جەر سىلكىنىسىنىڭ قايتالانۋى تۋرالى اقپارات جالعان - ت ج د

تۇركىستان. قازاقپارات - تۇركىستان وبلىسى ت ج د جەر سىلكىنىسىنىڭ قايتالانۋى تۋرالى اقپاراتتىڭ جالعان ەكەندىگىن مالىمدەدى، دەپ حابارلايدى قازاقپارات ءتىلشىسى.

الەۋمەتتىك جەلىدە جەر سىلكىنىسىنىڭ قايتالاناتىندىعى تۋرالى اقپارات تارادى. وندا ءوزىن مىرزاكەنتتەگى اسكەري ءبولىم قىزمەتكەرىمىن دەپ تانىستىرعان ەر ادام جەر سىلكىنىسىنىڭ قايتالاناتىندىعىن ايتقان. ءتىپتى، جەر سىلكىنىسى كۇشتى بولاتىندىعىن ەسكەرتىپ، قاجەتتى قۇجاتتاردى الىپ، ۇيىقتاماي كۇتىپ وتىرۋ كەرەكتىگىن حابارلاعان.

ال، تۇركىستان وبلىسىنىڭ تجد مۇمكىن بولاتىن جەر سىلكىنىسى تۋرالى اقپارات جالعان ەكەندىگىن مالىمدەدى.

«تۇرعىنداردان ۇرەيلەنبەي تىنىشتىق ساقتاۋدى، تەك رەسمي اقپاراتتى وقۋىن سۇرايمىز»، - دەلىنگەن اقپاراتتا.

ارادا جارتى ساعات وتكەندە جالعان اقپارات تاراتقان ماقتاارال اۋداندىق شەكارا باسقارماسىنىڭ كەلىسىم شارت بويىنشا قىزمەتكەرىنىڭ كوپشىلىكتەن كەشىرىم سۇراعان اۋديوسى تارادى. قاتتى قورقىپ قالعانىن ايتقان ول تەك تۋىستارىنا عانا ەسكەرتپەك بولعانىن جەتكىزگەن.

جەر سىلكىنىسىنەن تۇركىستان قالاسىنىڭ دا تۇرعىندارى ۇرەيلەنىپ قالعان. تۇنگى مەزگىلگە قاراماستان، قالا اكىمىنىڭ ورىنباسارى بايدۋللا ورازبەكوۆ جانە قالالىق توتەنشە جاعدايلار جونىندەگى باسقارما مەن پوليتسيا باسقارماسىنىڭ وكىلدەرى كوپقاباتتى ۇيلەردىڭ اۋلالارىن ارالاپ، تۇرعىندارعا ءتۇسىندىرۋ شارالارىن جۇرگىزۋدە.

جەر سىلكىنىسىنە قاتىستى توتەنشە جاعداي قىزمەتىنىڭ مالىمدەمەسىنەن تىس تارالعان حابارلامالاردىڭ شىندىققا جاناسپايتىنىن ايتىپ، ۇرەيگە بوي الدىرماۋعا شاقىردى.

ايتا كەتەيىك، بۇدان بۇرىن اۋعانستانداعى جەر سىلكىنىسى تاراز بەن شىمكەنتكە سەزىلگەنىن جازعان بولاتىنبىز.