ا ق ش- تان كەلگەن بايقاۋشى سايلاۋعا قاتىستى پىكىر ءبىلدىردى
«اتاپ ايتقاندا، سايلاۋشىلاردىڭ داۋىس بەرۋگە بارىنشا قاتىسۋىنا نازار اۋدارۋ كەرەك. 19- ناۋرىز كۇنى قالا تۇرعىندارى سايلاۋ ۋچاسكەلەرىنە قاراي كەلىپ جاتقانىن كوردىك. وسى ورايدا ولاردىڭ وسى سايلاۋعا كەلۋىن قانداي سەبەپتەر ىنتالاندىرىپ تۇرعانىن سۇراپ بىلدىك»، - دەدى دوكتور كامران بوحاري ەلورداداعى حالىقارالىق بايقاۋشىلارعا قولعابىس كورسەتۋ ورتالىعىندا وتكەن بريفينگىدە.
وسى ورايدا ول بيىل جاڭا پارتيالاردىڭ قوسىلۋى داۋىس بەرۋشىلەردىڭ تاڭداۋ جاساۋىنا اسەر ەتكەنىن ايتتى.
«بىرىنشىدەن، العاش رەت قاتىسىپ جاتقان جاڭا پارتيالارعا مۇمكىندىك جاسالدى. پارتيالار قانداي قۇندىلىقتى، ۇستانىمدى ناسيحاتتاپ جاتقانىن قاراساڭىز، ءبىرقاتار سالا قامتىلعانىن بايقاۋعا بولادى. جالپى، قازاقستان قازىرگى كۇردەلى گەوساياسي كەزەڭدە ءوزىنىڭ باستامالارىن جۇزەگە اسىرىپ جاتقانىن ماڭىزدى دەپ بىلەمىز. قازىر سايلاۋدىڭ تۇپكىلىكتى ناتيجەلەرى جاريالانعان جوق. سوندىقتان ناقتى قورىتىندىنى العاننان سوڭ، ءتيىستى تالداۋ مالىمەتىن كوپشىلىككە تاراتامىز»، - دەدى بايقاۋشى.
ايتا كەتەيىك، 19- ناۋرىزداعى الدىن الا قورىتىندى بويىنشا سايلاۋشىلاردىڭ 54,19 پايىزى داۋىس بەرۋگە قاتىستى.