بۇگىن - ۇلىستىڭ ۇلى كۇنى - ناۋرىز مەيرامى

استانا. قازاقپارات - قازاقستاندىقتار ناۋرىز مەرەكەسىن تويلاپ جاتىر، دەپ حابارلايدى قازاقپارات ءتىلشىسى.

ناۋرىز - جىل باسى ءارى كوكتەم مەرەكەسى رەتىندە ەرتەدەن اتاپ ءوتىلىپ كەلەدى. بۇل مەرەكە بارشا تۇركى حالىقتارىنا ءتان.

ناۋرىز مەرەكەسىنىڭ پايدا بولۋى مەن تويلاۋ داستۇرىنە بايلانىستى ءتۇرلى مالىمەتتەر مەن بولجامدار بار.

داستۇرگە ساي بۇل كۇنى ادامدار ءبىر-ءبىرىن ۇلىستىڭ ۇلى كۇنىمەن قۇتتىقتاپ، يگى تىلەكتەرىن جاۋدىرىپ، قوناقجايلىلىق تانىتادى.

سونىمەن قاتار ناۋرىز مەيرامىندا ءبىرقاتار سالت- ءداستۇر مەن ادەت- عۇرىپتار جاڭعىرا تۇسەدى. مەرەكەنىڭ تاعى ءبىر ەرەكشەلىگى وسى كۇنى رەنىشى، وكپەسى بولعان ادامدار ءبىر-ءبىرىن كەشىرىپ، قايتا قاۋىشادى.

بۇل مەيرامدا ايتىلاتىن تىلەكتەردىڭ ورنى بولەك. جۇرتشىلىق «ۇلىستىڭ ۇلى كۇنى قۇتتى بولسىن!»، «اق مول بولسىن!»، «كوڭىلدە كىر قالماسىن»، «ءاز ناۋرىز قۇت-بەرەكە اكەلسىن» دەپ اعىنان جارىلىپ جاتادى.

ودان بولەك، مەرەكەلىك ءىس-شارالارمەن قاتار ۇلتتىق سپورت جانە ويىن-ساۋىق ۇيىمداستىرىلادى.

ك س ر و داۋىرىندە ناۋرىز مەيرامىن تويلاۋعا تىيىم سالىندى. 1991-جىلى 15- ناۋرىزدا قازاق س س سر پرەزيدەنتى نۇرسۇلتان نازاربايەۆتىڭ جارلىعى شىعىپ، «ناۋرىزدىڭ 22 ءسى - حالىقتىق مەرەكە «ناۋرىز مەيرامى» بولىپ جاريالاندى.

وسىلايشا اتالعان مەيرام ەلىمىزدە 32 جىل بويى رەسمي تۇردە تويلانىپ كەلەدى. ايتا كەتسەك، 2009-جىلدان باستاپ ناۋرىز مەكەرەسى 3 كۇن بويى اتاپ وتىلەدى.

بيىل مادەنيەت جانە سپورت مينيسترلىگى TikTok پلاتفورماسىمەن بىرلەسىپ ناۋرىز مەيرامىنا وراي ونلاين-فەستيۆال وتكىزبەك. قوسىمشانى پايدالانۋشىلار #ناۋرىز2023 حەشتەگىمەن ۇلتتىق مەيرام، ونىڭ ەرەكشەلىكتەرى مەن ادەت-عۇرىپتارى تۋرالى ۆيدەوروليكتەر ءتۇسىرۋى ءتيىس.

TikTok چەللەندجگە تانىمال كونتەنت-مەيكەرلەر، مۋزىكانتتار، اسپازدار، ساياحاتشى بلوگەرلەر مەن تانىمدىق ۆيدەو اۆتورلارى قاتىسىپ جاتىر.

سونىمەن قاتار ەلوردادا ناۋرىز مەرەكەسىنە وراي جۇزدەن استام شارا وتەدى دەپ جوسپارلانىپ وتىر. قالانىڭ 4 اۋدانىندا ناۋرىز مەيرامى اتالىپ وتەتىن 23 ورىن انىقتالدى. تۇرعىندار مەن استانا قوناقتارى كونتسەرتتەرگە، مەرەكەلىك باعدارلامالارعا، قويىلىمدارعا، ۇلتتىق سپورت تۇرلەرى بويىنشا جارىستارعا قاتىسا الادى.

21-23- ناۋرىز كۇندەرى ەلوردانىڭ بارلىق اۋداندا، سونىڭ ىشىندە قالا ماڭىنداعى ەلدى مەكەندەردە «ناۋرىز دۋمان» مادەني-بۇقارالىق شارالارى ۇيىمداستىرىلادى.