بوكستان الەم چەمپيوناتى: ءمادينا نۇرشايەۆا شيرەك فينالعا ءوتتى

استانا. قازاقپارات - ءۇندىستاننىڭ نيۋ-دەلي قالاسىندا بوكستان ايەلدەر اراسىندا ءوتىپ جاتقان الەم چەمپيوناتىندا قازاقستاندىق ءمادينا نۇرشايەۆا شيرەك فينالعا ءوتتى، دەپ حابارلايدى قازاقپارات ءتىلشىسى.

قازاقستاندىق بوكسشى 1/8 فينالدا وڭتۇستىك كورەيالىق حونگەن چويمەن جۇدىرىقتاستى.

ءمادينا بىردەن جەكپە-جەك تىزگىنىن قولعا الا ءبىلدى. ءۇشىنشى راۋندتا ءتىپتى قارسىلاسىن نوكداۋنعا جىبەردى. تورەشىلەر شەشىمى - 5:0، جەڭىس م. نۇرشايەۆانىڭ پايداسىندا.

تاعى ءبىر قازاقستاندىق جازيرا وراقبايەۆا بۇگىن جارىس جولىنان شىعىپ قالدى. ول 52 كەلىگە دەيىنگى سالماقتا ءۇندىستاندىق ساكشي ساكشيگە ەسە جىبەردى - 0:5.

بۇگىن سونداي-اق جاينا شەكەربەكوۆا (54 كەلى) وزبەكستاندىق نيگينا ۋكتاموۆامەن، ۆالەنتينا حالزوۆا ۆەنەسۋەلالىق ماريەليس يريسامەن شارشى الاڭعا شىعادى.

ەسكە سالا كەتەيىك، بۇدان بۇرىن نادەجدا ريابەتستىڭ كەلەسى كەزەڭگە وتكەنىن جازعان بولاتىنبىز.

سونداي-اق نازىم قىزايباي مەن كارينا يبراگيموۆانىڭ باستاپقى جەكپە-جەگىن وتكىزەتىنى حابارلاندى.

وكىنىشكە قاراي، ەكى دۇركىن الەم چەمپيونى ن. قىزايباي كەشە كۇتپەگەن جەردەن جەڭىلىپ قالدى.