قازاقستان-قىتاي شەكاراسىنداعى بەكەتتەر تيىمدىلىگىن ارتتىرۋ جونىندەگى جوسپار تالقىلاندى

استانا. قازاقپارات – ق ر پرەمەر-ءمينيسترى ءاليحان سمايىلوۆتىڭ توراعالىعىمەن وتكەن كەڭەستە قازاقستان-قىتاي شەكاراسىنداعى باقىلاۋ- وتكىزۋ بەكەتتەرىنىڭ تيىمدىلىگىن ارتتىرۋ جونىندەگى شارالاردى ىسكە اسىرۋ بويىنشا ماسەلەلەر تالقىلاندى، دەپ حابارلايدى ق ر ۇكىمەتىنىڭ باسپا ءسوز قىزمەتى.

ق ر ق م مەملەكەتتىك كىرىستەر كوميتەتىنىڭ باسشىسى دانيار جانالينوۆ قابىلدانعان شارالاردىڭ ناتيجەسىندە سوڭعى اپتادا «نۇر جولى» بەكەتىنىڭ وتكىزۋ قابىلەتتىلىگى ەداۋىر ارتقانىن باياندادى. اتاپ ايتقاندا، 19-ناۋرىزدا ق ح ر-دان ق ر عا 680 نەن استام جۇك كولىگى (13-ناۋرىزدا شامامەن 150 كولىك)، ال ق ر-دان ق ح ر-عا 140 قا جۋىق كولىك وتكەن. شەكاراداعى كەزەك العاشقى كۇندەرى ناقتى 300 كولىكتەن 20-ناۋرىزداعى جاعداي بويىنشا شامامەن 70 كولىككە دەيىن ازايدى. قازاقستان جاعىندا كوبىنە قىتاي ۆيزالارىن الۋدى كۇتىپ وتىرعان تاسىمالداۋشىلار باسىم.

پرەمەر-مينيستر سىرتقى ىستەر مينيسترلىگىنىڭ كومەگىمەن بۇل پروتسەستى جەدەلدەتۋ، سونداي- اق قازاقستاندىق كومپانيالاردى حالىقارالىق تاسىمالدارعا شىعۋىن وڭايلاتۋ جونىندەگى شارالاردى قابىلداۋ قاجەتتىگىن اتاپ ءوتتى.

سونىمەن قاتار ءاليحان سمايىلوۆ شەكارالىق باقىلاۋ-وتكىزۋ بەكەتتەرىندەگى ەلەكتروندىق كەزەكتى قالىپتاستىرۋ تاسىلدەرىن قايتا قاراۋدى جانە وڭتايلاندىرۋدى تاپسىردى. ونىڭ ايتۋىنشا، بۇل پروتسەستى اشىق ءارى ءتيىمدى جۇرگىزۋ ءۇشىن «اتامەكەن» ۇ ك پ-نى تارتۋ كەرەك.