋدىڭ نىشانى دەپ قابىلدايمىز - سەنات ءتوراعاسى

استانا. قازاقپارات - پارلامەنت سەناتىنىڭ ءتوراعاسى ماۋلەن اشىمبايەۆ قازاقستان حالقىن ءاز-ناۋرىز مەيرامىمەن قۇتتىقتادى، دەپ حابارلايدى قازاقپارات.

«قۇرمەتتى دوستار! بارشاڭىزدى ناۋرىز مەيرامىمەن شىن جۇرەكتەن قۇتتىقتايمىن!

ءاز-ناۋرىز - قۋانىش پەن شاتتىقتىڭ، جاڭارۋ مەن جاڭعىرۋدىڭ مەرەكەسى. تەرەڭنەن تامىر تارتاتىن بۇل مەيرامدى جاقسىلىق پەن جاسامپازدىققا ۇمتىلۋدىڭ نىشانى دەپ قابىلدايمىز. ۇلىستىڭ ۇلى كۇنىندە ۇلتتىق قۇندىلىقتارىمىز تورگە شىعىپ، سالتىمىز بەن ءداستۇرىمىز دارىپتەلەدى.

شىن مانىندە، حالقىمىز ناۋرىز ايىن جىلدىڭ باسى دەپ قاشاندا ەرەكشە كوڭىل-كۇيمەن قارسى العان. وسى كۇندەرى اعايىن-تۋىستىڭ باسى قوسىلىپ، بۇلاقتىڭ كوزىن اشۋ، اعاش وتىرعىزۋ سياقتى ىزگى امالدار جاسالعان. مۇنىڭ ءبارى - ەلدىڭ ىرىسىن ارتتىرىپ، ىنتىماعىن نىعايتاتىن، ۇرپاقتى تاتۋلىق پەن تازالىققا ۇندەيتىن يگى ىستەر»، - دەپ جازدى م. اشىمبايەۆ Facebook-تەگى جەكە پاراقشاسىندا.

سەنات سپيكەرى تاعىلىمى زور، ونەگەسى مول وسىنداي مەرەكەدە ءار شاڭىراققا اماندىق پەن باق-بەرەكە تىلەدى.

ايتا كەتەيىك، ۇلىستىڭ ۇلى كۇنى - ناۋرىز مەيرامى قازاقستاندا 21-23- ناۋرىز كۇندەرى ارالىعىندا اتاپ وتىلەدى. بۇل كۇندەر مەرەكەلىك دەمالىس سانالادى.