بەيجىڭدە قىتايلىق ستۋدەنتتەر اراسىندا قازاق ءتىلىن مەڭگەرۋ بويىنشا العاشقى بايقاۋ ءوتتى
20 ناۋرىز, 19:56

بەيجىڭدە قىتايلىق ستۋدەنتتەر اراسىندا قازاق ءتىلىن مەڭگەرۋ بويىنشا العاشقى بايقاۋ ءوتتى

استانا. قازاقپارات - قازاقستاننىڭ قىتايداعى ەلشىلىگى بەيجىڭ شەت تىلدەر ۋنيۆەرسيتەتىمەن بىرلەسىپ، بەيجىڭ، شانحاي جانە سيان شەت تىلدەرى ۋنيۆەرسيتەتتەرىندە وقيتىن قىتايلىق ستۋدەنتتەر اراسىندا قازاق ءتىلىن ءبىلۋ بويىنشا العاشقى بايقاۋ ۇيىمداستىردى.

ءىس-شاراعا ق ح ر ورتالىق ۇلتتار ۋنيۆەرسيتەتىنىڭ ستۋدەنتتەرى دە قاتىستى، دەپ حابارلايدى قازاقپارات قازاقستاننىڭ قىتاي حالىق رەسپۋبليكاسىنداعى ەلشىلىگىنىڭ رەسمي سايتىنا سىلتەمە جاساپ.

photo

بايقاۋعا قاتىسۋشىلارعا ارناعان سوزىندە قازاقستاننىڭ قىتايداعى ەلشىسى شاحرات نۇرىشيەۆ قازاقستان مەن قىتايدىڭ ستۋدەنتتەر اراسىنداعى مادەني-گۋمانيتارلىق بايلانىستار مەن الماسۋلاردى تەرەڭدەتۋگە باعىتتالعاندىعى تۋرالى حابارلادى. ول قىتايلىق ستۋدەنتتەردىڭ قازاق ءتىلىن ۇيرەنۋى ەلدەرىمىز اراسىنداعى ەكىجاقتى قارىم-قاتىناستاردىڭ دامۋىنا جاڭا قوسىمشا سەرپىن بەرەتىنىن اتاپ ءوتتى.

photo

بايقاۋ اياسىندا قازاقستاندىق ديپلومات بەيجىڭ شەت تىلدەر ۋنيۆەرسيتەتى پارتيا كوميتەتىنىڭ حاتشىسى ۆان دينحۋامەن كەزدەسۋ وتكىزىپ، ونىڭ بارىسىندا ءبىلىم بەرۋ سالاسىنداعى ىنتىماقتاستىق پەرسپەكتيۆالارى، قازاقستاندىق جوعارى وقۋ ورىندارىمەن ارىپتەستىك قارىم-قاتىناستار ورناتۋ ماسەلەلەرى، سونداي-اق قازاقستاندىق ستۋدەنتتەر مەن وقىتۋشىلاردى وسى ۋنيۆەرسيتەتتە وقىتۋ جانە تاعىلىمدامادان وتكىزۋ مۇمكىندىگى تالقىلاندى.

photo

ءىس-شارا قورىتىندىسى بويىنشا قىتايدىڭ ءبىرقاتار ۋنيۆەرسيتەتتەرى جىل سايىن قازاق ءتىلى بايقاۋىن وتكىزۋگە قىزىعۋشىلىق تانىتتى. سونىمەن قاتار، قاتىسۋشىلار وسىنداي ءىس- شارالاردىڭ ءىس جۇزىندەگى پايداسىن اتاپ ءوتتى. جۇلدەلى ورىنداردىڭ يەگەرلەرىنە قازاقستان ەلشىلىگىنىڭ اتىنان گراموتالار، سونداي-اق ەستەلىك سىيلىقتار مەن كادەسىيلار تابىس ەتىلدى.

photo

ايتا كەتەيىك، 2015-جىلدان باستاپ قىتايدىڭ ءبىرقاتار جوعارى وقۋ ورىندارىندا (بەيجىڭ، شانحاي، داليان جانە سيان قالالارى) ق ر- دىڭ ق ح ر- داعى ەلشىلىگىنىڭ قولداۋىمەن اشىلعان «قازاقستان ورتالىقتارى» جۇمىس ىستەيدى.

2016-جىلدان باستاپ بەيجىڭ، شانحاي جانە سيان شەت تىلدەرى ۋنيۆەرسيتەتتەرىندە جىل سايىن «قازاق ءتىلى مەن ادەبيەتى» ماماندىعى بويىنشا قىتايلىق ستۋدەنتتەردى قابىلداۋ جۇزەگە اسىرىلۋدا.

جاڭالىقتار