قىتاي رەسەيمەن شەكارالاس ايماقتارىن كارتاعا قوسىپ العانى راس پا؟

None
استانا. قازاقپارات - كەيىنگى كۇندەرى الەۋمەتتىك جەلىلەردە «قىتاي رەسەيگە تيەسىلى تاريحي جەرلەرىن كارتاعا قوسىپ العان» دەگەن اقپارات تاراپ جاتىر.

ق ح ر رەسمي سايتتارىندا «اشىق كارتالارداعى مازمۇندى كورسەتۋ نورمالارى» تۋرالى بۇيرىق جاريالانعان.

Factcheck.kz ءتىلشىسى اقپاراتتى تەكسەرىپ كوردى.

بىرىنشىدەن، ق ح ر پرەمەر-ءمينيسترىنىڭ رەسمي سايتىندا «كارتا مازمۇنىن كوپشىلىككە ۇسىنۋ تالاپتارىنىڭ» قارالعانى ءارى ماقۇلدانعانى جازىلعان. رەسەيمەن شەكارالاس ايماقتاعى كەيبىر قالالاردىڭ اتاۋى قىتايشا كورسەتىلگەن. دەگەنمەن ول جەردەن ەشقانداي دا كارتانىڭ سىزباسىن بايقامادىق. تاريحي اتاۋلاردى ءوز تىلىندە بەرۋدىڭ ەش ابەستىگى جوق (مىسالى، قازاقستان تاريحىندا ورەنبۋرگ قالاسىن ورىنبور، ومسك قالاسىن ومبى دەپ اتايدى). ەكىنشىدەن، كارتادا XVII عاسىرداعى تسين يمپەرياسىنىڭ شەكاراسى. تاقىرىبىندا «ەرتە تسين داۋىرىندەگى قىتاي كارتاسى» دەپ جازىلعان ءارى ەشقانداي دا رەسمي كارتا ەمەس. ينتەرنەتتە وسى جانە ۇقساس كارتالاردىڭ ءتۇرىن تاۋىپ الۋعا بولادى.

اقپارات قاي تۇستا بۇرمالاندى؟

قازاقستاندىق مەديا كەڭىستىكتە بۇل اقپاراتتى ايگۇل سولوۆيەۆانىڭ Facebook-پاراقشاسىنا جاريالاعان جازباسىن بايقادىق. ول «موگيليزاتسيا» Telegram-ارناسىنىڭ ءماتىنىن كوشىرىپ العان. اقپارات تاراتۋشىلاردىڭ ايتۋىنشا، بۇل كارتانى ق ح ر بيلىگى رەسمي بەكىتىپ، رەسەيدىڭ ۋكراينامەن سوعىستا جەڭىلگەن جاعدايدا تاريحي تەرريتوريالارىن قايتارۋعا دايىندالىپ جاتىر ەكەن دەلىنگەن. اقپارات وسى تۇستا بۇرمالاندى، انتي-رەسەيلىك كوڭىل-كۇيدى تۋدىرۋ ءۇشىن جاسالعان بولۋى مۇمكىن. ال ەڭ العاش بۇل اقپاراتتى جازعان رەسەيلىك بلوگەر ۆلاديمير ستەچكين رەسەيدىڭ قىتايمەن شەكارالاس كەيبىر قالالارىنىڭ قىتايشا اتاۋمەن جازىلعانىن بايقاپ، ماتەريال شىعاردى. ءبىراق ستەچكين كارتانى تەك مىسال رەتىندە كورسەتتى. ال ودان كەيىن كوپتەگەن سايت كارتانى قىتاي بيلىگىنىڭ استىرتىن جوسپارى رەتىندە تاراتتى.

سوڭعى جاڭالىقتار