جانقوش تۇراروۆ جەكپە-جەگى جايىندا پىكىر ءبىلدىردى

الماتى. قازاقپارات - الماتىدا وتكەن بوكس كەشىندەگى تيتۋلدىق جەكپە-جەكتە جەڭىسكە جەتكەن قازاقستاندىق سپورتشى جانقوش تۇراروۆ كەزدەسۋى جايىندا پىكىرىن ءبىلدىردى، دەپ حابارلايدى قازاقپارات ءتىلشىسى.

قازاقستاندىق جانقوش تۇراروۆ (26-0، 19 ك و) تيتۋلدىق جەكپە-جەكتە مەكسيكالىق الەحاندرو مەنەسەستى تىزە بۇكتىردى.

«ماعان قولداۋ بىلدىرگەن بارلىعىڭىزعا العىس ايتامىن. سىزدەردىڭ قولداۋلارىڭىز مەنى جەڭىسكە جەتەلەدى. سونىڭ ارقاسىندا چەمپيوندىق اتاققا قول جەتكىزدىم. بارلىعىعىزعا ۇلكەن العىس. چەمپيون اتانۋ - ءاربىر سپورتشىنىڭ ارمانى. ەكى جىل بۇرىن جەكپە جەكتە قولىمنان جاراقات الدىم. ءۇشىنشى راۋندتا تاعى ءبىر جاراقات بولدى. بولاشاقتا بۇدان دا جاقسى ويىن كورسەتەتىنىمە سەنەمىن. سىزدەردىڭ سەنىمدەرىڭىزدى اقتايمىن»، - دەدى ول جەكپە-جەكتەن كەيىن.

ايتا كەتسەك، قازاقستاندىق بوكسشىنىڭ قارسىلاسى توعىزىنشى راۋندتان كەيىن جارىستى جالعاستىرۋدان باس تارتتى.